ଇସଲାମାବାଦ,୩୦।୧୨ : ପାକିସ୍ତାନ ତେହେରିକ-ଇ-ଇନସାଫ (ପିଟିଆଇ) ପ୍ରତିଷ୍ଠାତା ତଥା ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ନାମାଙ୍କନପତ୍ର ଖାରଜ କରାଯାଇଛି। ଇମ୍ରାନ ଖାନ ପାକିସ୍ତାନ ପଞ୍ଜାବର ରାଜଧାନୀ ଲାହୋର ଏବଂ ତାଙ୍କ ଘର ଟାଉନ ମିଆନୱାଲିରୁ ଜାତୀୟ ସଭା ପାଇଁ ନାମାଙ୍କନ ଦାଖଲ କରିଥିଲେ। ପ୍ରାଦେଶିକ ନିର୍ବାଚନ ଆୟୋଗ କହିଛନ୍ତି ଇମ୍ରାନ ଖାନଙ୍କୁ ନିର୍ବାଚନରେ ଭାଗ ନେବାକୁ ଅଯୋଗ୍ୟ କରାଯାଇଛି। ଇମ୍ରାନଙ୍କ ବ୍ୟତୀତ ପିଟିଆଇ ଉପସଭାପତି ତଥା ପୂର୍ବତନ ବୈଦେଶିକ ମନ୍ତ୍ରୀ ଶାହ ମେହମୁଦ କୁରେଶୀ, ତାଙ୍କ ଦଳର ଅନ୍ୟ ବରିଷ୍ଠ ନେତା ଆଜମ ସ୍ବାତୀ ଏବଂ ଜୁଲଫି ବୁଖାରୀଙ୍କ ନାମାଙ୍କନ ପତ୍ର ମଧ୍ୟ ଖାରଜ କରାଯାଇଛି। ଫେବୃଆରୀ ୮ ରେ ହେବାକୁ ଥିବା ନିର୍ବାଚନ ପୂର୍ବରୁ ଇମ୍ରାନ ଖାନ ଲାହୋରର ଏନଏ-୧୨୨ ଏବଂ ମିଆନୱାଲିର ଏନଏ-୮୯ ନିର୍ବାଚନମଣ୍ଡଳୀରୁ ତାଙ୍କ ନାମାଙ୍କନପତ୍ର ଦାଖଲ କରିଥିଲେ। ବଡ କଥା ହେଉଛି ଲାହୋରରେ ଏନଏ-୧୩୦ ପାଇଁ ପାକିସ୍ତାନ ମୁସଲିମ ଲିଗ-ନୱାଜ (ପିଏମଏଲ-ଏନ) ସୁପ୍ରିମୋ ନୱାଜ ସରିଫଙ୍କ ନାମାଙ୍କନ ଗ୍ରହଣ କରାଯାଇଛି। ଇମ୍ରାନଙ୍କ ଲୋକପ୍ରିୟତା ଭୟରେ ଏଭଳି ଯୋଜନାବଦ୍ଧ କୂଟନୀତି କରାଯାଇଥିବା ରାଜନୈତିକ ମହଲରେ ଚର୍ଚ୍ଚା ହେଉଛି।
ଇମ୍ରାନ ଖାନଙ୍କ ପାର୍ଟି ପିଟିଆଇ ପାଇଁ ଏହା ଏକ ବଡ ଝଟକା ବୋଲି ବିବେଚନା କରାଯାଉଛି। ପିଟିଆଇର ବହୁ ବରିଷ୍ଠ ନେତା ବର୍ତ୍ତମାନ ଜେଲରେ ଅଛନ୍ତି ଏବଂ ବିଭିନ୍ନ ମାମଲାରେ ଅଭିଯୁକ୍ତ ଅଛନ୍ତି। ପାକିସ୍ତାନୀ ସେନାକୁ ଟାର୍ଗେଟ କରାଯାଇ ମେ ୯ ରେ ପିଟିଆଇ ନେତାମାନେ ମଧ୍ୟ ଦଙ୍ଗା କରିଥିବା ଅଭିଯୋଗ ହୋଇଛି। ଏହି ପରିପ୍ରେକ୍ଷୀରେ ପିଟିଆଇ ଉପସଭାପତି ଶାହା ମହମୁଦ କୁରେଶିଙ୍କ ସମେତ ବହୁ ବଡ ନେତା ଜେଲରେ ଅଛନ୍ତି। ଏନଏ-୧୨୨ ନିର୍ବାଚନମଣ୍ଡଳୀର ନାମାଙ୍କନପତ୍ର ଯାଞ୍ଚ କରିବା ପାଇଁ ନିଯୁକ୍ତ ରିଟର୍ଣ୍ଣିଂ ଅଫିସର (ଆରଓ) କହିଛନ୍ତି ପିଟିଆଇ ପ୍ରତିଷ୍ଠାତା ଦୋଷୀ ସାବ୍ୟସ୍ତ ହୋଇଛନ୍ତି।
ପିଏମଏଲ-ଏନ ନେତା ମିଆଁ ନାସିର ଇମ୍ରାନ ଖାନଙ୍କ ନାମାଙ୍କନ ବିରୋଧରେ ଆପତ୍ତି ଉଠାଇଥିଲେ। ଏହି ଆପତ୍ତି ମଧ୍ୟରେ ତୋଶଖାନା ମାମଲାରେ ଇମ୍ରାନ ଖାନଙ୍କ ପାଞ୍ଚ ବର୍ଷର ଅଯୋଗ୍ୟତା ବିଷୟରେ ଉଲ୍ଲେଖ କରାଯାଇଥିଲା। ଏହି ମାମଲାରେ, ନିର୍ବାଚନ ଆୟୋଗ, ୨୦୧୭ର ଧାରା ୧୬୭ ଅନୁଯାୟୀ ଭ୍ରଷ୍ଟାଚାର ଅଭିଯୋଗରେ ତାଙ୍କୁ ଦୋଷୀ ସାବ୍ୟସ୍ତ କରାଯାଇଛି। ଆପତ୍ତିଜରେ ସେ କହିଛନ୍ତି, ପିଟିଆଇ ପ୍ରତିଷ୍ଠାତାଙ୍କର ପ୍ରସ୍ତାବକ ଏବଂ ଅନୁମୋଦକ ଏନଏ-୧୨୨ର ନୁହନ୍ତି।
ଏନଏ-୮୯ ମିଆନୱାଲୀଙ୍କ ଠାରୁ ଆପତ୍ତି ଉଠାଇଥିବା ନେତା କହିଛନ୍ତି ତୋଶଖାନା ମାମଲାରେ ଇମ୍ରାନ ଖାନ ଦୋଷୀ ସାବ୍ୟସ୍ତ ହୋଇଛନ୍ତି। ଏହା ବ୍ୟତୀତ ବିରୋଧୀଦଳ ନେତା ଇମ୍ରାନ ଖାନଙ୍କୁ ଜଣେ ବେଆଇନ ଝିଇ ଥିବା ଏବଂ ସାମାଜିକ ସୁରକ୍ଷା ପାଣ୍ଠିକୁ ୩.୬ ମିଲିୟନ ଟଙ୍କା ଠକେଇ କରିଥିବା ଅଭିଯୋଗ ସେ କରିଛନ୍ତି। ଗତ ନିର୍ବାଚନରେ ଇମ୍ରାନ ଖାନ ଏହି ଆସନରୁ ଜିତିଥିଲେ। ଏହି ଆପତ୍ତି ସହ ସହମତ ହୋଇ ରିଟର୍ଣ୍ଣିଂ ଅଫିସର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ନାମାଙ୍କନପତ୍ରକୁ ଖାରଜ କରିଛନ୍ତି।
ପାକିସ୍ତାନର ନିର୍ବାଚନ ଆୟୋଗ ମୁଲତାନର ଏନଏ-୧୫୦, ଏନଏ-ବ୫୧, ପିପି-୨୧୮ ଏବଂ ତରପରକର ଏନଏ-୨୧୪ ରୁ ପିଟିଆଇ ଉପାଧ୍ୟକ୍ଷ ଶାହ ମେହମୁଦ କୁରେଶୀଙ୍କ ନାମାଙ୍କନପତ୍ରକୁ ଖାରଜ କରିଛନ୍ତି। ଏହି ସମୟରେ, ପୂର୍ବତନ କେନ୍ଦ୍ର ମନ୍ତ୍ରୀ ତଥା ପିଟିଆଇ ନେତା ହାମଦ ଅଜହରଙ୍କ ନାମାଙ୍କନ ପତ୍ର ପିପି-୧୭୨ ଖାରଜ କରାଯାଇଛି। ତଥାପି, ପିଟିଆଇ ପ୍ରତିଷ୍ଠାତା ଏବଂ ତାଙ୍କ ସହଯୋଗୀମାନଙ୍କ ପାଇଁ ସବୁକିଛି ଶେଷ ହୋଇ ନାହିଁ କାରଣ ସେମାନେ ଜାନୁଆରୀ ୩ ପର୍ଯ୍ୟନ୍ତ ସେମାନଙ୍କର ନାମାଙ୍କନ ପତ୍ର ଖାରଜ ନେଇ ଅପିଲ କରିପାରିବେ, ଯେଉଁଥିରେ ଜାନୁଆରୀ ୧୦ ସୁଦ୍ଧା ଅପିଲ ଟ୍ରିବ୍ୟୁନାଲ ନିଷ୍ପତ୍ତି ନେବେ। ନିର୍ବାଚନ ସଂସ୍ଥା ଜାନୁଆରୀ ୧୧ ରେ ସଂଶୋଧିତ ତାଲିକା ପ୍ରକାଶ କରିବେ।