ବଲାଙ୍ଗୀର ଅଫିସ୍,୯ା୬: ବଲାଙ୍ଗୀର ସହର ପାଟଣା ହୋଟେଲ ଛକ ଏବଂ ମ୍ୟୁନିସିପାଲିଟି ଷ୍ଟଲ୍ ଉପର ବିଜ୍ଞାପନ ବୋର୍ଡରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ବିଧାୟକ ନରସିଂହ ମିଶ୍ରଙ୍କ ଫଟୋ ଥିବା ଦୁଇଟି ବଡ଼ ପୋଷ୍ଟର ଲାଗିଛି। ଉକ୍ତ ପୋଷ୍ଟରରେ ବଲାଙ୍ଗୀରରେ ନିର୍ମାଣାଧୀନ ଭୀମ ଭୋଇ ମେଡିକାଲ କଲେଜ ହସ୍ପିଟାଲ କୋଠାର ମଡେଲ ଚିତ୍ର ସହ ନବୀନ ଓ ନରସିଂହଙ୍କ ଫଟୋ ରହିଛି। ଉକ୍ତ ପୋଷ୍ଟରରେ ଭୀମ ଭୋଇ ମେଡିକାଲ କଲେଜ ହସ୍ପିଟାଲ, ବଲାଙ୍ଗୀର ଲେଖାଯାଇଥିଲେ ମଧ୍ୟ କୌଣସି ଦଳ, ବ୍ୟକ୍ତି, ଅନୁଷ୍ଠାନର ନଁା ନାହିଁ। ଏଭଳି ଏକ ପୋଷ୍ଟର ସହରରେ ଲଗାଯିବା ପରେ ଏହା ରାଜନୈତିକ ଦୃଷ୍ଟିରୁ ଚର୍ଚ୍ଚାର ଘେରକୁ ଆସିଛି। କିଏ ଓ କେଉଁ ଉଦ୍ଦେଶ୍ୟରେ ଦୁଇ ପ୍ରମୁଖ ଦଳର ତୁଙ୍ଗ ନେତାଙ୍କ ପୋଷ୍ଟର ଲଗାଇଲା ତାହା ସ୍ପଷ୍ଟ ହୋଇନାହିଁ। ଏନେଇ ବିଧାୟକ ମିଶ୍ରଙ୍କୁ ପଚରାଯିବାରୁ ସେ କହିଛନ୍ତି ଯେ, ତାଙ୍କରି ଉଦ୍ୟମରେ ବଲାଙ୍ଗୀର ମେଡିକାଲ କଲେଜ ପ୍ରତିଷ୍ଠା ହୋଇଛି ଏକଥା ଲୋକେ ଜାଣିଛନ୍ତି। ଏହି କଲେଜ ପ୍ରତିଷ୍ଠା ଦିଗରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସହଯୋଗ କରି ନ ଥିଲେ ଏହା ସଫଳ ହୋଇ ନ ଥା’ନ୍ତା ଏହା ମଧ୍ୟ ସମସ୍ତେ ଜାଣିଛନ୍ତି। ଏଣୁ ଏହି ମର୍ମରେ ଭୀମ ଭୋଇ ମେଡିକାଲ କଲେଜ ହସ୍ପିଟାଲ ସହ ମୁଖ୍ୟମନ୍ତ୍ରୀ ଓ ତାଙ୍କ ଫଟୋ ରହିବା ସ୍ବାଭାବିକ ବୋଲି ସେ କହିଛନ୍ତି। ତେବେ ଏହି ପୋଷ୍ଟର କିଏ ଲଗାଇଛି ଜାଣିନାହାନ୍ତି ବୋଲି ସେ କହିଛନ୍ତି। ଉକ୍ତ ପୋଷ୍ଟରକୁ ନେଇ ସହରରେ ନାନା ଚର୍ଚ୍ଚା ଶୁଣିବାକୁ ମିଳୁଛି।
କିଛିଦିନ ତଳେ ବିଜେଡି ରାଜ୍ୟ ସଭା ପ୍ରାର୍ଥୀ ମନୋନୟନ ଓ ମନ୍ତ୍ରିମଣ୍ଡଳ ପୁନର୍ଗଠନ ହୋଇଛି। ଟିଟିଲାଗଡ଼ ବିଧାୟିକା ଟୁକୁନି ସାହୁ ପୁଣି ଥରେ କ୍ୟାବିନେଟ୍ ପାହ୍ୟା ମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିଛନ୍ତି। ପାଟଣାଗଡ ବିଧାୟକ ସରୋଜ ମେହେରଙ୍କୁ ଗୁରୁଦାୟିତ୍ୱ ଦିଆଯାଇଛି। ଆଦିବାସୀ ନେତା ନିରଞ୍ଜନ ବିଶିଙ୍କୁ ବିଜେଡି ରାଜ୍ୟ ସଭାକୁ ପଠାଇଛି। ତେବେ ଏହି ରାଜନୈତିକ ଘଟଣାକ୍ରମରେ ବଲାଙ୍ଗୀରର ପୁରୁଖା ବିଜେଡି ନେତାଙ୍କ ସକ୍ରିୟତା ଲକ୍ଷ୍ୟ କରାଯାଉ ନାହିଁ। ଏତିକି ବେଳେ ବଲାଙ୍ଗୀରରେ ଗୋଟିଏ ପୋଷ୍ଟରରେ କିଏ କେଉଁ ଉଦ୍ଦେଶ୍ୟ ରଖି ନବୀନ ଓ ନରସିଂହଙ୍କ ଫଟୋ ଲଗାଇଲେ ତାହା ଚର୍ଚ୍ଚାକୁ ଖୋରାକ ଯୋଗାଇଛି।
