ନୂଆଦିଲ୍ଲୀ, ୨୫।୮ : ପଞ୍ଜାବ ଗସ୍ତ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସୁରକ୍ଷାରେ ହୋଇଥିବା ଅବହେଳା ସମ୍ପର୍କରେ ରିପୋର୍ଟ ଗଠନ ହୋଇଥିବା କମିଟି ସୁପ୍ରିମ୍କୋର୍ଟରେ ଦାଖଲ କରିଛନ୍ତି। ପୂର୍ବତନ ଜଷ୍ଟିସ ଇନ୍ଦୁ ମାଲହୋତ୍ରାଙ୍କ ନେତୃତ୍ୱରେ ଗଠିତ କମିଟି ଏହାର ରିପୋର୍ଟରେ କହିଛି ଯେ ଦୁଇ ଘଣ୍ଟା ପୂର୍ବରୁ ରୁଟରେ ପରିବର୍ତ୍ତନ ସମ୍ପର୍କରେ ସୂଚନା ପାଇବା ପରେ ମଧ୍ୟ ଫିରୋଜପୁର ଏସଏସପି ଆବଶ୍ୟକୀୟ ପଦକ୍ଷେପ ନେଇ ନଥିଲେ।
ଭିଭିଆଇପି ସୁରକ୍ଷା ଉପରେ ପୋଲିସଙ୍କୁ ଭଲ ତାଲିମର ଆବଶ୍ୟକତା ରହିଛି। ପ୍ରଧାନମନ୍ତ୍ରୀଙ୍କ ସୁରକ୍ଷାକୁ ମଜବୁତ କରିବା ପାଇଁ କମିଟି କେତେକ ପଦକ୍ଷେପ ନେବାକୁ ମଧ୍ୟ ପରାମର୍ଶ ଦେଇଛନ୍ତି। ସୁପ୍ରିମକୋର୍ଟ କହିଛନ୍ତି ଯେ ଏହି ପରାମର୍ଶ କେନ୍ଦ୍ର ସରକାରଙ୍କୁ ପଠାଇବ ଯାହା ଦ୍ୱାରା ଅଧିକ ସତର୍କତା ଅବଲମ୍ବନ କରାଯାଇପାରିବ।
୫ ଜାନୁୟାରୀ ୨୦୨୨ ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପଞ୍ଜାବର ଫିରୋଜପୁର ଗସ୍ତ କରିଥିଲେ। ପ୍ରବଳ ବର୍ଷା ଯୋଗୁ ପ୍ରଧାନମନ୍ତ୍ରୀଙ୍କୁ ରାସ୍ତାରେ ଯିବାକୁ ପଡୁଥିଲା, କିନ୍ତୁ ଏହି ସମୟ ମଧ୍ୟରେ ହୁସେନାୱାଲା ଠାରୁ ୩୦ କିଲୋମିଟର ଦୂରରେ ବିକ୍ଷୋଭକାରୀଙ୍କୁ ଦେଖିବାକୁ ମିଳିଥିଲା, ଏହି କାରଣରୁ ସେ ପ୍ରାୟ ୨୦ ମିନିଟ ପର୍ଯ୍ୟନ୍ତ ଏକ ଅସୁରକ୍ଷିତ ଅଞ୍ଚଳରେ ରହିଥିଲେ। ପ୍ରଧାନମନ୍ତ୍ରୀ ଅଟକି ଥିବା ଅଞ୍ଚଳରେ ଆତଙ୍କବାଦୀ ସକ୍ରିୟ ରହିଥିବା ସହିତ ଏହାକୁ ନିଶାଦ୍ରବ୍ୟ ଚୋରା କାରବାରର ପେଣ୍ଠସ୍ଥଳ ଭାବେ ବିବେଚନା କରାଯାଇଥାଏ। ଗତ ବର୍ଷ ସେପ୍ଟେମ୍ବରରେ ଏହି ଅଞ୍ଚଳରେ ଆତଙ୍କବାଦୀ ଆକ୍ରମଣ କରାଯାଇଥିଲା।
