ଭୁବନେଶ୍ୱର,୭।୩(ବ୍ୟୁରୋ):ନେ ନେ ନେ… ରଙ୍ଗ ଟିକେ ଦେଲି.., ଓ୍ବାନ୍ସ ଇନ୍ ଇୟର ଏଗେନ୍ ଆନାଦର୍ ହୋଲି…। ବର୍ଷକ ପରେ ପୁଣି ଆସିଛି ରଙ୍ଗର ପର୍ବ ହୋଲି। ପରସ୍ପରକୁ ରଙ୍ଗ ବୋଳି ଦେହ, ମନ, ପରିବେଶକୁ ରଙ୍ଗିନ କରିବା ପାଇଁ ଆସିଛି ମଉକା। ସମସ୍ତେ ପରସ୍ପରକୁ ରଙ୍ଗ ବୋଳି ଅଭିନନ୍ଦନ ଜଣାଇବା ସହ ମନରୁ ରାଗରୁଷା ଦୂର କରିଥାନ୍ତି। ସାଙ୍ଗସାଥୀ, ଚିହ୍ନା ଅଚିହ୍ନା କାହାକୁ ବାରଣ ନାହିଁ। ସେଥିପାଇଁ ତ କଥାରେ ଅଛି ‘ବୁରା ନା ମାନୋ ହୋଲି ହୈ’। ଓଡ଼ିଆଙ୍କ ଅନ୍ୟତମ ପ୍ରମୁଖ ଗଣପର୍ବ ହେଉଛି ହୋଲି। ଏଥିପାଇଁ ଦୋଳପୂର୍ଣ୍ଣିମାଠାରୁ ଆରମ୍ଭ ହୋଇଯାଏ ପ୍ରସ୍ତୁତି। ଗାଁଠାରୁ ସହର ସବୁଠି ରଙ୍ଗମୟ ହୋଇଉଠେ ପରିବେଶ। ଏହି କ୍ରମରେ ରାଜଧାନୀ ଭୁବନେଶ୍ୱରରେ ମଧ୍ୟ ହୋଲିକୁ ନେଇ ଉତ୍ସାହ ଦେଖିବାକୁ ମିଳିଛି। ସହରସାରା ଫଗୁ ରଙ୍ଗ, ପିଚକାରି, ମୁଖା, ରଙ୍ଗ ବେଲୁନ ଆଦିର ପସରା ମେଲିଛି। ଦୋଳ ପୂର୍ଣ୍ଣିମାର ପାରମ୍ପରିକ ଭୋଗ ଚଣା, ସାକର ଲୋକମାନେ କିଣି ନେଉଛନ୍ତି। ବିଭିନ୍ନ ଗ୍ରାମ୍ୟ କମିଟି ପକ୍ଷରୁ ଦୋଳମେଳଣ ଆୟୋଜନ ହେଉଥିବାବେଳେ ଫଗୁ ଖେଳରେ ପରିବେଶ ରଙ୍ଗିନ ହେବାରେ ଲାଗିଛି। ଦୋଳ ଓ ହୋଲି ୨ଦିନ ଶିକ୍ଷାନୁଷ୍ଠାନ ଓ ବିଭିନ୍ନ କାର୍ଯ୍ୟାଳୟ ଛୁଟି ରହୁଥିବାରୁ ହୋଲି ପର୍ବର ଦିନକ ପୂର୍ବରୁ ରଙ୍ଗ ଖେଳରେ ଯୁବପିଢ଼ି ମସଗୁଲ। ବିଭିନ୍ନ ସାମାଜିକ ଅନୁଷ୍ଠାନ ପକ୍ଷରୁ ମଧ୍ୟ ସାମୂହିକ ରଙ୍ଗ ଖେଳର ଆୟୋଜନ କରାଯାଇଛି। ସମସ୍ତେ ପରସ୍ପରକୁ ହୋଲିର ଶୁଭେଚ୍ଛା ଜଣାଉଛନ୍ତି।
ଓଡ଼ିଶାରେ ହୋଲି ପାଳିବେ ତେଜସ୍ବୀ
ହୋଲି ସେଲିବ୍ରେସନ ପାଇଁ ବିଗ୍ ବସ୍- ୧୫ ବିଜେତା ତେଜସ୍ବୀ ପ୍ରକାଶ ସୋମବାର ଓଡ଼ିଶାରେ ପହଞ୍ଚତ୍ଛନ୍ତି। ପୁରୀ କୋଣାର୍କ ମେରାଇନ ଡ୍ରାଇଭରେ ଥିବା ବାଇକ ସ୍ପ୍ଲାସ ଓ୍ବାଟର ପାର୍କରେ ଆୟୋଜିତ ହେବାକୁ ଥିବା ହୋଲି ସେଲିବ୍ରେଶନ କାର୍ଯ୍ୟକ୍ରମରେ ସେ ଯୋଗଦେବେ। ଏହି କାର୍ଯ୍ୟକ୍ରମ ୨ଦିନ ଧରି ଚାଲିବ। ତେଜସ୍ବୀଙ୍କ ବ୍ୟତୀତ ଏଲ୍ଏସ୍ଡି ଗର୍ଲସ ବ୍ୟାଣ୍ଡ ଅନ୍ୟତମ ଆକର୍ଷଣ ରହିବ। ସେହିପରି ଓଲିଉଡ୍ କଳାକାର ପ୍ରିୟା ଚୌଧୁରୀ, ସୁପ୍ରିୟା ନାୟକ, ସସ୍ମିତା ପଣ୍ଡା, ମନସ୍ବିନୀ, କୁକିଜ୍, ଗୁଡୁ, ଅଭିଜିତ୍ ଦାଶ ଓ ଅନ୍ୟମାନେ ମଧ୍ୟ ସାମିଲ ହେବେ। ‘ଗ୍ଲାମର୍ ୭୭’ର ସଞ୍ଜୟ ମହାକୁଡ଼୍, ହେଲ୍ପ ହ୍ୟାଣ୍ଡସ୍ ଫାଉଣ୍ଡେଶନର ରୁଦ୍ର ନାରାୟଣ ବେହେରା ଓ ମିଡିଆ ପ୍ଲାନର୍ର ପ୍ରଣୟ ଜେଠୀ ଏହି କାର୍ଯ୍ୟକ୍ରମର ଆୟୋଜନ କରୁଛନ୍ତି।
