ଭୁବନେଶ୍ୱର, ୯।୩ (କ୍ରୀଡ଼ା ପ୍ରତିନିଧି)-କିଟ୍ର ବିଜୁ ପଟ୍ଟନାୟକ ଇନ୍ଡୋର ଷ୍ଟାଡିୟମରେ ଚାଲିଥିବା ୬୯ତମ ଜାତୀୟ ସିନିୟର ଭଲିବଲ୍ ଚାମ୍ପିୟନଶିପ୍ର ପୁରୁଷ ବିଭାଗରେ ଓଡ଼ିଶା ସୋମବାର ୩-୦ ସେଟ୍ (୨୫-୧୫, ୨୫-୧୮, ୨୫-୧୯)ରେ ଉତ୍ତର ପ୍ରଦେଶକୁ ପରାସ୍ତ କରିଛି। ଛତିଶଗଡ଼, ଲଦାଖ, ଚଣ୍ଡିଗଡ଼, ମଧ୍ୟପ୍ରଦେଶ ଓ ଉତ୍ତରପ୍ରଦେଶକୁ ହରାଇବାପରେ ଓଡ଼ିଶା ପୁରୁଷ ଦଳ ନିଜ ପୁଲ୍ରେ ଶୀର୍ଷସ୍ଥାନରେ ରହି ନକ୍ଆଉଟରେ ପ୍ରବେଶ କରିଛି। ଶେଷଥରପାଇଁ ଓଡ଼ିଶା ୧୯୯୫ରେ ନକ୍ଆଉଟରେ ପ୍ରବେଶ କରିଥିଲା। ଅର୍ଥାତ୍ ଦୀର୍ଘ ୨୬ ବର୍ଷ ବ୍ୟବଧାନରେ ଓଡ଼ିଶା ପୁରୁଷ ଦଳକୁ ଏହି ସଫଳତା ମିଳିଛି। ଓଡ଼ିଶା ଦଳର ଏହି ସଫଳତାର ଶ୍ରେୟ ଭଲିବଲ୍ ଫେଡେରେଶନ ଅଫ୍ ଇଣ୍ଡିଆର ସଭାପତି ତଥା କିଟ୍ର ପ୍ରତିଷ୍ଠାତା ଅଚ୍ୟୁତ ସାମନ୍ତଙ୍କ ନିକଟକୁ ଯାଉଛି ବୋଲି ଓଡ଼ିଶା ଦଳର କୋଚ୍ ଲୋତକବିନ୍ଦୁ ଦାଶ ପ୍ରକାଶ କରିଛନ୍ତି। ଅଭ୍ୟାସ ପାଇଁ ଭିତ୍ତିଭୂମି ଯୋଗାଇ ଦିଆଯିବାଠାରୁ ଆରମ୍ଭ କରି ରାଜ୍ୟରେ ଭଲିବଲ୍ର ବିକାଶ ପାଇଁ ପଦକ୍ଷେପ ଏବଂ ଖେଳାଳିଙ୍କୁ ସେ ସର୍ବଦା ଉତ୍ସାହିତ କରିବାର ଫଳ ମିଳିଛି ବୋଲି ଲୋତକ ବିନ୍ଦୁ ପ୍ରକାଶ କରିଛନ୍ତି। ଅନ୍ୟ ପୁରୁଷ ମ୍ୟାଚଗୁଡ଼ିକ ମଧ୍ୟରେ ତେଲଙ୍ଗାନା ୩-୦ରେ ମିଜୋରାମ, ମହାରାଷ୍ଟ୍ର ୩-୦ରେ ପଶ୍ଚିମବଙ୍ଗ, ପଞ୍ଜାବ ୩-୦ରେ ଦିଲ୍ଲୀ, ଚଣ୍ଡିଗଡ଼ ୩-୦ରେ ଛତିଶଗଡ଼, ଗୁଜରାଟ ୩-୦ରେ ବିହାର, ଆନ୍ଧ୍ରପ୍ରଦେଶ ୩-୦ରେ ତ୍ରିପୁରା ଏବଂ ଉତ୍ତର ପ୍ରଦେଶ ୩-୦ ସେଟ୍ରେ ମଧ୍ୟପ୍ରଦେଶକୁ ପରାସ୍ତ କରିଛି।
ଓଡ଼ିଶା ମହିଳା ଦଳର କ୍ରମାଗତ ବିଜୟ
ଓଡ଼ିଶା ମହିଳା ଦଳ କ୍ରମାଗତ ୩ ମ୍ୟାଚ ଜିତିବାର ସୌଭାଗ୍ୟଲାଭ କରିଛି। ପ୍ରଥମ ମ୍ୟାଚରେ ରାଜସ୍ଥାନଠାରୁ ହାରି ଅଭିଯାନ ଆରମ୍ଭ କରିଥିବା ଓଡ଼ିଶା ପରବର୍ତ୍ତୀ ୨ଟି ମ୍ୟାଚରେ ଯଥାକ୍ରମେ ମଣିପୁରକୁ ୩-୦ ଓ ଛତିଶଗଡ଼କୁ ୩-୦ ସେଟ୍ରେ ପରାସ୍ତ କରିଥିବାବେଳେ ସୋମବାର ଆସାମକୁ ସମାନ ବ୍ୟବଧାନରେ ହରାଇ ବିଜୟରେ ହ୍ୟାଟ୍ରିକ କରିଛି। ଗ୍ରୁପ୍ ‘ସି’ର ଏହି ମ୍ୟାଚରେ ଆଧିପତ୍ୟ ବିସ୍ତାର କରି ଖେଳିଥିବା ଓଡ଼ିଶା ୨୫-୧୫, ୨୫-୧୪, ୨୫-୦୭ ପଏଣ୍ଟରେ ବିଜୟୀ ହୋଇଥିଲା। ମ୍ୟାଚଟି ୫୯ ମିନିଟବିଶିଷ୍ଟ ହୋଇଥିଲା। ମହିଳା ବିଭାଗରେ ଅନ୍ୟ ମ୍ୟାଚଗୁଡ଼ିକରେ ଚଣ୍ଡିଗଡ଼ ୩-୦ରେ ମଧ୍ୟପ୍ରଦେଶ, ଜମ୍ମୁ-କଶ୍ମୀର ୩-୦ରେ ଲଦାଖ, ଗୁଜରାଟ ୩-୦ରେ ବିହାର, ଉତ୍ତରାଞ୍ଚଳ ୩-୦ରେ ମିଜୋରାମ, କର୍ନାଟକ ୩-୦ରେ ଆନ୍ଧ୍ର ପ୍ରଦେଶ ଏବଂ ଦିଲ୍ଲୀ ୩-୧ରେ ତାମିଲନାଡ଼ୁକୁ ପରାସ୍ତ କରିଛି।