ରାଜକୋଟ, ୫ା୪ (ପି.ଟି.)-ଝାଡ଼ଖଣ୍ଡକୁ ୭ ଉଇକେଟରେ ପରାସ୍ତ କରି ଭାରତୀୟ ରେଲଓ୍ବେ ଦଳ ପୁଣି ଥରେ ଜାତୀୟ ମହିଳା ଦିନିକିଆ କ୍ରିକେଟ ଚାମ୍ପିୟନଶିପ୍ ଟାଇଟଲ ହାସଲ କରିଛି। ଏ ପର୍ଯ୍ୟନ୍ତ ଅନୁଷ୍ଠିତ ଜାତୀୟ ଦିନିକିଆ ଟୁର୍ନାମେଣ୍ଟର ୧୪ଟି ସଂସ୍କରଣ ମଧ୍ୟରୁ ରେଲଓ୍ବେ ଦଳ ୧୨ଥର ଚାମ୍ପିୟନ ହୋଇପାରିଛିି। ରେଲଓ୍ବେ ୩୭ ଓଭରରେ ୧୬୮ ରନର ବିଜୟ ଲକ୍ଷ୍ୟ ହାସଲ କରିନେଇଥିଲା। ଦଳର ଅଧିନାୟିକା ତଥା ଶ୍ରେଷ୍ଠ ବ୍ୟାଟ୍ସଓମ୍ୟାନ ମିଥାଲି ରାଜଙ୍କୁ ବ୍ୟାଟିଂ କରିବା ଲାଗି ଆସିବାକୁ ପଡ଼ି ନ ଥିଲା। ଭାରତର ଅନ୍ତର୍ଜାତୀୟ ଖେଳାଳି ପୁନମ ରାଉତ ୯୪ ବଲ୍ରୁ ଧୈର୍ଯ୍ୟପୂର୍ଣ୍ଣ ୫୯ରନ କରି ଅଲରାଉଣ୍ଡର ସ୍ନେହା ରାଣାଙ୍କ ପାଇଁ ପ୍ଲାଟଫର୍ମ ପ୍ରସ୍ତୁତ କରିଥିଲେ। ସେ ୨୨ ବଲ୍ରୁ ୩୪ରନ କରି ଅପରାଜିତ ରହିବା ସହ ବିଜୟ ଲକ୍ଷ୍ୟକୁ ଅତିକ୍ରମ କରାଇଥିଲେ। ବିସ୍ଫୋରକ ବ୍ୟାଟିଂ ପରେ ରାଣା ରେଲଓ୍ବେ ତରଫରୁ ସବୁଠାରୁ ସଫଳ ବୋଲର ଭାବେ ତାଙ୍କ ଅଫ୍-ବ୍ରେକ୍ ବୋଲିଂରେ ୩୪ ରନ ବିନିମୟରେ ୩ ଉଇକେଟ ଅକ୍ତିଆର କରିଥିଲେ। ଝାଡ଼ଖଣ୍ଡ ଦଳ ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇ ୫୦ ଓଭରରେ ୧୬୭ ରନ କରିଥିଲା। ହେଲେ ରେଲଓ୍ବେ ଦଳ ସମସ୍ତ ବିଭାଗରେ ଉଚ୍ଚକୋଟୀର ପ୍ରଦର୍ଶନ ସହ ମ୍ୟାଚକୁ ସହଜରେ ଜିତିନେଇଥିଲା। ଝାଡ଼ଖଣ୍ଡର ୬ଜଣ ବ୍ୟାଟ୍ସଓମ୍ୟାନ ଦୁଇଅଙ୍କ ସ୍ପର୍ଶ କରିପାରି ନ ଥିଲେ। ଟପ୍ ସ୍କୋରର ଇନ୍ଦ୍ରାଣୀ ରୟ ୭୭ ବଲ୍ରୁ ୩ ଚୌକା ସହ ୪୯ ରନ ସଂଗ୍ରହ କରିଥିଲେ। ଅନ୍ୟମାନଙ୍କ ମଧ୍ୟରେ ଦୁର୍ଗା ମୁର୍ମୁ ୩୧ ଓ ଅଧିନାୟିକା ମାନି ନିହାରିକା ୩୯ରନ କରି ଅପରାଜିତ ରହିଥିଲେ।
ସଂକ୍ଷିପ୍ତ ସ୍କୋର
ଝାଡ଼ଖଣ୍ଡ: ୫୦ ଓଭରରେ ୧୬୭/ଅଲଆଉଟ ( ଇନ୍ଦ୍ରାଣୀ ରୟ-୪୯; ସ୍ନେହା ରାଣା-୩/୩୩, ଏକତା ବିସ୍ତ-୨/୩୩, ପୁନମ ଯାଦବ-୧/୨୬)।
ରେଲଓ୍ବେ: ୩୭ ଓଭରରେ ୧୬୯/୩ (ପୁନମ ରାଉତ-୫୯, ଏସ୍. ମେଘନା-୫୩, ସ୍ନେହା ରାଣା-୩୪*)।