ନୂଆଦିଲ୍ଲୀ, ୧୪ା୪: ଜାତୀୟ ଶିକ୍ଷା ଗବେଷଣା ଓ ପ୍ରଶିକ୍ଷଣ ପରିଷଦ (ଏନ୍ସିଇଆର୍ଟି) ଏକାଦଶ ଶ୍ରେଣୀ ରାଜନୀତି ବିଜ୍ଞାନ ପାଠ୍ୟପୁସ୍ତକରୁ ସ୍ବାଧୀନ ଭାରତର ପ୍ରଥମ ଶିକ୍ଷାମନ୍ତ୍ରୀ ମୌଲାନା ଅବୁଲ କାଲାମ ଆଜାଦଙ୍କ ନାମକୁ ହଟାଇଦେଇଛି। ମହାତ୍ମା ଗାନ୍ଧୀଙ୍କୁ ହତ୍ୟା ଏବଂ ସ୍ବାଧୀନତା ପରେ ତାଙ୍କ କାର୍ଯ୍ୟ ସମ୍ପର୍କିତ ବିଷୟ ପାଠ୍ୟପୁସ୍ତକରୁ ବାଦ୍ ଦେବାକୁ ନେଇ ବିବାଦ ଲାଗିରହିଥିବାବେଳେ ଏବେ ଅବୁଲ କାଲାମଙ୍କ ନାଁ ବାଦ୍ ପଡ଼ିବାକୁ ନେଇ ବିଭିନ୍ନ ମହଲରେ ପ୍ରତିକ୍ରିୟା ପ୍ରକାଶ ପାଇଛି। ଇତିହାସର ପୁନର୍ଲିଖନ ଲାଗି ସମ୍ମିଳିତ ଉଦ୍ୟମ ହେଉଥିବା କଂଗ୍ରେସ ଅଭିଯୋଗ କରିଛି। ପାଠ୍ୟପୁସ୍ତକର ପ୍ରଥମ ଅଧ୍ୟାୟ ‘ସମ୍ବିଧାନ-କାହିଁକି ଓ କିପରି’ରେ ସମ୍ବିଧାନ ସଭା କମିଟିରୁ ମୌଲାନା ଆଜାଦଙ୍କ ନାମକୁ ହଟାଇବା ପାଇଁ ଗୋଟିଏ ଧାଡ଼ିରେ ସଂଶୋଧନ କରାଯାଇଛି। ଜବାହରଲାଲ ନେହେରୁ, ରାଜେନ୍ଦ୍ର ପ୍ରସାଦ, ସର୍ଦ୍ଦାର ପଟେଲ କିମ୍ବା ବି.ଆର୍. ଆମ୍ବେଡ୍କର ଉକ୍ତ କମିଟିଗୁଡ଼ିକରେ ଅଧ୍ୟକ୍ଷତା କରିଥିଲେ ବୋଲି ଉକ୍ତ ସଂଶୋଧିତ ଧାଡ଼ିରେ ରହିଛି। ୧୯୪୬ରେ ଆଜାଦ ସମ୍ବିଧାନ ପ୍ରଣୟନ ଲାଗି ନୂଆ ସମ୍ବିଧାନ ସଭା ନିର୍ବାଚନରେ ମୁଖ୍ୟ ଭୂମିକା ଗ୍ରହଣ କରିଥିଲେ। ବ୍ରିଟିଶ କ୍ୟାବିନେଟ ମିଶନ ସହ ବୁଝାମଣା ପାଇଁ ଗଠିତ ପ୍ରତିନିଧି ଦଳର ସେ ନେତୃତ୍ୱ ନେଇଥିଲେ।
