ଟୋକିଓ,୭।୮: ଜିମ୍ ଛାଡି ଜାଭେଲିନ ଥ୍ରୋ ଆରମ୍ଭ କରିଥିବା ନୀରଜ ଚୋପ୍ରା ଦିନେ ଭାରତ ପାଇଁ ଆଥ୍ଲେଟିକ୍ସରେ ପ୍ରଥମ ଅଲିମ୍ପିକ୍ସ ପଦକ ହାସଲ କରିବେ ବୋଲି କେହି ଭାବି ନ ଥିବେ। ଚଳିତ ୨୦୨୧ ଟୋକିଓ ଅଲିମ୍ପିକ୍ସରେ ପ୍ରଥମଥର ଅଂଶଗ୍ରହଣ କରି ଜାଭେଲିନରେ ସ୍ବର୍ଣ୍ଣ ପଦକ ହାସଲ କରି ନୀରଜ ଇତିହାସ ସୃଷ୍ଟି କରିଛନ୍ତି। ସେ ଟୋକିଓ ଫାଇନାଲରେ ୮୭.୫୮ ମିଟର ଜାଭେଲିନ ଥ୍ରୋ କରି ସ୍ବର୍ଣ୍ଣିମ ସଫଳତା ହାସଲ କରିଥିଲେ ମଧ୍ୟ ତାଙ୍କ ବ୍ୟକ୍ତିଗତ ଶ୍ରେଷ୍ଠ ପ୍ରଦର୍ଶନ ୮୮.୦୭ ମିଟର ରହିଛି। ପଦାର୍ପଣରେ ଅଲିମ୍ପିକ୍ସ ସ୍ବର୍ଣ୍ଣ ପଦକ ହାସଲ କରିଥିବାରୁ ତାଙ୍କ ଏହି ସଫଳତା ଭାରତୀୟ କ୍ରୀଡ଼ା ପାଇଁ ଏକ ଶୂଭ ସୂଚନା ବୋଲି ବିବେଚନା କରାଯାଉଛି।
ସେ ନାଟକୀୟ ଢଙ୍ଗରେ ସିନେମା ଷ୍ଟାଇଲ୍ରେ ଅଚାନକ ଜାଭେଲିନ ଥ୍ରୋ’ରେ ପ୍ରବେଶ କରିଥିଲେ। ପ୍ରଥମେ ଜିମ୍ ଯାଇ ସୁନ୍ଦର ଶରୀର ଗଠନ ଉପରେ ସେ ଗୁରୁତ୍ୱ ଦେଉଥିଲେ। ତେବେ ସେ ଏହା ଛାଡି ଜାଭେଲିନ ଥ୍ରୋରେ ମନ ଦେଇଥିଲେ। ପାଖାପାଖି ୬ ଫୁଟ ଉଚ୍ଚତା ଓ ୮୬ କେ.ଜି. ଓଜନ ବିଶିଷ୍ଟ ନୀରଜ ନିଜର ଦୀର୍ଘ, ସୁନ୍ଦର ତଥା ଆକର୍ଷଣୀୟ ଚେହେରା ପାଇଁ ସମସ୍ତଙ୍କ ନିକଟରେ ପ୍ରିୟ ଥିଲେ। ତାଙ୍କର ହେୟାର ଷ୍ଟାଇଲ୍ ମଧ୍ୟ ଆକର୍ଷଣୀୟ ଥିଲା। ତେବେ ସେ ଆରମ୍ଭରୁ ଶରୀରିକ ଭାବେ ସେତେଟା ଫିଟ୍ ନ ଥିଲେ ବୋଲି ତାଙ୍କ ଦାଦା ଭୀମ ଚୋପ୍ରା କହିଛନ୍ତି। ସେଥିପାଇଁ ସେ ଜିମ ଯାଉଥିଲେ। ଜିମ ପାଖରେ ହିଁ ଷ୍ଟାଡିୟମ ଥିଲା। ତେଣୁ ସେ ଏକାଧିକ ବାର ଷ୍ଟାଡିୟମକୁ ବୁଲି ଯାଉଥିଲେ। ଥରେ ଷ୍ଟାଡିୟମରେ କେତେକ ପିଲା ଜାଭେଲିନ ଥ୍ରୋ କରିବାର ସେ ଦେଖିଥିଲେ ସେଠାରେ ଯାଇ ଛିଡା ହୋଇଥିଲେ। ସେଠାରେ ଜଣେ କୋଚ୍ ତାଙ୍କୁ ଜାଭେଲିନ୍ ପକାଇବାକୁ କହିଥିଲେ। ‘ଦେଖିବା ତମେ କେତେ ଦୂର ଜାଭେଲିନ ପକାଉଛ’ ବୋଲି କୋଚ୍ କହିଥିଲେ। ଏହାପରେ କୋଚ୍ଙ୍କ ଏହି ଚ୍ୟାଲେଞ୍ଜ ସ୍ବୀକାର କରିଥିଲେ ଓ ଜାଭେଲିନ ଥ୍ରୋ କରିଥିଲେ ଓ ଏହା ବହୁତ ଦୂରରେ ଯାଇ ପଡିଥିଲା। ଏହାପରଠାରୁ ଆରମ୍ଭ ହୋଇଥିଲା ଇତିହାସ ସୃଷ୍ଟି କରିବାର ପ୍ରକ୍ରିୟା। କୋଚ୍ ତାଙ୍କୁ ନିୟମିତ ଭାବେ ଟ୍ରେନିଂକୁ ଆସିବାକୁ କହିଥିଲେ। କିଛି ଦିନ ପାଇଁ ସେ ପାନିପଥରେ ଟ୍ରେନିଂ ନେଇଥିଲେ। ଏହାପରେ ସେ ପଞ୍ଚକୁଲା ଷ୍ଟାଡିୟମରେ ନିୟମିତ ଭାବେ ଅଭ୍ୟାସ କରିଥିଲେ ଓ ଆରମ୍ଭ ହୋଇଯାଇଥିଲା ଜୟଯାତ୍ର। ଏହାପରଠାରୁ ନୀରଜ ଆଉ ପଛକୁ ଫେରିଚାହିଁନାହାନ୍ତି।
