ଇସଲାମାବାଦ,୧୧ା୪: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ନଓ୍ବାଜ ଶରିଫ୍ ଇଦ୍ ପରେ ଆସନ୍ତା ମାସରେ ପାକିସ୍ତାନକୁ ଫେରିପାରନ୍ତି। ଏହି ସୂଚନା ପିଏମ୍ଏଲ୍-ଏନ୍ର ଜଣେ ବରିଷ୍ଠ ନେତା ପ୍ରଦାନ କରିଛନ୍ତି। ଆଜିକାଲି ପାକିସ୍ତାନରେ ଇମ୍ରାନ ଖାନଙ୍କୁ ନେଇ ଅନେକ ରାଜନୈତିକ ଆନ୍ଦୋଳନ ଚାଲିଛି। ଏହି ସମୟରେ ମିଆଁ ଜାଭେଦ ଲତିଫ କହିଛନ୍ତି, ପିଏମଏଲ-ଏନ୍ ସୁପ୍ରିମୋ ତଥା ୩ଥର ପ୍ରଧାନମନ୍ତ୍ରୀ ହୋଇଥିବା ଶରିଫ୍ଙ୍କ ଆଶା କରାଯାଉଥିବା ପ୍ରତ୍ୟାବର୍ତ୍ତନ ପ୍ରସଙ୍ଗରେ ମିଳିତ ଦଳ ସହ ଆଲୋଚନା ହେବ। ମେ’ ମାସର ପ୍ରଥମ ସପ୍ତାହରେ ଇଦ୍ ପାଳନ କରାଯିବ। ଏହି ଦିନ ଶରିଫ୍ ପାକିସ୍ତାନ ଫେରିବେ।
ପୂର୍ବତନ ପ୍ରଧାନମନ୍ତ୍ରୀ ଇମ୍ରାନଙ୍କ ସରକାର ୭୨ ବର୍ଷୀୟ ପିଏମ୍ଏଲ୍-ଏନ୍ର ସୁପ୍ରିମୋ ନଓ୍ବାଜ ଶରିଫ୍ଙ୍କ ବିରୋଧରେ ଅନେକ ଦୁର୍ନୀତି ମାମଲା ରୁଜୁ କରିଛନ୍ତି। ପାନାମା ପେପର୍ସ ମାମଲାରେ ଶରିଫ୍ଙ୍କୁ ଜୁଲାଇ ୨୦୧୭ରେ ବହିଷ୍କାର କରାଯାଇଥିଲା। ଲାହୋର ହାଇକୋର୍ଟ ତାଙ୍କୁ ବିଦେଶରେ ଚିକିତ୍ସା ପାଇଁ ଅନୁମତି ଦେବା ପରେ ସେ ଚାରି ସପ୍ତାହ ବିଦେଶ ଯାଇଥିଲେ। ଅଲ୍ ଅଜିଜିଆ ମିଲ୍ସ ଦୁର୍ନୀତି ମାମଲାରେ ମଧ୍ୟ ଶରିଫ୍ଙ୍କୁ ଜାମିନ ପ୍ରଦାନ କରାଯାଇଥିଲା। ଏହି ମାମଲାରେ ସେ ଲାହୋରର କୋଟ ଲଖପାଟ ଜେଲରେ ୭ ବର୍ଷ କାରାଦଣ୍ଡ ଭୋଗୁଥିଲେ। ଦେଶର ରାଜନୈତିକ ଅସ୍ଥିରତା ବିଷୟରେ ଲତିଫ କହିଛନ୍ତି, ମିଳିତ ସରକାର ୬ ମାସରୁ ଅଧିକ ସମୟ ଧରି ରହିବେ ନାହିଁ ଏବଂ ଏହାର ଏକମାତ୍ର ସମାଧାନ ହେଉଛି ନୂତନ ନିର୍ବାଚନ।
