ନୂଆଦିଲ୍ଲୀ,୪ା୧୨: ସାମୁଦ୍ରିକ ଅର୍ଥ ବ୍ୟବସ୍ଥାର ବିକାଶ ଉପରେ ସରକାର ସ୍ୱତନ୍ତ୍ର ଧ୍ୟାନ ଦେଉଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି। ଆଜି ନୌସେନା ଦିବସ ଅବସରରେ ଆୟୋଜିତ ସ୍ୱତନ୍ତ୍ର ଉତ୍ସବରେ ଯୋଗଦେଇ ମୋଦି କହିଛନ୍ତି, ଏବେ ସାମୁଦ୍ରିକ ଅର୍ଥ ବ୍ୟବସ୍ଥାକୁ ଦୃଢ଼ କରିବା ଲାଗି ସାଗରମାଳା ଯୋଜନା ଅଧୀନରେ ବିକାଶ ଆଧାରିତ ବନ୍ଦର ନିର୍ମାଣ କରାଯାଉଛି।
ସେ କହିଛନ୍ତି, ଉପକୂଳବର୍ତ୍ତୀ ଅଞ୍ଚଳ ଗୁଡ଼ିକର ବିକାଶ ଏବଂ ପର୍ଯ୍ୟଟନ ଓ ରୋଜଗାରକୁ ପ୍ରାଧାନ୍ୟ ଦେବା ଲାଗି ଏହି ପ୍ରକାର ବନ୍ଦର ନିର୍ମାଣ କରାଯାଉଛି। ଏଥିରେ ପ୍ରଧାନମନ୍ତ୍ରୀ ଘୋଷଣା କରିଛନ୍ତି, ଏଣିକି ଭାରତୀୟ ନୌସେନା ଅଧିକାରୀ ମାନେ ସେମାନଙ୍କ କାନ୍ଧରେ ସଜା ଯାଉଥିବା ଚିହ୍ନ ସ୍ଥାନରେ ଶିବାଜୀ ମହାରାଜଙ୍କ ସେନାର ପ୍ରତୀକ ଚିହ୍ନ ଧାରଣ କରିବେ। ସେ ଆହୁରି ମଧ୍ୟ କହିଛନ୍ତି, ଖୁବ୍ଶୀଘ୍ର ନୌସେନାର ର୍ୟାଙ୍କ ଗୁଡ଼ିକୁ ଆମ ଦେଶର ସଂସ୍କୃତି ଓ ପରମ୍ପରା ଅନୁଯାୟୀ ନାମକରଣ କରାଯିବ।
