ଭୁବନେଶ୍ୱର, ୮।୩: କିଟ୍ର ବିଜୁ ପଟ୍ଟନାୟକ ଇନ୍ଡୋର ଷ୍ଟାଡିୟମରେ ଚାଲିଥିବା ୬୯ତମ ଜାତୀୟ ସିନିୟର ଭଲିବଲ୍ ଚାମ୍ପିୟନଶିପ୍ରେ ଓଡ଼ିଶା ପୁରୁଷ ଦଳ କ୍ରମାଗତ ୩ ମ୍ୟାଚ ଜିତି ବିଜୟରେ ହ୍ୟାଟ୍ରିକ କରିଛି। ପ୍ରଥମ ଦୁଇ ମ୍ୟାଚରେ ଯଥାକ୍ରମେ ମଧ୍ୟପ୍ରଦେଶକୁ ୩-୦ ଓ ଛତିଶଗଡ଼କୁ ସମାନ ବ୍ୟବଧାନରେ ହରାଇଥିବା ଓଡ଼ିଶା ରବିବାର ଚଣ୍ଡିଗଡ଼କୁ ୩-୧ ସେଟ୍ରେ ପରାସ୍ତ କରିଛି। ପ୍ରଥମ ସେଟ୍କୁ ୨୨-୨୫ ପଏଣ୍ଟରେ ହାରିଥିଲେ ହେଁ ଓଡ଼ିଶା ସଫଳ ପ୍ରତ୍ୟାବର୍ତ୍ତନ କରି ପରବର୍ତ୍ତୀ ୩ ସେଟ୍କୁ ଯଥାକ୍ରମେ ୨୫-୨୦, ୨୯-୨୭ ଓ ୨୬-୨୪ ପଏଣ୍ଟରେ ଜିତିଥିଲା। ୧୦୫ ମିନିଟ ବିଶିଷ୍ଟ ଏହି ମୁକାବିଲାରେ ଓଡ଼ିଶା ୧୦୨-୯୬ ପଏଣ୍ଟରେ ବାଜି ମାରିଥିଲା। ଅନ୍ୟ ମ୍ୟାଚଗୁଡ଼ିକ ମଧ୍ୟରେ ମଧ୍ୟପ୍ରଦେଶ ୩-୦ରେ ଲଦାଖ, ଉତ୍ତରାଞ୍ଚଳ ୩-୦ରେ ଝାଡ଼ଖଣ୍ଡ, ଗୁଜରାଟ ୩-୦ରେ ତେଲେଙ୍ଗାନା, ଜମ୍ମୁକଶ୍ମୀର ୩-୦ରେ ତ୍ରିପୁରା, ଆନ୍ଧ୍ର ପ୍ରଦେଶ ୩-୧ରେ ହିମାଚଳ ପ୍ରଦେଶ ଏବଂ ପଣ୍ଡିଚେରୀ ୩-୦ରେ ଦିଲ୍ଲୀକୁ ପରାସ୍ତ କରିଛି।
ମହିଳାରେ ଛତିଶଗଡ଼କୁ ହରାଇଲା ଓଡ଼ିଶା
ପ୍ରତିଯୋଗିତାର ମହିଳା ବିଭାଗରେ ମଧ୍ୟ ଓଡ଼ିଶା ରବିବାର ପ୍ରଭାବୀ ପ୍ରଦର୍ଶନ କରି ଛତିଶଗଡ଼କୁ ୩-୦ ସେଟ୍ରେ ପରାସ୍ତ କରିଛି। ସମ୍ପୂର୍ଣ୍ଣ ପ୍ରାଧାନ୍ୟ ବିସ୍ତାର କରିଥିବା ଓଡ଼ିଶା ଦଳ ୨୫-୭, ୨୫-୧୩, ୨୫-୧୨ ପଏଣ୍ଟରେ ବିଜୟୀ ହୋଇଛି। ୫୦ ମିନିଟ ବିଶିଷ୍ଟ ଏହି ମୁକାବିଲା ଓଡ଼ିଶା ସପକ୍ଷରେ ୭୫-୩୨ ପଏଣ୍ଟରେ ଶେଷ ହୋଇଥିଲା। ଅନ୍ୟ ମହିଳା ମ୍ୟାଚଗୁଡ଼ିକ ମଧ୍ୟରେ ମହାରାଷ୍ଟ୍ର ୩-୦ରେ ତାମିଲନାଡ଼ୁ, ମଧ୍ୟପ୍ରଦେଶ ୩-୦ରେ ଜମ୍ମୁ କଶ୍ମୀର, ଚଣ୍ଡିଗଡ଼ ୩-୦ରେ ଲଦାଖ, ଉତ୍ତର ପ୍ରଦେଶ ୩-୦ରେ ପଞ୍ଜାବ, ଗୁଜରାଟ ୩-୦ରେ ଝାଡ଼ଖଣ୍ଡ, କର୍ନାଟକ ୩-୦ରେ ମିଜୋରାମ, ଉତ୍ତରାଞ୍ଚଳ ୩-୧ରେ ପଣ୍ଡିଚେରୀ ଓ ରାଜସ୍ଥାନ ୩-୦ରେ ମଣିପୁରକୁ ପରାସ୍ତ କରିଛି। ପ୍ରଥମ ମ୍ୟାଚରେ ରାଜସ୍ଥାନଠାରୁ ହାରିଥିବା ଓଡ଼ିଶାର ଏହା କ୍ରମାଗତ ଦ୍ୱିତୀୟ ବିଜୟ। ପୂର୍ବ ମ୍ୟାଚରେ ଦଳ ମଣିପୁରକୁ ୩-୦ରେ ପରାସ୍ତ କରିଥିଲା।
