ଇସଲାମାବାଦ,୧୭।୪ : ନୱାଜ ସରିଫଙ୍କ ପାକିସ୍ତାନକୁ ଫେରିବା ନେଇ ପାକିସ୍ତାନର ଗୃହମନ୍ତ୍ରୀ ରାଣା ସନାଉଲ୍ଲା ଏକ ବଡ଼ ବିବୃତ୍ତି ଦେଇଛନ୍ତି। ସେ କହିଛନ୍ତି ଦେଶରେ ସାଧାରଣ ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ ହେବା ମାତ୍ରେ ପାକିସ୍ତାନ ମୁସଲିମ ଲିଗ-ନୱାଜ (ପିଏମଏଲ-ଏନ) ମୁଖ୍ୟ ନୱାଜ ସରିଫ ଲଣ୍ଡନରୁ ସ୍ବଦେଶ ଫେରିବେ।
ପାକିସ୍ତାନୀ ଚ୍ୟାନେଲକୁ ଦିଆଯାଇଥିବା ଏକ ସାକ୍ଷାତକାରରେ ସନାଉଲ୍ଲା କହିଛନ୍ତି ପାକିସ୍ତାନରେ ହେବାକୁ ଥିବା ସାଧାରଣ ନିର୍ବାଚନ ପାଇଁ ନୱାଜ ସରିଫ ପିଏମଏଲ-ଏନ ପ୍ରସ୍ତୁତିର ନେତୃତ୍ୱ ନେବେ। ସୁପ୍ରିମକୋର୍ଟଙ୍କ ନିର୍ଦ୍ଦେଶ ତଥା ଇମ୍ରାନ ଖାନଙ୍କ ପାକିସ୍ତାନ ତେହେରିକ-ଇ-ଇନସାଫ (ପିଟିଆଇ) ର ପ୍ରୟାସ ସତ୍ତ୍ୱେ ମେ ୧୪ରେ ଗୁରୁତ୍ୱପୂର୍ଣ୍ଣ ପଞ୍ଜାବ ପ୍ରଦେଶରେ ନିର୍ବାଚନ ଅନୁଷ୍ଠିତ ହେବ ନାହିଁ ବୋଲି ସେ ସ୍ପଷ୍ଟ କରିଛନ୍ତି।
ଉଲ୍ଲେଖନୀୟ ଯେ, ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫ ନଭେମ୍ବର ୨୦୧୯ ରେ ଲଣ୍ଡନ ଯାଇଥିଲେ। ଯେତେବେଳେ ନୱାଜ ଲଣ୍ଡନ ଯାଇଥିଲେ, ସେତେବେଳେ ସେ ଏକ ଦୁର୍ନୀତି ମାମଲାରେ ଦୋଷୀ ସାବ୍ୟସ୍ତ ହୋଇଥିଲେ ଏବଂ ଲାହୋରର କୋଟ ଲଖପାଟ ଜେଲରେ ସାତ ବର୍ଷ ଜେଲ ଦଣ୍ଡ ଭୋଗୁଥିଲେ। ତେବେ ଚିକିତ୍ସା କାରଣରୁ ତାଙ୍କୁ ହାଇକୋର୍ଟ ଚାରି ସପ୍ତାହ ପାଇଁ ପାରୋଲ ପ୍ରଦାନ କରିଥିଲେ। ଏହି ସମୟରେ ନୱାଜ ଲଣ୍ଡନ ପଳାଇଥିଲେ ଏବଂ ସେବେଠାରୁ ସେ ପାକିସ୍ତାନ ଫେରିନାହାଁନ୍ତି।