ନୂଆଦିଲ୍ଲୀ, ୧୩।୧: ୟୁକ୍ରେନ୍-ରୁଷିଆ ଯୁଦ୍ଧ ଯୋଗୁ ସାରା ବିଶ୍ୱ ପ୍ରଭାବିତ ହୋଇଛି। ୟୁକ୍ରେନ୍ ଉପରେ ରୁଷିଆ ଆକ୍ରମଣ କରିବା ନେଇ ପାଶ୍ଚାତ୍ୟ ରାଷ୍ଟ୍ର ଏହା ଉପରେ କଟକଣା ଲଗାଇଥିବା ବେଳେ ଏହାର ପରିଣାମ ଏବେ ଭାରତକୁ ଭୋଗିବାକୁ ପଡ଼ିଛି। ମରାମତି ସକାଶେ ଭାରତ ଡିଜେଲ୍-ଇଲେକ୍ଟ୍ରିକ୍ ବୁଡ଼ାଜାହାଜ ଆଇଏନ୍ଏସ୍ ସିନ୍ଧୁରତ୍ନକୁ ରୁଷିଆ ପଠାଇଥିଲା।
ହେଲେ ପାଶ୍ଚାତ୍ୟ ଦେଶର କଟକଣା ପାଇଁ ସିନ୍ଧୁରତ୍ନ ରୁଷିଆରେ ଦିର୍ଘଦିନ ଧରି ଫସି ରହିଛି। ପୁଣିଥରେ ସିନ୍ଧୁରତ୍ନ ଭାରତକୁ ଫେରିବା ନେଇ ଯୋଜନା ଆରମ୍ଭ ହୋଇଛି। ଏହି ବୁଡ଼ାଜାହାଜକୁ ଫେବୃୟାରୀରେ ଟ୍ରାନ୍ସପୋର୍ଟ ଶିପ୍ରେ ମୁମ୍ବାଇ ବନ୍ଦର ଦେଇ ଆଣିବାକୁ ଭାରତୀୟ ନୌସେନା ଯୋଜନା ପ୍ରସ୍ତୁତ କରିଛି। ଏଥିପାଇଁ ୩୫ ଦିନ ଲାଗିବ ବୋଲି ସୂଚନା ମିଳିଛି। ୨୦୧୪ ଫେବୃୟାରୀରେ ସିନ୍ଧୁରତ୍ନରେ ଭୟାବହ ଅଗ୍ନିକାଣ୍ଡ ଯୋଗୁ ଏହା କ୍ଷତିଗ୍ରସ୍ତ ହୋଇଥିଲା। ଏଥିରେ ୨ ଅଫିସରଙ୍କ ମୃତ୍ୟୁ ମଧ୍ୟ ଘଟିଥିଲା।