ନୂଆଦିଲ୍ଲୀ,୬ ।୨: କେନ୍ଦ୍ର ସ୍ୱାସ୍ଥ ମନ୍ତ୍ରୀ ହର୍ଷବର୍ଦ୍ଧନ ଶୁକ୍ରବାର ଲୋକ ସଭାରେ କହିଥିଲେ କି ସାଧାରଣ ବଜେଟରେ କରୋନା ଟିକାକରଣ ପାଇଁ ୩୫ ହଜାର କୋଟି ଟଙ୍କା ଆବଣ୍ଟନ କରାଯାଇଛି । ଯଦି ଆବଶ୍ୟକ ପଡେ ତେବେ ଏଥିପାଇଁ ଆହୁରି ଅଧିକ ଅର୍ଥ ଯୋଗାଇ ଦିଆଯିବ । ସେ ଆହୁରି ମଧ୍ୟ କହିଥିଲେ କି ଏବେ ପର୍ଯ୍ୟନ୍ତ ୨୨ଟି ଦେଶ ଭାରତରୁ କୋଭିଡ ଭ୍ୟାକ୍ସିନ ନେବାକୁ କହିଛନ୍ତି । ଏଥିମଧ୍ୟରୁ ୧୫ ଦେଶକୁ କିଛି କିଛି ଭ୍ୟାକ୍ସିନ ପଠାଇ ଦିଆଯାଇଛି । ଏହାସହ ଦେଶରେ ଏବେ ପର୍ଯ୍ୟନ୍ତ ପାଖାପାଖି ୫୨ ଲକ୍ଷ ଲୋକଙ୍କୁ କରୋନା ଟିକା ଦିଆ ସରିଲାଣି । ପ୍ରଥମ ପର୍ଯ୍ୟାୟରେ ସ୍ୱାସ୍ଥ୍ୟକର୍ମୀଙ୍କୁ ଏହା ମିଳିଛି । ତେବେ ୫୦ ବର୍ଷରୁ ଅଧିକ ବୟସର ବ୍ୟକ୍ତିଙ୍କୁ ମାର୍ଚ୍ଚ ସୁଦ୍ଧା ଟିକା ମିଳିଯିବ ବୋଲି କହିଛନ୍ତି ସ୍ୱାସ୍ଥ୍ୟମନ୍ତ୍ରୀ । ତେବେ ମାର୍ଚ୍ଚ ଦ୍ୱିତୀୟ କିମ୍ବା ତୃତୀୟ ସପ୍ତାହରେ ଏହି କାର୍ଯ୍ୟ ଆରମ୍ଭ ହୋଇପାରେ । ଏବେ ପ୍ରାୟ ୭ଟି କୋଭିଡ ଭ୍ୟାକ୍ସିନ ଉପରେ କାମ ଚାଲିଛି । ଏଥିମଧ୍ୟରୁ ୩ଟି ଟିକା କ୍ଲିନିକାଲ ଟ୍ରାଏଲର ତୃତୀୟ ପର୍ଯ୍ୟାୟରେ ରହିଛନ୍ତି । ଆଉ ଦୁଇଟି ଦ୍ୱିିତୀୟ ଓ ତୃତୀୟ ପର୍ଯ୍ୟାୟରେ ରହିଛନ୍ତି । ଅନ୍ୟପଟେ ଟିକାକରଣକୁ ନେଇ ସ୍ୱାସ୍ଥ୍ୟମନ୍ତ୍ରୀ କହିଥିଲେ କି ପ୍ରଥମ ର୍ପ୍ୟାୟରେ ପ୍ରାୟ ୧ କୋଟି ସ୍ୱାସ୍ଥ୍ୟକର୍ମୀଙ୍କୁ ଟିକା ଦେବାକୁ ଲକ୍ଷ୍ୟ ରଖାଯାଇଛି ।