ଲଣ୍ଡନ,୨୯ା୧୦: ବୁଡ଼ାଜାହାଜରେ ମହିଳାଙ୍କୁ ବଳାତ୍କାର ନେଇ ନୌସେନା ମୁଖ୍ୟ ଚିନ୍ତିତ ବୋଲି କହିଛନ୍ତି। ବୁଡ଼ାଜାହାଜ ମଧ୍ୟରେ ମହିଳାଙ୍କୁ ଧମକ ଓ ବଳାତ୍କାର ମାମଲାରେ ତଦନ୍ତ ନିର୍ଦ୍ଦେଶ ଦିଆଯାଇଥିବା ସେ କହିଛନ୍ତି। ସ୍ଥାନୀୟ ଗଣମାଧ୍ୟମ ରିପୋର୍ଟ ଅନୁଯାୟୀ, ପୂର୍ବତନ ରୟାଲ ନୌସେନା ଲେଫ୍ଟନାଣ୍ଟ ସୋଫି ବ୍ରୁକ୍ଙ୍କ ଉଦ୍ଦେଶ୍ୟରେ କହିଛନ୍ତି ଯେ, ତାଙ୍କୁ ଶାରୀରିକ ତଥା ମାନସିକ ନିର୍ଯାତନା ଦିଆଯାଇଛି। ସେ ଏହା ମଧ୍ୟ ଦାବି କରିଛନ୍ତି ଯେ, ଯେତେବେଳେ ବି ଜଣେ ମହିଳା ବୁଡ଼ା ଜାହାଜରେ ଆସନ୍ତି, ସେତେବେଳେ ପୁରୁଷ କ୍ରୁ ସଦସ୍ୟମାନେ ତାଙ୍କୁ ଖରାପ ନଜରରେ ଦେଖନ୍ତି।
ବ୍ରୁକ ଆହୁରି ମଧ୍ୟ ଅଭିଯୋଗ କରିଛନ୍ତି, ପୁରୁଷମାନେ ମହିଳା ସହକର୍ମୀଙ୍କ ଏକ ‘କ୍ରସ୍ ଡେପ୍ଥ ବଳାତ୍କାର ତାଲିକା’ ପ୍ରସ୍ତୁତ କରିଛନ୍ତି, ଯେଉଁଥିରେ ବୁଡ଼ାଜାହାଜରେ ଥିବା ପୁରୁଷମାନେ ମହିଳା ସହକର୍ମୀମାନଙ୍କୁ ସମୁଦ୍ରରେ ବଳାତ୍କାର କରିବାକୁ ବ୍ୟବସ୍ଥା କରିଥିଲେ। ସେ କହିଛନ୍ତି, ଏହି ତାଲିକାରେ ସେ ଷଷ୍ଠ ସ୍ଥାନରେ ଅଛନ୍ତି। ୩୦ ବର୍ଷୀୟ ବ୍ରୁକ୍ ଚଳିତ ବର୍ଷ ରୟାଲ ନୌସେନା ଛାଡ଼ିଥିଲେ ଏବଂ ପରେ ବୁଡ଼ାଜାହାଜ ଗତିବିଧି ବିଷୟରେ ଏକ ଇମେଲ ମାଧ୍ୟମରେ ଅତ୍ୟଧିକ ସମ୍ବେଦନଶୀଳ ସୂଚନା ଦେଇଥିବାର ତାଙ୍କୁ ଜେଲ୍ଦଣ୍ଡ ହୋଇଥିଲା।
ନୌସେନା ମୁଖ୍ୟ ଆଡମ ବେନ୍ କହିଛନ୍ତି, ରୟାଲ ନୌସେନା ବିରୋଧରେ ହୋଇଥିବା ବଳାତ୍କାରର ସମସ୍ତ ଅଭିଯୋଗ ଅତ୍ୟନ୍ତ ନିନ୍ଦନୀୟ। ସେ ତାଙ୍କ ବିବୃତ୍ତିରେ କହିଛନ୍ତି, ରୟାଲ ନୌସେନାରେ ମହିଳାଙ୍କ ବଳାତ୍କାରକୁ ଆଦୌ ବରଦାସ୍ତ କରାଯିବ ନାହିଁ। ସେ ଆହୁରି ମଧ୍ୟ କହିଛନ୍ତି,ଏହି ସମସ୍ତ ଅଭିଯୋଗର ପୁଙ୍ଖାନୁପୁଙ୍ଖ ଅନୁସନ୍ଧାନ କରିବାକୁ ମୁଁ ମୋର ବରିଷ୍ଠ ଦଳକୁ ନିର୍ଦ୍ଦେଶ ଦେଇଛି। ଯଦି ଏହି ମାମଲାରେ କେହି ଦୋଷୀ ସାବ୍ୟସ୍ତ ହୁଅନ୍ତି, ତେବେ ତାଙ୍କ ବିରୋଧରେ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।