ନୂଆଦିଲ୍ଲୀ,୨୮।୫: ତାମିଲନାଡ଼ୁର ସଲେମ ଜିଲାରୁ ୩୫ କିମି ଦୂର ଚିନ୍ନାପମପଟ୍ଟି ଗାଁରେ ବାମହାତୀ ପେସର ଟି ନଟରାଜନଙ୍କ ଜନ୍ମ। ଗରିବ ପରିବାରର ଥିବାରୁ ନଟରାଜନଙ୍କ ଜୀବନ ନାନାଦି ସଂଘର୍ଷ ଦେଇ ଗତି କରିଛି। ତାଙ୍କ ମା’ ରାସ୍ତାକଡ଼ରେ ଷ୍ଟଲ ଲଗାଉଥିଲେ। ଏପରିକି ତାଙ୍କ ବାପା ରେଳ ଷ୍ଟେଶନରେ ପୋର୍ଟର କାମ କରୁଥିଲେ। ଏକ ସମୟରେ କ୍ରିକେଟ କିଟ୍ କିଣିବା ଲାଗି ନଟରାଜନଙ୍କ ପାଖରେ ଟଙ୍କା ନ ଥିଲା। ହେଲେ ଜିଲାସ୍ତରୀୟ କ୍ରିକେଟର ଜୟପ୍ରକାଶଙ୍କ ନଜର ପଡ଼ିବା ପରେ ତାଙ୍କ ଭାଗ୍ୟ ଚମକିଥିଲା। ଜୟପ୍ରକାଶ କ୍ରିକେଟର ଭାବେ ସେତେଟା ସଫଳ ନ ଥିଲେ ହେଁ ନଟରାଜନଙ୍କ ପ୍ରତିଭାକୁ ସେ ଜାଣିପାରିଥିଲେ। ତାଙ୍କ ପ୍ରଚେଷ୍ଟା ଯୋଗୁ ନଟରାଜନଙ୍କୁ ତାମିଲନାଡ଼ୁ କ୍ରିକେଟ ଆସୋସିଏଶନର ଏକ ଲିଗ୍ରେ ଖେଳିବାର ସୁଯୋଗ ମିଳିଥିଲା। ଏହାପରେ ତାମିଲନାଡ଼ୁ କ୍ରିକେଟ ଟିମ୍ରେ ତାଙ୍କ ଚୟନ ହୋଇଥିଲା। ୨୦୧୬ରେ ତାମିଲନାଡ଼ୁ ପ୍ରିମିୟର ଲିଗ୍ରେ ସୁପର ଓଭର ସମୟରେ ୬ରୁ ୬ ବଲ ୟର୍କର ଫିଙ୍ଗି ଚର୍ଚ୍ଚାକୁ ଆସିଥିଲେ ସେ। ପରେ ୨୦୧୭ରେ ଆଇପିଏଲ୍ରେ କିଙ୍ଗ୍ସ ଇଲେଭେନ ପଞ୍ଜାବ ଦଳ ତାଙ୍କୁ ୩ କୋଟି ଟଙ୍କା ଦେଇ କିଣିଥିଲା। କୋଟିପତି ହେବା ପରେ ସେ ନିଜ ଝାଟିମାଟି ଘରକୁ ବଙ୍ଗଳା କରିଥିଲେ। ଏହାଛଡ଼ା ସେ ସ୍ଥାନୀୟ ପିଲାମାନଙ୍କପାଇଁ କ୍ରିକେଟ ଏକାଡେମୀ ଆରମ୍ଭ କରି ସମସ୍ତଙ୍କୁ ପ୍ରେରଣା ଦେଉଛନ୍ତି।
