କେନ୍ଦ୍ରାପଡ଼ା ଅଫିସ,୨୨ା୩:ମୃତ୍ୟୁ କାହା ପାଖକୁ କେତେବେଳେ ଆସେ ସେ କଥା କହିବା ଅସମ୍ଭବ। ରଥୀ ମହାରଥୀ ହୁଅନ୍ତୁ କି ସାଧାରଣ ମଣିଷ, ସବୁ କାଳ ହାତରେ ବନ୍ଧା। ଏପରି କି ମୃତ୍ୟୁ ପାଖରେ ନାନା କୌଶଳ ଓ ଅଭିଜ୍ଞତା ବି ହାରମାନେ ା କେହି ବି ଜଣେ ମୃତ୍ୟୁକୁ ଟପି ଆଗକୁ ଯାଇପାରେ ନାହିଁ ା ରବିବାର ସେମିତି ଏକ ଘଟଣା କେନ୍ଦ୍ରାପଡ଼ା ସହରରେ ଚର୍ଚ୍ଚାର ବିଷୟ ହୋଇଛି।
ସାପ ଧରିବା ଓ ସେହି ସାପକୁ ନେଇ ନିକାଞ୍ଚନ ସ୍ଥାନରେ ଛାଡ଼ିବା କେନ୍ଦ୍ରାପଡ଼ା ସହରର ୭ ନଂ. ୱାର୍ଡ ରସୁଲାବାଦ ଗ୍ରାମର ସୋଲେମାନ ଖାନ (୭୫)ଙ୍କ ବାମହାତର ଖେଳ ଥିଲା ା ଆଜି କି କାଲି ନୁହେଁ, ପ୍ରାୟ ୫୦ ବର୍ଷ ଧରି ସେ ଏମିତି ସାପ ଓ ଗୋଧୀ ଧରୁଥିଲେ ା ଆଖପାଖ ଗାଁରେ ଯଦି କାହା ଘରେ ସାପ କି ଗୋଧୀ ପଶିଯାଉଥିଲା ଲୋକେ ପ୍ରଥମେ ସୋଲେମାନଙ୍କୁ ଖୋଜୁ ଥିଲେ ା କିଏ କିଏ ତାଙ୍କ ଘରକୁ ଆସି ଗାଡ଼ିରେ ବସାଇ ଘଟଣାସ୍ଥଳକୁ ନେଇ ଯାଉଥିଲେ। ସୋଲେମାନ ବି କେବେ କାହାକୁ ମନା କରୁ ନ ଥିଲେ ା ଖୁବ୍ ଆଗ୍ରହ ଓ ପାରମ୍ପରିକ କୌଶଳରେ ସେ ବଡ଼ ବଡ଼ ବିଷାକ୍ତ ସାପକୁ ଧରିବାରେ ସଫଳ ହେଉଥିଲେ ା ତାଙ୍କ ଜୀବନ କାଳ ମଧ୍ୟରେ ସେ ପ୍ରାୟ ୩ ହଜାରରୁ ଊର୍ଦ୍ଧ୍ୱ ସାପ ଓ ଗୋଧି ଆଦି ସରିସୃପଙ୍କୁ ଧରି ଜଙ୍ଗଲରେ ଛାଡ଼ିଛନ୍ତି ବୋଲି ପରିବାର ଲୋକେ କହିଛନ୍ତି ା ଏପରି କି ସେ ଏଥିପାଇଁ ପାରିଶ୍ରମିକ ବି ନେଉ ନ ଥିଲେ। ଦିନ ଥିଲା ଯେତେବେଳେ ସ୍ନେକ୍ ହେଲ୍ପ ଲାଇନର ସୁବିଧା ନ ଥିଲା, ସେତେବେଳେ ସୋଲେମାନ ଥିଲେ ସମସ୍ତଙ୍କ ବିଶ୍ୱସ୍ଥ। କେବଳ ଏତିକି ନୁହେଁ, କେହି ରୋଗ କଷ୍ଟରେ ପଡିଲେ ସୋଲେମାନ ସହଯୋଗ କରୁଥିଲେ ା ହେଲେ ରବିବାର ଅପରାହ୍ନରେ ସୋଲେମାନଙ୍କ ସେହି ସାପ କାମୁଡ଼ାରେ ମୃତ୍ୟୁ ଘଟିଛି। ଏକଥାକୁ କେହି ସହଜରେ ବିଶ୍ୱାସ କରୁ ନ ଥିଲେ ମଧ୍ୟ ସତ୍ୟ। ସେ ଘରେ ଥିବା ବେଳେ କେହି ଜଣେ ତାଙ୍କୁ ସାପ ଧରିବାକୁ ଡାକିଥିଲେ ା ଖୁବ୍ଶୀଘ୍ର ସେ ବସୁପୁରକୁ ସାପ ଧରିବାକୁ ଚାଲିଯାଇଥିଲେ। ହେଲେ ସେଠାରେ ସେ ନିଜ ପାରମ୍ପରିକ କୌଶଳ ଓ ଅଭିଜ୍ଞତାକୁ ଆଧାର କରି ସାପକୁ ନିଜର ଦୁଇ ହାତରେ ମାଡ଼ି ବସିଥିଲେ। ହେଲେ ସେହି ବିଷାକ୍ତ ସାପଟି ତାଙ୍କ ହାତକୁ ହଠାତ୍ କାମୁଡି ଦେଇଥିଲା। ଏହାର କିଛି ସମୟ ପରେ ସୋଲେମାନ ଚେତାଶୂନ୍ୟ ହୋଇପଡିଥିଲେ। ସ୍ଥାନୀୟ ଲୋକମାନେ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ଆଣିଥିଲେ। ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏହି ଖବର ଜଣାପଡିବା ପରେ ସ୍ଥାନୀୟ ଅଞ୍ଚଳରେ ଶୋକାକୂଳ ପରିବେଶ ସୃଷ୍ଟି ହୋଇଛି। ୫୦ବର୍ଷର ଅଭିଜ୍ଞତା ମୃତ୍ୟୁ ପାଖରେ ହାର ମାନିଲା ବୋଲି ସମସ୍ତେ କୁହାକୁହି ହେଉଛନ୍ତି।