ନୂଆଦିଲ୍ଲୀ, ୨୨ା୧୧ (ପି.ଟି.)-ଭାରତୀୟ ସିନିୟର ମହିଳା ଦଳର କ୍ୟାମ୍ପ ଡିସେମ୍ବର ୧ରୁ ଗୋଆରେ ଆରମ୍ଭ ହେବ। କରୋନା ଭାଇରସ୍ ପାଇଁ ଲକ୍ଡାଉନ୍ ପରେ ଏହା ମହିଳା ଖେଳାଳିଙ୍କର ପ୍ରଥମ ଜାତୀୟ କ୍ୟାମ୍ପ। ଏଥିପାଇଁ ୩୦ଜଣ ଖେଳାଳିଙ୍କ ମଧ୍ୟରେ ଓଡ଼ିଶାର ଦୁଇଜଣ ଯବାମଣି ଟୁଡୁ (ଡିଫେଣ୍ଡର) ଓ ପ୍ୟାରୀ ଖାଖା (ମିଡ୍ ଫିଲ୍ଡର) ସ୍ଥାନ ପାଇଛନ୍ତି। ୨୦୨୨ ଏଏଫ୍ସି ଏସିଆନ କପ୍ ଲାଗି ପ୍ରସ୍ତୁତି ପାଇଁ ଏହି କ୍ୟାମ୍ପ ଡକାଯାଇଛି। ଏହି ମହାଦେଶୀୟ ଇଭେଣ୍ଟ ଭାରତରେ ଆୟୋଜନ ହେବ। ମୁଖ୍ୟ କୋଚ୍ ମେମୋଲ ରକିଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଖେଳାଳିମାନେ ତାଲିମ ନେବେ। କ୍ୟାମ୍ପ ପାଇଁ ଭାରତୀୟ ଟିମ୍ ଡାକ୍ତର ଶେରଭିନ୍ ଶେରିଫ୍ଙ୍କ ଦ୍ୱାରା ପ୍ରସ୍ତୁତ କରାଯାଇଥିବା ଏସ୍ଓପି (ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର) ପ୍ରସ୍ତୁତ କରାଯାଇଛି। କ୍ୟାମ୍ପରେ ଯୋଗଦେବା ଲାଗି ନିଜ ସହ ଛାଡ଼ିବା ପୂର୍ବରୁ ଖେଳାଳିମାନଙ୍କୁ ଆଇସିଏମ୍ଆର ସ୍ବୀକୃତିପ୍ରାପ୍ତ ଲାବୋରେଟୋରି ଦ୍ୱାରା କୋଭିଡ୍ ଟେଷ୍ଟ (ଆରଟି-ପିସିଆର୍) କରାଇବା ବାଧ୍ୟତାମୂଳକ କରାଯାଇଛି। ନେଗେଟିଭ ଆସିଲାପରେ ସେମାନେ ସତର୍କତା ଅବଲମ୍ବନ କରି ଗନ୍ତବ୍ୟ ସ୍ଥଳକୁ ଯାଇ ପାରିବେ। ଗୋଆରେ ପହଞ୍ଚତ୍ବା ପରେ ସେମାନଙ୍କର ଏକ ରାପିଡ୍ ଆଣ୍ଟିଜେନ୍ ଟେଷ୍ଟ ହେବ। ଏଥିରେ ନେଗେଟିଭ ଆସିଲେ ସେମାନେ ସେମାନଙ୍କ ହେଟେଲରୁମ୍କୁ ଯାଇ ପାରିବେ। ସେଠାରେ ସେମାନଙ୍କୁ ୭ ଦିନ କ୍ୱାରାଣ୍ଟାଇନ୍ରେ ରହିବାକୁ ପଡ଼ିବ। ଟ୍ରେନିଂରେ ଯୋଗଦେବା ପୂର୍ବରୁ ୮ମ ଦିବସରେ ସେମାନଙ୍କର ପୁନର୍ବାର ଟେଷ୍ଟ ହେବ।