ନୂଆଦିଲ୍ଲୀ, ୧୭।୮: ଧାର୍ଯ୍ୟ ସମୟରେ ଏନ୍ଇଇଟି ଏବଂ ଜେଇଇ ପରୀକ୍ଷା କରାଯିବ ବୋଲି ସୋମବାର ସୁପ୍ରିମ୍କୋର୍ଟ ରାୟ ଦେଇଛନ୍ତି। ଏହା ସହିତ ପରୀକ୍ଷା ସ୍ଥଗିତ କରାଯିବାକୁ କରାଯାଇଥିବା ପିଟିଶନକୁ ସୁପ୍ରିମ୍କୋର୍ଟ ଖାରଜ କରିଦେଇଛନ୍ତି। ସୁପ୍ରିମ୍କୋର୍ଟଙ୍କ ରାୟ ପରେ ଏବେ ଜେଇଇ ମେନ୍ ପୂର୍ବ ନିର୍ଦ୍ଧାରିତ ତାରିଖ ସେପ୍ଟେମ୍ବର ୧ରୁ ୬ ମଧ୍ୟରେ କରାଯିବ। ସେହିପରି ଏନ୍ଇଇଟି ପରୀକ୍ଷା ସେପ୍ଟେମ୍ବର ୧୩ରେ ହେବ। ଅପରପକ୍ଷରେ ଜେଇଇ ଆଡଭାନ୍ସଡ୍ ସେପ୍ଟେମ୍ବର ୨୭ରେ କରାଯିବ। ଦେଶରେ କରୋନା ମହାମାରୀ ସଂକ୍ରମଣ ଜାରି ରହିଥିବାରୁ ପରୀକ୍ଷାକୁ ଡିସେମ୍ବର ପର୍ଯ୍ୟନ୍ତ ସ୍ଥଗିତ ରଖିବାକୁ ପିଟିଶନ୍ ଦାଖଲ କରାଯାଇଥିଲା। ତେବେ ଗୋଟିଏ ବର୍ଷ ନଷ୍ଟ କରାଯାଇ ପାରିବ ନାହିଁ ବୋଲି ସୁପ୍ରିମ୍କୋର୍ଟ କହିଛନ୍ତି। ସୂଚନାଯୋଗ୍ୟ, ପୂର୍ବରୁ ମେ’ରେ କୁହାଯାଇଥିଲା ଯେ, ଏନ୍ଇଇଟି ପରୀକ୍ଷା ଜୁଲାଇରେ ହେବ। ସେହିପରି ଜେଇଇ ମେନ୍ ଜୁଲାଇ ୧୮, ୨୦, ୨୧, ୨୨ ଏବଂ ୨୩ରେ ହେବ। ମାତ୍ର କରୋନା ସଂକ୍ରମଣ ଯୋଗୁ ପରୀକ୍ଷାକୁ ଘୁଞ୍ଚାଇ ଦିଆଯାଇଥିଲା। ଏହା ସେପ୍ଟେମ୍ବରରେ ହେବ ବୋଲି କୁହାଯାଇଥିଲା।