ଭୁବନେଶ୍ୱର,୨୨ା୮(ସରୋଜ ଜେନା): ରାଉରକେଲା ସ୍ଥିତ ବିର୍ସା ମୁଣ୍ଡା ଅନ୍ତର୍ଜାତୀୟ ହକି ଷ୍ଟାଡିୟମରେ ସୋମବାର ଠାରୁ ଆରମ୍ଭ ହୋଇଛି ଜାତୀୟ ସବ୍ଜୁନିୟର ଜାତୀୟ ହକି କ୍ୟାମ୍ପ। ପୂର୍ବତନ ଭାରତୀୟ ଖେଳାଳି ସର୍ଦ୍ଦାର ସିଂ ଓ ରାଣୀ ରାମପାଲଙ୍କ ଅଧୀନରେ ୮୦ରୁ ଅଧିକ ଖେଳାଳି ଏହି କ୍ୟାମ୍ପରେ ସାମିଲ ହୋଇଛନ୍ତି। ଦେଶର ବିଭିନ୍ନ ରାଜ୍ୟରୁ ୪୦ ଜଣ ଲେଖାଏ ବାଳକ ଓ ବାଳିକା ଏହି କ୍ୟାମ୍ପରେ ଯୋଗ ଦେଇଛନ୍ତି। ଏହା ବ୍ୟତୀତ ଖେଳାଳି ମାନଙ୍କୁ ପ୍ରଶିକ୍ଷଣ ଦେବା ପାଇଁ ୧୬ ଜଣ ସପୋର୍ଟ ଷ୍ଟାଫ୍ ରହିଛନ୍ତି। ଖେଳରତ୍ନ ପୁରସ୍କାର ବିଜେତା ସର୍ଦ୍ଦାର ଓ ରାଣୀଙ୍କୁ ଯଥାକ୍ରମେ ବାଳକ ଓ ବାଳିକା ଦଳର କୋଚ୍ ଘୋଷଣା କରାଯାଇଥିବା ବେଳେ ଆହୁରି ଅନେକ ପୂର୍ବତନ ଖେଳାଳି ସପୋର୍ଟ ଷ୍ଟାଫ୍ ଭାବରେ ସାମିଲ ହୋଇଛନ୍ତି। ଭାରତୀୟ ଦଳର ପୂର୍ବତନ ଅଧିନାୟିକା ଅସୁନ୍ତା ଲାକ୍ରା ଓ ଓଡ଼ିଆ ତାରକା ଲିଲିମା ମିଞ୍ଜ କୋଚିଂରେ ରାଣୀଙ୍କୁ ସହାୟତା କରୁଛନ୍ତି। ଅନ୍ୟ ପକ୍ଷରେ ଏସିଆନ୍ ଗେମ୍ସ ସ୍ବର୍ଣ୍ଣ ବିଜେତା ଲାଜରୁସ ବାର୍ଲା ଓ ଏସିଆ କପ ବିଜେତା ଗୋଲ କିପର ଆଡ୍ରିଆନ୍ ଡି ସୌଜା କୋଚିଂରେ ସର୍ଦ୍ଦାରଙ୍କୁ ସହାୟତା କରୁଛନ୍ତି।
ତୃଣମୂଳ ସ୍ତରରୁ ହକି ଖେଳର ସ୍ତରକୁ ଉନ୍ନତ କରିବା ପାଇଁ ହକି ଇଣ୍ଡିଆର ସଭାପତି ଦିଲୀପ ତୀର୍କି ଏହି କାର୍ଯ୍ୟକ୍ରମ ଲଞ୍ଚ କରିଥିଲେ। ଯୁବ ଖେଳାଳି ମାନଙ୍କୁ ଅନ୍ତର୍ଜାତୀୟ ଖେଳାଳିଙ୍କ ଅଭିଜ୍ଞତା ପ୍ରଦାନ କରିବା ପାଇଁ ସେ ଏହି କାର୍ଯ୍ୟକ୍ରମ ଲଞ୍ଚ କରିବା ସହ ରାଣୀ ଓ ସର୍ଦ୍ଦାରଙ୍କ ପରି ଖେଳାଳିଙ୍କୁ ସାମିଲ କରିଥିଲେ। ହକି ଇଣ୍ଡିଆ ତୃଣମୂଳ ସ୍ତରରୁ ହକି ଖେଳାଳିଙ୍କ ବିକାଶ ଦିଗରେ କାର୍ଯ୍ୟ କରୁଥିବାରୁ ମୁଁ ଅତ୍ୟନ୍ତ ଖୁସି ବୋଲି କହିଛନ୍ତି ତୀର୍କି। ଜୋନାଲ୍ ଓ ନ୍ୟାଶନାଲ ସବ ଜୁନିୟର ଚାମ୍ପିୟନଶିପ୍ରୁ ଏହି ଖେଳାଳି ମାନଙ୍କ ଚୟନ କରାଯାଇଛି। ଏହା ସହିତ ଓଡ଼ିଶା ସରକାରଙ୍କ ପକ୍ଷରୁ ମିଳିଥିବା ସହାୟତା ପାଇଁ ତୀର୍କି ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି। ସର୍ଦ୍ଦାର ଓ ରାଣୀଙ୍କ ପରି ଖେଳାଳି କେବଳ ଫିଲ୍ଡରେ ନୁହେଁ ବରଂ ଫିଲ୍ଡ ବାହାରେ ଖେଳାଳି ମାନଙ୍କ ବିକାଶରେ ସାହାଯ୍ୟ କରିବେ ବୋଲି ସେ କହିଛନ୍ତି। ଏହି କ୍ୟାମ୍ପ ଦେଶର ହକିରେ ଏକ ବୈପବ୍ଲିକ ପରିବର୍ତ୍ତନ ଆଣିବ ବୋଲି କହିଛନ୍ତି ହକି ଇଣ୍ଡିଆର ସେକ୍ରେଟାରୀ ଜେନେରାଲ ଭୋଳାନାଥ ସିଂ। ଦିଲୀପ ଓ ମୁଁ କାର୍ଯ୍ୟକାରୀ ସଦସ୍ୟ ରହିଥିବା ବେଳେ ଏ ସମ୍ପର୍କରେ ଆଲୋଚନା କରୁଥିଲୁ। ଯୋଜନା ବର୍ତ୍ତମାନ ବାସ୍ତବତାରେ ପରିଣତ ହୋଇଥିବାରୁ ଖୁସି ଲାଗୁଛି ବୋଲି କହିଛନ୍ତି ଭୋଳାନାଥ।