ଚେଞ୍ଚୁରିଆନ,୩୧।୧୨: ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜ୍ ଲାଗି ଲୋକେଶ ରାହୁଲଙ୍କୁ ଅଧିନାୟକ ଘୋଷଣା କରାଯାଇଛି। ଆହତ ସମସ୍ୟା କାରଣରୁ ଟେଷ୍ଟ ସିରିଜ୍ ପାଇଁ ଉପଲବ୍ଧ ନ ଥିବା ଅଧିନାୟକ ରୋହିତ ଶର୍ମା ଦଳରୁ ବାଦ୍ ପଡ଼ିଛନ୍ତି। ତେବେ ରାହୁଲଙ୍କୁ ଉପଅଧିନାୟକ ଭାବେ ସହାୟତା କରିବେ ଯଶପ୍ରୀତ ବୁମରା। ଭାରତୀୟ ପେସର ତାଙ୍କ କ୍ରିକେଟ କ୍ୟାରିୟରରେ ପ୍ରଥମ ଥର ପାଇଁ ଏଭଳି ବଡ଼ ଦାୟିତ୍ୱ ପାଇଛନ୍ତି।
ସୁବୁଠୁ ବଡ଼ କଥା ହେଲା, ଦଳକୁ ବରିଷ୍ଠ ଓପନର ଶିଖର ଧାଓ୍ବନ ପ୍ରତ୍ୟାବର୍ତ୍ତନ କରିଛନ୍ତି। ନିକଟରେ ଶେଷ ହୋଇଥିବା ବିଜୟ ହଜାରେ ଟ୍ରଫି ଚମତ୍କାର ପ୍ରଦର୍ଶନ କରିଥିବା ରୁତୁରାଜ ଗାଏକ୍ୱାଡ ଓ ଭେଙ୍କଟଶ ଆୟାରଙ୍କୁ ମଧ୍ୟ ଦଳରେ ସ୍ଥାନ ମିଳିଛି।
ଚଳିତ ମାସରେ ବିରାଟ କୋହଲିଙ୍କ ସ୍ଥାନରେ ରୋହିତଙ୍କୁ ଉଭୟ ଦିନିକିଆ ଓ ଟି୨୦ ଦଳର ନେତୃତ୍ୱ ଭାର ଦିଆଯାଇଥିଲା। କିନ୍ତୁ ଟେଷ୍ଟ ସିରିଜ୍ ପୂର୍ବରୁ ଟ୍ରେନିଂ ସେସନରେ ତାଙ୍କ ମାଂସପେଶୀ ଟାଣି ହୋଇଥିଲା। ଏହି ସମସ୍ୟା ସହ ସେ ଏବେ ବି ସଂଘର୍ଷ କରୁଛନ୍ତି। ତାଙ୍କ ଭଳି ଫିଟ୍ନେସ ଅଭାବରୁ ରବୀନ୍ଦ୍ର ଜାଡେଜା ଓ ଅକ୍ଷର ପଟେଲ ଦଳରେ ସ୍ଥାନ ପାଇ ନାହାନ୍ତି। ପେସର ମହମ୍ମଦ ଶାମିଙ୍କୁ ସିରିଜ୍ରୁ ବିଶ୍ରାମ ଦିଆଯାଇଛି। ଜାନୁୟାରୀ ୧୯ ତାରିଖରୁ ୩ ମ୍ୟାଚ୍ ବିଶିଷ୍ଟ ସିରିଜ୍ ଆରମ୍ଭ ହେବ।
ଦିନିକିଆ ଦଳ: ଲୋକେଶ ରାହୁଲ(ଅଧିନାୟକ), ଶିଖର ଧାଓ୍ବନ, ରୁତୁରାଜ ଗାଏକ୍ୱାଡ, ବିରାଟ କୋହଲି, ଶ୍ରେୟାସ ଆୟାର, ସୂର୍ଯ୍ୟ କୁମାର ଯାଦବ, ଭେଙ୍କଟଶ ଆୟାର, ରିଷଭ ପନ୍ତ, ଇଶାନ କିଷନ (ଉଇକେଟକିପର), ରବିଚନ୍ଦ୍ରନ ଅଶ୍ୱିନ, ୟୁଜବେନ୍ଦ୍ର ଚହଲ, ଓ୍ବାଶିଂଟନ ସୁନ୍ଦର, ଯଶପ୍ରୀତ ବୁମରା (ଉଅଧିନାୟକ), ଭୁବନେଶ୍ୱର କୁମାର, ଦୀପକ ଚହର, ପ୍ରସିଦ୍ଧ କ୍ରିଷ୍ଣା, ଶାର୍ଦ୍ଦୁଳ ଠାକୁର ଓ ମହମ୍ମଦ ସିରାଜ।