କମ୍ୟୁନିଷ୍ଟ ପାର୍ଟିର ମହାଧିବେଶନ ପୂର୍ବରୁ ଚାଇନାରେ ଜାତୀୟତାବାଦୀ ଭାବନା ବୃଦ୍ଧି…

ବେଜିଂ,୮।୧୦ : ଚାଇନାରେ ଶାସକ କମ୍ୟୁନିଷ୍ଟ ପାର୍ଟିର ୨୦ ତମ କଂଗ୍ରେସ ପୂର୍ବରୁ ଦେଶରେ ଜାତୀୟତାବାଦୀ ଭାବନା ବୃଦ୍ଧି ପାଉଥିବା ଦେଖାଯାଉଛି। କମ୍ୟୁନିଷ୍ଟ ପାର୍ଟି ନିଜେ ଜାତୀୟତାବାଦୀ ଭାବନାକୁ ପ୍ରୋତ୍ସହିତ କରୁଛି। ନିକଟ ଅତୀତରେ, ସରକାରୀ ସମର୍ଥକ ଗଣମାଧ୍ୟମ ଏହାର ଅଭିଯାନକୁ ତୀବ୍ର କରି ସଂଗ୍ରାମ ଏବଂ ଲାଲଐତିହ୍ୟ ଉପରେ ଧ୍ୟାନ ଦେଇଥିଲେ। ମିଡିଆ ଆଲୋଚନା କ୍ରମାଗତ ଭାବରେ ଚାଇନା ପ୍ରତି ବଢୁଥିବା ବାହ୍ୟ ତଥା ଆଭ୍ୟନ୍ତରୀଣ ବିପଦ ଏବଂ ଶତ୍ରୁ ବାହିନୀ ସହିତ ଲଢ଼ିବାର ଆବଶ୍ୟକତା ବିଷୟରେ ଦର୍ଶାଯାଇ ଗୁରୁତ୍ୱ ପ୍ରଦାନ କରାଯାଉଛି।

କମ୍ୟୁନିଷ୍ଟ ପାର୍ଟିର ମହାଅଧିବେଶନ ପୂର୍ବରୁ ଦେଶରେ ଏଭଳି ସ୍ଥିତି ସୃଷ୍ଟି ହୋଇଛି। ଅକ୍ଟୋବର ୧୬ରୁ ଆରମ୍ଭ ହେବାକୁ ଥିବା କମ୍ୟୁନିଷ୍ଟ ପାର୍ଟି ଅଫ ଚାଇନା (ସିପିସି) ର କଂଗ୍ରେସ ସମୟରେ ଶି ଜିନପିଙ୍ଗ ତୃତୀୟ ଥର ପାଇଁ ଦଳର ସାଧାରଣ ସମ୍ପାଦକ ତଥା ଦେଶର ରାଷ୍ଟ୍ରପତିଭାବରେ ନିର୍ବାଚିତ ହେବେ ବୋଲି କୁହାଯାଉଛି।

ଚଳିତ ସପ୍ତାହରେ ସିପିସି ମୁଖପତ୍ର ପିପୁଲ୍ସ ଡେଲିରେ  ଏକ ଆର୍ଟିକିଲରେ ଜିନପିଙ୍ଗ କହିଛନ୍ତି ଯେ ଆମେ ଆମର ଲାଲଐତିହ୍ୟ ଜାରି ରଖିବା ଉଚିତ, ସଂଗ୍ରାମର ଭାବନାକୁ ପ୍ରେରଣା ଦେବା ଉଚିତ ଏବଂ ଦଳର ଜାରି ଐତିହାସିକ ସଂଗ୍ରାମ ମାଧ୍ୟମରେ ଦେଶକୁ ଆଗେଇ ନେବା ଉଚିତ। ଏହି ଆର୍ଟିକିଲରେ ଚାଇନାର ମହାନ ସଫଳତା ବିଷୟରେ ମଧ୍ୟ ଉଲ୍ଲେଖ କରାଯାଇଛି।

ଚାଇନାର ବଢୁଥିବା ଶକ୍ତି ଏବଂ ସଫଳତା ଗଣମାଧ୍ୟମରେ ବହୁ ଚର୍ଚ୍ଚିତ ହେଉଛି। ପର୍ଯ୍ୟବେକ୍ଷକଙ୍କ ଅନୁଯାୟୀ, ଏହା ମାଧ୍ୟମରେ ଲୋକଙ୍କ ମଧ୍ୟରେ ଦେଶପ୍ରେମର ଭାବନା ଜାଗ୍ରତ କରିବାକୁ ଚେଷ୍ଟା କରାଯାଉଛି। ବିଦେଶରେ ଚାଇନା ବିରୋଧୀ ପରିବେଶ ସୃଷ୍ଟି କରାଯାଉଛି ବୋଲି ଚେତାବନୀ ଦିଆଯାଉଛି, ଯେଉଁଥିପାଇଁ ଦେଶବାସୀଙ୍କୁ ଏହି ସଂଗ୍ରାମ ପାଇଁ ପ୍ରସ୍ତୁତ ହେବାକୁ ପଡ଼ିବ ବୋଲି କୁହାଯାଇଛି।

ଜିନପିଙ୍ଗଙ୍କ ଏକ ଆର୍ଟିକିଲ କମ୍ୟୁନିଷ୍ଟ ପାର୍ଟିର ଆଦର୍ଶ ପତ୍ରିକା ଚିୟୁଶିର ନୂତନ ସଂଖ୍ୟାରେ ପ୍ରକାଶ ପାଇଛି। ଏଥିରେ ଦଳର ଯୁଦ୍ଧ କ୍ଷମତା ବୃଦ୍ଧି କରିବାର ଆବଶ୍ୟକତା ରହିଛି ବୋଲି ସେ କହିଛନ୍ତି। ରାଜନୈତିକ ଏବଂ ଆଦର୍ଶ କ୍ଷେତ୍ରରେ ଦେଶକୁ ନେତୃତ୍ୱ ଦେବାବେଳେ ଏହା କରିବା ଜରୁରୀ ବୋଲି ସେ କହିଛନ୍ତି।