ପାଟନା,୧୫ା୬: ଡାକ୍ତରୀ ପାଠ୍ୟକ୍ରମରେ ନାମଲେଖା ଲାଗି ଅନୁଷ୍ଠିତ ନ୍ୟାଶନାଲ ଏଲିଜିବିଲିଟି କମ୍ ଏଣ୍ଟ୍ରାନ୍ସ ଟେଷ୍ଟ (ଏନ୍ଇଇଟି)-ୟୁଜି ପରୀକ୍ଷାରେ ପ୍ରଶ୍ନପତ୍ର ଲିକ୍ ସହ ବ୍ୟାପକ ଅନିୟମିତତା ଅଭିଯୋଗ ହୋଇଥିଲେ ହେଁ କେନ୍ଦ୍ର ସରକାର ଏହାକୁ ଖଣ୍ଡନ କରି ଆସୁଥିଲେ। ତେବେ ପ୍ରଶ୍ନପତ୍ର ଲିକ୍ ମାମଲାରେ ବିହାରରୁ ୧୩ ଜଣ ଏବଂ ଗୁଜରାଟର ଗୋଧ୍ରା ସେଣ୍ଟରରୁ ୫ ଜଣଙ୍କୁ ଗିରଫ କରାଯାଇଛି। ଏହାପରେ ପରେ ସରକାରଙ୍କ ମିଛ ପଦାରେ ପଡ଼ିଥିବା ଚର୍ଚ୍ଚା ହେଉଛି।
ବିହାରର ବିଭିନ୍ନ ପରୀକ୍ଷା କେନ୍ଦ୍ରରେ ପ୍ରଶ୍ନପତ୍ର ଲିକ୍ ସହ ସମ୍ପୃକ୍ତ ୯ଜଣ ପରୀକ୍ଷାର୍ଥୀଙ୍କୁ ପରୀକ୍ଷା ପର୍ଯ୍ୟବେକ୍ଷକ ୟୁନିଟ୍ (ଇଓୟୁ) ନୋଟିସ ପଠାଇଛନ୍ତି। ପ୍ରଶ୍ନପତ୍ର ଲିକ୍ ଅଭିଯୋଗରେ ପୋଲିସ ୪ ପରୀକ୍ଷାର୍ଥୀଙ୍କ ସମେତ ୧୩ ଜଣଙ୍କୁ ଗିରଫ କରିଛି। ୯ଜଣ ଛାତ୍ରୀଛାତ୍ରଙ୍କ ସମ୍ପର୍କରେ ତଥ୍ୟ ଦେବାକୁ ଇଓୟୁ ପରୀକ୍ଷା ପରିଚାଳନାକାରୀ ସଂସ୍ଥା ଏନ୍ଟିଏକୁ କହିଥିଲା। ସେମାନଙ୍କ ସହ ଅଭିଭାବକମାନଙ୍କୁ ମଧ୍ୟ ଇଓୟୁ ସମନ କରିଛି। ସାଲଭର ଗ୍ୟାଙ୍ଗ୍କୁ ଉକ୍ତ ୧୩ ପରୀକ୍ଷାର୍ଥୀଙ୍କ ରୋଲ୍ କୋଡ୍ ମିଳିଥିଲା ବୋଲି ପୋଲିସ ତଦନ୍ତରୁ ଜାଣିବାକୁ ପାଇଥିଲା। ଉକ୍ତ ଗ୍ୟାଙ୍ଗ୍ ସେମାନଙ୍କୁ ପରୀକ୍ଷା ପୂର୍ବରୁ ଲିକ୍ ପ୍ରଶ୍ନପତ୍ର ଯୋଗାଇଥିଲା କି ନାହଁି ତାହାର ତଦନ୍ତ ଜାରି ରହିଛି। ସେହିପରି ଏନ୍ଇଇଟି-ୟୁଜିରେ ଅନିୟମିତତା ଅଭିଯୋଗ ଆଧାରରେ ଗୁଜରାଟ ପୋଲିସ ଗୋଧ୍ରାର ଏକ କୋଚିଂ ସେଣ୍ଟର ମୁଖ୍ୟଙ୍କ ସମେତ ୫ ଜଣଙ୍କୁ ଗିରଫ କରିଛି।