ନୂଆଦିଲ୍ଲୀ, ୮ା୬ (ପି.ଟି.)- ଅଲିମ୍ପିକ ପାଇଁ ଯୋଗ୍ୟତା ହାସଲ କରିସାରିଥିବା ଭାରତର ଷ୍ଟାର ଜାଭେଲିନ୍ ଥ୍ରୋୟର ନୀରଜ ଚୋପ୍ରା ପର୍ତ୍ତୁଗାଲରେ ପହଞ୍ଚତ୍ଛନ୍ତି। ଜୁନ୍ ୧୦ରେ ଲିସ୍ବନରେ ସେ ଏକ ଇଭେଣ୍ଟରେ ଅଂଶଗ୍ରହଣ କରିବେ। ଜୁନ୍ ୨୨ରେ ସେ ସ୍ବିଡେନ୍ରେ କାର୍ଲଷ୍ଟାଡ୍ ଗ୍ରାଁ ପ୍ରି ସମେତ ଅନ୍ୟ କେତେକ ଇଭେଣ୍ଟରେ ଭାଗ ନେବେ। ଲିସ୍ବନରେ ସେ ପ୍ରତିଯୋଗିତାରେ ଭାଗ ନେବା ସହ ଟ୍ରେନିଂ ମଧ୍ୟ ନେଇପାରିବେ। ସୂଚନାଯୋଗ୍ୟ, ଗତ ମାର୍ଚ୍ଚରେ ପଟିଆଲାରେ ଅନୁଷ୍ଠିତ ଇଣ୍ଡିଆନ ଗ୍ରାଁ ପ୍ରି ୩ରେ ୮୮.୦୭ ମିଟର ଥ୍ରୋ କରି ନିଜ ଜାତୀୟ ରେକର୍ଡ ଭଙ୍ଗ କରିଥିଲେ। ଗତବର୍ଷ ଜାନୁୟାରୀରେ ଦକ୍ଷିଣ ଆଫ୍ରିକାର ପୋଶ୍ଚେଫ୍ଷ୍ଟ୍ରୁମ୍ଠାରେ ଏକ ଇଭେଣ୍ଟରେ ସେ ୮୭.୮୬ମିଟର ଥ୍ରୋ କରି ଅଲିମ୍ପିକ୍ସ ପାଇଁ ଯୋଗ୍ୟତା ଅର୍ଜନ କରିଥିଲେ। ଜାଭେଲିନ୍ ପାଇଁ ଅଲିମ୍ପିକ ଯୋଗ୍ୟତା ଅଙ୍କ ୮୫ ମିଟର ରହିଛି।
