ମୁମ୍ବାଇ,୨୧ ।୧୦: ବଲିଉଡ୍ ଅଭିନେତା ଶାହାରୁଖ ଖାଁଙ୍କ ଅଡୁଆ ବଢି ବଢି ଯାଉଛି । ଗୁରୁବାର ଗୋଟିଏ ପଟେ ସେ ଜେଲ ଯାଇ ପୁଅ ଆର୍ଯ୍ୟନ ଖାଁଙ୍କୁ ଭେଟିଥିବା ବେଳେ ଅନ୍ୟ ପଟେ ଗୁରୁବାର ତାଙ୍କ ଘରେ ଏନ୍ସିବି ଟିମ୍ ପହଞ୍ଚିଥିବା ଖବର ମିଳିଛି । ଏହାସହ ବଲିଉଡ୍ ଅଭିନେତ୍ରୀ ତଥା ଷ୍ଟାର କିଡ୍ ଅନନ୍ୟା ପାଣ୍ଡେଙ୍କ ଘରେ ମଧ୍ୟ ଏନ୍ସିବି ଟିମ୍ ପହଞ୍ଚିଥିବା ସୂଚନା ମିଳିଛି । ସୂଚନାଯୋଗ୍ୟ, ଗୁରୁବାର ଦିନ ପ୍ରାୟ ୧ଟା ବେଳେ ଏନ୍ସିବି ଟିମ୍ ଶାହାରୁଖଙ୍କ ଘର “ମନ୍ନତ”ରେ ପହଞ୍ଚିଥିଲେ । ସେଠାରେ ସେ ଆର୍ଥର ରୋଡ ଜେଲରେ ବନ୍ଦୀ ଥିବା ତାଙ୍କ ପୁଅ ଆର୍ଯ୍ୟନଙ୍କ ବିଷୟରେ ତଥ୍ୟ ମାଗିଥିଲେ । ଶାହାରୁଖଙ୍କ ମ୍ୟାନେଜର ପୂଜାଙ୍କୁ ଏନ୍ସିବି ପକ୍ଷରୁ ଏକ ନୋଟିସ ଦିଆଯାଇଥିଲା । ଯେଉଁଥିରେ ଆର୍ଯ୍ୟନଙ୍କ ଶିକ୍ଷାଗତ ଯୋଗ୍ୟତା ସହ ଅନ୍ୟ କିଛି ତଥ୍ୟ ପରିବାରଠାରୁ ମଗାଯାଇଥିବା ଜଣାପଡିଛି । ଏହାସହ ଏନ୍ସିବି ପକ୍ଷରୁ ଆର୍ଯ୍ୟନଙ୍କ ମେଡିକାଲ ହିଷ୍ଟ୍ରି ଓ ଯଦି କୌଣସି ଔଷଧ ନେଉଥିଲେ ତେବେ ତା’ର ପ୍ରେସକ୍ରିପଶନ ମାଗିଛନ୍ତି । ପୁଣି ବିଦେଶରେ ଯେଉଁଠି ଯେଉଁଠି ଆର୍ଯ୍ୟନ ରହିଛନ୍ତି ସେ ସମ୍ପର୍କରେ ଡକ୍ୟୁମେଣ୍ଟସ୍ ମାଗିଛି ଏନ୍ସିବି । ଏହାସହ ଏନ୍ସିବି ଅଭିନେତ୍ରୀ ଅନନ୍ୟା ପାଣ୍ଡେଙ୍କ ଘରେ ବି ପହଞ୍ଚି ସେଠାରୁ କିଛି ଜିନିଷ ଜବତ କରିଥିବା ସୂଚନା ମିଳିଛି ।