ମୁମ୍ବାଇ: ଅଭିନେତ୍ରୀ ଆଲିଆ ଭଟ୍ଟ ଖୁବ୍ଶୀଘ୍ର ମା’ ହେବାକୁ ଯାଉଛନ୍ତି। ସୋସିଆଲ ମିଡିଆରେ ତାଙ୍କୁ ଏନେଇ ଅନେକ ଅଭିନନ୍ଦନ ଆସୁଛି। ଏହି ଖୁସି ଖବର ପରେ କପୁର ଏବଂ ଭଟ୍ଟ ପରିବାର ବେଶ୍ ଆନନ୍ଦିତ ଅଛନ୍ତି। ଆଲିଆ ଏବଂ ରଣବୀର କପୁର ୩ ମାସ ହେବ ବିବାହ କରିଛନ୍ତି। ପ୍ରାୟ ୫ ବର୍ଷ ପରସ୍ପରକୁ ଡେଟ୍ କରିବା ପରେ ସେମାନେ ବିବାହ ବନ୍ଧନରେ ବାନ୍ଧି ହୋଇଥିଲେ। ବିବାହ ପରଠାରୁ ରଣବୀର ଏବଂ ଆଲିଆ ବୃତ୍ତିଗତ ଜୀବନରେ ବ୍ୟସ୍ତ ଅଛନ୍ତି। ଏବେ ଏକ ଭିଡିଓ ସାମ୍ନାକୁ ଆସିଛି, ଯାହା ପରେ ଲୋକମାନେ ସୋସିଆଲ ମିଡିଆରେ କହୁଛନ୍ତି ଆଲିଆ ଏବଂ ତାଙ୍କ ଶାଶୁ ନୀତୁ କପୁରଙ୍କ ମଧ୍ୟରେ କିଛି ସମ୍ପର୍କ ଭଲ ଥିଲାପରି ଲାଗୁନାହିଁ।
ବିବାହ ପରେ ଶାଶୁ ନୀତୁ ତାଙ୍କ ବୋହୂକୁ ବହୁତ ପ୍ରଶଂସା କରିଥିଲେ, କିନ୍ତୁ ନିକଟରେ ଏହି ଭିଡିଓ ଦେଖି ଲୋକମାନେ କହୁଛନ୍ତି ଯେ, ଶାଶୁ ତାଙ୍କ ବୋହୂ ଆଲିଆଙ୍କ ଅପେକ୍ଷା ଝିଅଙ୍କୁ ଅଧିକ ଭଲ ପାଉଛନ୍ତି।
ନିକଟରେ ନୀତୁ ମୁମ୍ବାଇ ବିମାନବନ୍ଦରରେ ନଜର ଆସିଥିଲେ। ଯେଉଁଠାରେ ସେ ଫଟୋଗ୍ରାଫରଙ୍କ ସହ କଥା ହୋଇଥିଲେ। ଯେତେବେଳେ ଫଟୋଗ୍ରାଫରମାନେ ନୀତୁଙ୍କୁ ପଚାରିଥିଲେ ଯେ, ସେ ତାଙ୍କ ବୋହୂଙ୍କୁ ଭେଟିବାକୁ ବିଦେଶ ଯାଉଛନ୍ତି କି? ସେତେବେଳେ ନୀତୁ ସଫା ମନା କରିଦେଇଥିଲେ। ନୀତୁ କହିଛନ୍ତି, ସେ ଆଲିଆଙ୍କୁ ଭେଟିବାକୁ ନୁହେଁ ବରଂ ତାଙ୍କ ଝିଅ ରିଦ୍ଧିମାଙ୍କୁ ଭେଟିବାକୁ ବିଦେଶ ଯାଉଛନ୍ତି।
ଆଲିଆ ଜୁନ୍ ୨୭ରେ ଗର୍ଭବତୀ ଥିବା ଘୋଷଣା କରିଥିଲେ। ଆଲିଆ ତାଙ୍କ ଇନ୍ଷ୍ଟାଗ୍ରାମ୍ରେ ଦୁଇଟି ଫଟୋ ଶେୟାର କରି କହିଥିଲେ ଯେ, ସେ ମା’ ହେବାକୁ ଯାଉଛନ୍ତି। ନୀତୁଙ୍କୁ ଫଟୋଗ୍ରାଫର ଆଉ ପ୍ରଶ୍ନ ପଚାରିଥିଲେ, ଆପଣ ଜେଜେ ମା’ ହେବାକୁ ଯାଉଛନ୍ତି। ଏହା ପରେ ନୀତୁ କହିଥିଲେ, ତାଙ୍କ ବ୍ୟତୀତ ସାରା ବିଶ୍ୱ ଜାଣନ୍ତି ଯେ, ସେ ଜେଜେମା ହେବାକୁ ଯାଉଛନ୍ତି। ନୀତୁଙ୍କ ଏପରି କଥା ଟିକେ ଖାପଛଡ଼ା ଲାଗୁଛି। ତେବେ ଏହା କେତେଦୂର ସତ ତାହା ପରେ ଜଣାପଡ଼ିବ।
