ତେନ୍ତୁଳିଖୁଣ୍ଟି,୨୨।୩(ଚିଦାନନ୍ଦ ସାହୁ): ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଲକ୍ ପାତ୍ରପୁଟ ପଞ୍ଚାୟତ କଳାହାଣ୍ଡି ସୀମାନ୍ତ ପାହାଡ଼ ତଳି ଗାଁ ଝରଣଗୁଡ଼ା। ଗ୍ରାମବାସୀଙ୍କ ପିଇବା ପାଣି ପାଇଁ ପ୍ରକୃତି ଭରସା। ଏଠାକାର ଲୋକମାନେ ନଳକୂପରୁ ଶୁଦ୍ଧ ପିଇବା ପାଣି ପାଉ ନ ଥିବାରୁ ଗାଁ ପାଖ ନାଳ ପାଣି ବ୍ୟବହାର କରୁଛନ୍ତି। ପାଣି ଆଣିବା ପାଇଁ ଖରାରେ ଅନେକ ବାଟ ଚାଲିବାକୁ ପଡ଼ୁଛି। ତେଣୁ ଗାଁରେ ନଳକୂପ ମରାମତି କରିବାକୁ ବାରମ୍ବାର ଦାବି ହେଉଛି। କିନ୍ତୁ ଏ ଦିଗରେ କେହି କର୍ଣ୍ଣପାତ କରୁ ନ ଥିବା ଗ୍ରାମବାସୀ ଅଭିଯୋଗ କରୁଛନ୍ତି।
ଗାଁରେ ୧୨ ରୁ ୧୫ ପରିବାର ରହୁଛନ୍ତି। ସେମାନଙ୍କ ପାଇଁ କେବଳ ଗୋଟିଏ ନଳକୂପ। ଘଣ୍ଟା ଘଣ୍ଟା ଅପେକ୍ଷା କଲେ ଗୋଟିଏ ହାଣ୍ଡି ପାଣି ଭର୍ତ୍ତି ହେଉଛି। ତାହା ପୁଣି ମଇଳାପାଣି, ଯାହାକି ପିଇବା ଉପଯୋଗୀ ହୋଇପାରୁନାହିଁ। ତେଣୁ ଲୋକେ ଗାଁଠାରୁ ଅଳ୍ପ ଦୂରରେ ଥିବା ନାଳପାଣି ବ୍ୟବହାର କରିବାକୁ ବାଧ୍ୟ ହେଉଛନ୍ତି। କିନ୍ତୁ ଆଉ କିଛିଦିନ ପରେ ଖରା ବଢ଼ିଲେ ନାଳର ପାଣି ଶୁଖିଯାଏ। ଗାଁରେ ପାନୀୟ ଜଳ ସମସ୍ୟା ନେଇ ମହିଳାମାନେ ଗତ ୧୯ ତାରିଖରେ ତେନ୍ତୁଳିଖୁଣ୍ଟି ବିଡିଓ ମନୋଜ କୁମାର ପାଣିଗ୍ରାହୀଙ୍କୁ ଅବଗତ କରିଥିଲେ। ଅଭିଯୋଗକୁ ଗୁରୁତ୍ୱ ଦେଇ ତୁରନ୍ତ ସମାଧାନ କରିବାକୁ ପାନୀୟ ଜଳ ଯୋଗାଣ ବିଭାଗୀୟ ଜେଇ ସନ୍ତୋଷ କାଟ୍ରାକଙ୍କୁ ବିଡିଓ ନିର୍ଦ୍ଦେଶ ଦେଇଥିଲେ। କିନ୍ତୁ ଜେଇଙ୍କୁ ଭେଟି ପାଣି ସମସ୍ୟା କଥା କହିବାରୁ ନିର୍ବାଚନ କାମ ସରିବା ପରେ ପାଣି ସମସ୍ୟା ବୁଝାଯିବ ବୋଲି ସେ କହିଥିବା ଗାଁର ଲିଲି ଟାକରି, ଟଭା ଟାକିରୀ, ତୁଳସୀ ଯାନୀ, ଦୁବାଇ ଯାନୀ, ଦଇମତି ଯାନୀ, ରାଧାମତି ଯାନୀ, ସୁଦ୍ବିତା ଯାନୀ, ରଶ୍ମିତା ଟାକରି, ବୁନ୍ଦୀ ଟାକରି, ରାମା ଯାନୀ, ତୁଲା ଯାନୀ କହିଛନ୍ତି। ସମସ୍ୟା ସମାଧାନ କରି ଗ୍ରାମରେ ତୁରନ୍ତ ପାନୀୟ ଜଳ ଯୋଗାଇଦେବାକୁ ସେମାନେ ଦାବି କରିଛନ୍ତି। ଏ ନେଇ ବିଡିଓ ମନୋଜ ପାଣିଗ୍ରାହୀଙ୍କୁ ପଚାରିବାରୁ ବ୍ଲକର ବିଭିନ୍ନ ପଞ୍ଚାୟତ ପାଣି ସମସ୍ୟା ସମାଧାନ ପାଇଁ ନୂଆ ନଳକୂପ ଖୋଳିବାକୁ ଅନୁମତି ଓ ଅର୍ଥ ମଗାଯାଇଛି। ଯେତେ ଶୀଘ୍ର ଆସିବ ଖୋଳାଯିବ ବୋଲି ସେ କହିଛନ୍ତି। କନିଷ୍ଠ ଯନ୍ତ୍ରୀ ସନ୍ତୋଷ କାଟ୍ରାକଙ୍କୁ ପଚାରିବାରୁ ଝରଣଗୁଡ଼ାରେ ଥିବା ନଳକୂପର କିଛି ମରାମତି ଆବଶ୍ୟକ। ଶୁକ୍ରବାର ସୁଦ୍ଧା ମରାମତି କରିଦିଆଯିବ ବୋଲି ସେ କହିଛନ୍ତିି।
