ନୂଆଦିଲ୍ଲୀ,୩ା୮: ପତଞ୍ଜଳି ରିସର୍ଚ୍ଚ ଫାଉଣ୍ଡେଶନ ଏବଂ ପତଞ୍ଜଳି ବିଶ୍ୱବିଦ୍ୟାଳୟ ହରିଦ୍ୱାରର ମିଳିତ ପ୍ରୟାସରେ ୪ ଦିନିଆ ଅନ୍ତର୍ଜାତୀୟ ସମ୍ମିଳନୀ ନିକଟରେ ଆରମ୍ଭ ହୋଇଯାଇଛି। ଉକ୍ତ ସମ୍ମିଳନୀରେ ୨ୟ ଦିନରେ ପାରମ୍ପରିକ ଭାରତୀୟ ଚିକିତ୍ସାର ଆଧୁନିକୀକରଣ, ଜନସ୍ବାସ୍ଥ୍ୟ ଏବଂ ଶିଳ୍ପ ଦୃଷ୍ଟିକୋଣ ଶୀର୍ଷିକ ଉପରେ ଏକ ବିସ୍ତୃତ ଆଲୋଚନା ବହୁ ବିଶିଷ୍ଠ ବ୍ୟକ୍ତିବିଶେଷଙ୍କ ଉପସ୍ଥିତିରେ କରାଯାଇଥିଲା। ଏହି ପରିପ୍ରେକ୍ଷୀରେ ବୈଜ୍ଞାନିକ ତଥା ଅଂଶଗ୍ରହଣକାରୀଙ୍କୁ ସମ୍ବୋଧିତକରି ପତଞ୍ଜଳି ବିଶ୍ୱବିଦ୍ୟାଳୟର କୁଳପତି ସ୍ବାମୀ ରାମଦେବ କହିଛନ୍ତି, ପ୍ରକୃତି ଆମର ସଂସ୍କୃତିର ପରିଚୟ ଏବଂ ଏହା ଆମକୁ ସମୃଦ୍ଧତା ଏବଂ ସ୍ବାସ୍ଥ୍ୟ ମଧ୍ୟ ଦେଇଥାଏ। ଆଜି ଲକ୍ଷ ଲକ୍ଷ ଲୋକ ନିଜ ଘର ବଗିଚାରେ ତୁଳସୀ, ଆଲୋଭେରା ଏବଂ ଗିଲୋୟକୁ ଯତ୍ନ ସହକାରେ ଲଗାଇଛନ୍ତି। ସେହିଭଳି ପତଞ୍ଜଳି ଅନୁସନ୍ଧାନ ପ୍ରତିଷ୍ଠାନର ସଭାପତି ଆଚାର୍ଯ୍ୟ ବାଲକ୍ରିଷ୍ଣା ଆୟୁର୍ବେଦ କ୍ଷେତ୍ରରେ ପତଞ୍ଜଳିର ବିପୁଳ ଅବଦାନ ବିଷୟରେ ବର୍ଣ୍ଣନା କରି କହିଛନ୍ତି, ପତଞ୍ଜଳି ଅନୁସନ୍ଧାନ ଏବଂ ଆୟୁର୍ବେଦିକ ଔଷଧ ବିଶ୍ୱରେ ଗ୍ରହଣୀୟ ହୋଇଛି। ସେହିପରି ଆୟୋଜକ କମିଟିର ଅଧ୍ୟକ୍ଷ ଡ. ବେଦ ପ୍ରିୟା ସଫଳତାର ସହ ଉକ୍ତ କାର୍ଯ୍ୟକ୍ରମ ପରିଚାଳନା କରିଥିଲେ। ଏହି ସମ୍ମିଳନୀରେ ୨୧ଟି ଦେଶର ୫୦ରୁ ଅଧିକ ଶିକ୍ଷାନୁଷ୍ଠାନରୁ ହଜାର ହଜାର ଅଂଶଗ୍ରହଣକାରୀ ପ୍ରତ୍ୟକ୍ଷ ଏବଂ ପରୋକ୍ଷ ଭାବେ ଜଡିତ ହୋଇଥିଲେ। ଅପରପକ୍ଷରେ ଅତିଥିମାନଙ୍କ ଦ୍ୱାରା ମୋଟ ୫୯ଟି ଗୁରୁତ୍ୱପୂର୍ଣ୍ଣ ପୁସ୍ତକ ଉନ୍ମୋଚିତ ହୋଇଥିଲା। ପତଞ୍ଜଳି ବିଶ୍ୱବିଦ୍ୟାଳୟ, ପତଞ୍ଜଳି ଆୟୁର୍ବେଦ କଲେଜ, ବୈଦିକ ଗୁରୁକୁଲମ୍ ଏବଂ ପତଞ୍ଜଳି ଅନୁସନ୍ଧାନ ପ୍ରତିଷ୍ଠାନର ବୈଜ୍ଞାନିକ ଏବଂ ଛାତୀଛାତ୍ରାମାନେ ଅତିଥି ତଥା ଅଂଶଗ୍ରହଣକାରୀଙ୍କ ସମ୍ମାନାର୍ଥେ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରିଥିଲେ। ଯେଉଁଥିରେ ଗ୍ରୁପ୍ ନୃତ୍ୟ, ଗୀତ ଏବଂ ଯୋଗ ମଧ୍ୟ କରାଯାଇଥିଲା।
