ମୁମ୍ବାଇ,୨୯।୯: ଏନସିପି ମୁଖ୍ୟ ଶରଦ ପାୱାର ଆଗାମୀ ଦିନରେ ଇଣ୍ଡିଆ ମେଣ୍ଟର ଦଳ ମଧ୍ୟରେ ମତଭେଦ ହେବାର ସମ୍ଭାବନାକୁ ନେଇ ଏକ ବଡ଼ ବୟାନ ଦେଇଛନ୍ତି। ସେ କହିଛନ୍ତି, ଭବିଷ୍ୟତରେ ଇଣ୍ଡିଆ ମେଣ୍ଟରେ କୌଣସି ପ୍ରକାରର ବିବାଦ ନ ହେବ ସେ ପ୍ରତି ସତର୍କତା ଅବଲମ୍ବନ କରାଯିବା ଉଚିତ୍।
କିଛି ମାସ ମଧ୍ୟରେ ରାଜସ୍ଥାନ ଏବଂ ମଧ୍ୟପ୍ରଦେଶରେ ନିର୍ବାଚନ ହେବାକୁ ଯାଉଛି, ତେଣୁ ଇଣ୍ଡିଆ ମେଣ୍ଟ ଦଳ ମଧ୍ୟରେ କୌଣସି ବିବାଦ ନ ହେବା ପାଇଁ ବର୍ତ୍ତମାନଠାରୁ ସତର୍କ ରହିବା ଜରୁରୀ ଅଟେ। ଆସନ୍ତା ବର୍ଷ ହେବାକୁ ଥିବା ଲୋକ ସଭା ନିର୍ବାଚନରେ ମୋଦି ସରକାରଙ୍କୁ ପରାସ୍ତ କରିବାକୁ ଦୁଇରୁ ଅଧିକ ବିରୋଧୀ ଦଳ ଇଣ୍ଡିଆ ମେଣ୍ଟରେ ଯୋଗ ଦେଇଛନ୍ତି। ପଶ୍ଚିମବଙ୍ଗରେ କଂଗ୍ରେସ କିଛି ଆସନ ଦାବି କରିବା ପରେ ସୃଷ୍ଟି ହୋଇଥିବା ମତଭେଦ ବିଷୟରେ ପଚରାଯିବାରୁ ଶରଦ ପାୱାର କହିଛନ୍ତି, ଯେତେବେଳେ ନିର୍ବାଚନ ପାଖେଇ ଆସେ, ସେତେବେଳେ ମତଭେଦର ସମ୍ଭାବନାକୁ ଏଡ଼ାଇ ଦିଆଯାଇପାରିବ ନାହିଁ। ଆମେ ମେଣ୍ଟରେ ନିରପେକ୍ଷ ନେତାମାନଙ୍କୁ ପଠାଇ ଏହି ସମସ୍ୟାର ସମାଧାନ କରିବୁ। ଏନସିପି ମୁଖ୍ୟ ଆହୁରି କହିଛନ୍ତ, କିଛି ମାସ ମଧ୍ୟରେ ୫ ରାଜ୍ୟରେ ନିର୍ବାଚନ ହେବାକୁ ଯାଉଛି, ଯାହା ତାଙ୍କ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ।