ଲକ୍ଷ୍ନୌ,୨୭ ।୭: ଉତ୍ତର ପ୍ରଦେଶରେ ୨୦୨୨ରେ ହେବାକୁ ଥିବା ବିଧାନସଭା ନିର୍ବାଚନ ପାଇଁ ଏବେଠାରୁ ପ୍ରସ୍ତୁତି ଆରମ୍ଭ ହୋଇ ଗଲାଣି । ଏଠାରେ ଏବେ ଭାରତୀୟ ଜନତା ପାର୍ଟି(ଭାଜପା) ଶାସନ କ୍ଷମତାରେ ଥିବା ବେଳେ ଆସନ୍ତା ନିର୍ବାଚନରେ ଅନ୍ୟ ଦଳମାନେ ନିଜର ସ୍ଥିତିକୁ ସୁଦୃଢ କରିବାକୁ ଏବେଠାରୁ ପ୍ରୟାସ ଆରମ୍ଭ କରି ସାରିଲେଣି । ମିଳିଥିବା ସୂଚନାରୁ ଜଣାପଡିଛି କି ଉତ୍ତର ପ୍ରଦେଶର ୨୦୨୨ ନିର୍ବାଚନରେ ନ୍ୟାଶନାଲ କଂଗ୍ରେସ ପାର୍ଟି(ଏନ୍ସିପି) ସମାଜବାଦୀ ପାର୍ଟି(ଏସ୍ପି ) ସହ ମେଣ୍ଟ କରିପାରେ । ମଙ୍ଗବାର ଲକ୍ଷ୍ନୌରେ ଏକ ଖବରଦାତା ସମ୍ମିଳନୀରେ ଏନ୍ସିପି ମହାସଚିବ କେକେ ଶର୍ମା ଓ ପ୍ରଦଶ ଅଧ୍ୟକ୍ଷ ଉମାଶଙ୍କର ଯାଦବ ଏହି ସୂଚନା ଦେଇଛନ୍ତି । କେକେ ଶର୍ମା କହିଛନ୍ତି ଉତ୍ତର ପ୍ରଦେଶରେ ସ୍ଥିତି ବହୁତ ଖରାପ ଅଛି । ଏହାକୁ ସୁଧାରିବାକୁ ପଡିବ । ତେଣୁ ଆମେ ସମାଜବାଦୀ ପାର୍ଟି ସହ ମିଶି ୨୦୨୨ ବିଧାନସଭା ନିର୍ବାଚନ ଲଢିବୁ । ଏହାକୁ ନେଇ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବଙ୍କ ସହ କଥା ହୋଇ ସାରିଛି ଏବେ କେବଳ ଆସନ ଭାଗବଣ୍ଟାକୁ ଅପେକ୍ଷା । ଦଳ ମୁଖ୍ୟ ଶରଦ ପାୱାର କହିଛନ୍ତି , ଉତ୍ତର ପ୍ରଦେଶରେ ଯୁବକ ଓ କୃଷକ ଏବେ ସେମାନଙ୍କ ସ୍ୱର ଉଠାଇବାର ସମୟ ଆସିଯାଇଛି କାରଣ ଭାଜପା ସରକାର ଲୋକତନ୍ତ୍ର ପାଇଁ ବିପଦ ସୃଷ୍ଟି କରୁଛି ।