ଖଇରା,(ଉତ୍କଳବନ୍ଧୁ ପଣ୍ଡା): ବାଲେଶ୍ୱର ଜିଲା ଖଇରା ବ୍ଲକ ମାଣିତ୍ରୀ ପଞ୍ଚାୟତର ପ୍ରସିଦ୍ଧ ଜଳଙ୍ଗ ଚଣ୍ଡୀଙ୍କ ମହିମା କିଏ ନ ଜାଣେ। କେହି ବିପଦରେ ପଡି ଡାକିବା ମାତ୍ରେ ମା’ ଛାତ ଭଳି ସନ୍ତାନକୁ ପଣତକାନିରେ ଘୋଡେଇ ରଖନ୍ତି। ମନ୍ଦିର ସ୍ଥାପନା ଓ ଏହାସହ ଜଡିତ କିଛି ଅଲୌକିକ ଘଟଣା ଲୋକମୁଖରୁ ଶୁଣିବାକୁ ମିଳୁଥିବା ବେଳେ ଆଉ କିଛି ଏବେ ଭକ୍ତଙ୍କ ପ୍ରତ୍ୟକ୍ଷ ଅନୁଭୂତିରୁ ଜାଣିବାକୁ ମିଳେ। ମନ୍ଦିର ସ୍ଥାପନା ସମୟରୁ ଏ ପର୍ଯ୍ୟନ୍ତ ରହି ଆସିଥିବା ଲିମ୍ବଗଛର ପତ୍ରର ସ୍ବାଦ ମିଠା ଯାହା କି ଆଜିର ବିଜ୍ଞାନ ଯୁଗରେ ଏକ ଅଲୌକିକ ଘଟଣା। ସାଧାରଣରେ ଲିମ୍ବପତ୍ର ପିତା ହୋଇଥିବା ବେଳେ ମା’ଙ୍କ ମହିମା ପାଇଁ ପତ୍ର ମିଠା ବୋଲି ଭକ୍ତମାନେ ବିଶ୍ୱାସ କରନ୍ତି।
ଆଗମନ ଓ ସ୍ଥାପନାକୁ ନେଇ କୁହାଯାଏ ଆଜକୁ ପ୍ରାୟ ୨ଶହ ବର୍ଷ ତଳେ କେନ୍ଦୁଝର ଜିଲା ଢେଙ୍କା ନିକଟସ୍ଥ ବାଲିଗୁରେଇ ଅଞ୍ଚଳରେ ଲୋକେ ୫ ଭଉଣୀଙ୍କୁ ୫ଦେବୀ ଭାବେ ପୂଜାର୍ଚ୍ଚନା କରୁଥିଲେ। ସେତେବେଳର ପରମ୍ପରା ଅନୁଯାୟୀ ମା’ଙ୍କ ନିକଟରେ ନରବଳି ଦିଆଯାଉଥିଲା। ପ୍ରଥମେ କେନ୍ଦୁଝର ରାଜା ଓ ପରେ ଢେଙ୍କା ଜମିଦାରଙ୍କ ତତ୍ତ୍ୱାବଧାନରେ ମା’ଙ୍କ ପୂଜାର୍ଚ୍ଚନା କରାଯାଇଥିଲା।
ଏହି ୫ ଭଉଣୀଙ୍କ ମଧ୍ୟରୁ ବଡ ଭଉଣୀ ଭାବେ ଚଣ୍ଡୀ ଦେବୀଙ୍କ ସ୍ବପ୍ନାଦେଶକ୍ରମେ ଜଳଙ୍ଗ ଗ୍ରାମର ମହାପାତ୍ର ବଂଶଧର ମା’ଙ୍କ ପ୍ରତିମାକୁ କାନ୍ଧରେ ବୋହି ଆଣି ଜଳଙ୍ଗ ଗ୍ରାମ ମୁଣ୍ଡରେ ଥିବା କୋଚିଳା ଗଛ ମୂଳେ ରଖିଥିଲେ। ପରେ ଗ୍ରାମବାସୀଙ୍କ ଶତଚେଷ୍ଟା ସତ୍ତ୍ୱେ ମା’ଙ୍କ ମୂର୍ତ୍ତିକୁ ଆଉ ସ୍ଥାନାନ୍ତର କରାଯାଇ ପାରି ନ ଥିଲା। କିଛି ବର୍ଷ ପରେ ମହାପାତ୍ର ବଂଶର ଉତ୍ତରାଧିକାରୀ ପଦ୍ମଲୋଚନ ମହାପାତ୍ର, ବିନୋଦ ମହାପାତ୍ର, ଗ୍ରାମର ପୁରୁଖା ଲୋକ ଗୋବିନ୍ଦ ପଣ୍ଡା ଓ ପାଣ୍ଡୁ ତ୍ରିପାଠୀଙ୍କ ପ୍ରଚେଷ୍ଟାରେ ଏକ ଭବ୍ୟ ମନ୍ଦିର ନିର୍ମାଣ କରାଯାଇଥିଲା। ଲୋକମୁଖରୁ ଶୁଣିବାକୁ ମିଳୁଥିବା ସେତେବେଳର ଅନ୍ୟ ଏକ ଅଲୌକିକ ଘଟଣା ଅନୁଯାୟୀ ଏହି ମନ୍ଦିରଠାରୁ କିଛି ଦୂରରେ ବାସଙ୍ଗ ପୋଖରୀ ନାମରେ ଏକ ପୋଖରୀ ରହିଛି। କୌଣସି କର୍ମକର୍ମାଣି ପାଇଁ ଗ୍ରାମର କୌଣସି ଲୋକଙ୍କ ବାସନକୁସନ ଦରକାର ପଡିଲେ ଆଗଦିନରୁ ମା’ଙ୍କୁ ଗୁହାରି କରିଯାନ୍ତି। ପରଦିନ ସକାଳେ ସେତିକି ପରିମାଣର ବାସନ ଭାସୁଥିଲା ଯାହାକୁ ନେଇ ଗ୍ରାମବାସୀ କାର୍ଯ୍ୟରେ ଲଗାଇ ସାରି ପୁଣି ଆଣି ପୋଖରୀରେ ଭସାଇ ଦେଉଥିଲେ। ଏବେ ଏହି ସ୍ଥାନର ଗୁରୁତ୍ୱକୁ ଉପଲବ୍ଧି କରିବା ପରେ ବିଧାୟକ ଜ୍ୟୋତିପ୍ରକାଶ ପାଣିଗ୍ରାହୀଙ୍କ ଉଦ୍ୟମରେ ରୂପାନ୍ତରୀକରଣ ଯୋଜନାରେ ସାମିଲ କରାଯାଇଛି ଏବଂ ସୌନ୍ଦର୍ଯ୍ୟକରଣ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି। ଟ୍ରଷ୍ଟ ବୋର୍ଡ ଅଧ୍ୟକ୍ଷ ପ୍ରଫୁଲ୍ଲ କୁମାର ଦାସ ଓ ପୂଜକ ବେଣୁଧର ତିଆଡିଙ୍କ କହିବା ଅନୁଯାୟୀ ସକାଳ