ସାକ୍ଷୀଗୋପାଳ,୭।୧୧(ଡି.ଏନ୍.ଏ.): ପ୍ରଧାନମନ୍ତ୍ରୀ ଫସଲବୀମା କ୍ଷତିପୂରଣ ପ୍ରଦାନରେ ଅବହେଳା ଅଭିଯୋଗ କରି ସତ୍ୟବାଦୀ ବ୍ଲକର ଶୁକଳ ଓ ଆଳିଶ ପଞ୍ଚାୟତର ଶତାଧିକ ଚାଷୀ ଆନ୍ଦୋଳନ ଡାକରା ଦେଇଛନ୍ତି। ନୂଆ ଜଗନ୍ନାଥ ସଡ଼କ ପାଶର୍ବ ମହାବୀର ମନ୍ଦିରରେ ସୋମବାର ଏକ ପ୍ରତିବାଦ ସଭାରେ ଚାଷୀ ଏକାଠି ହୋଇଥିଲେ।
ସୂଚନାଯୋଗ୍ୟ, ୨୦୨୧ ଖରିଫ ଧାନ ଫସଲ ପାଇଁ ଚାଷୀ ପ୍ରଧାନମନ୍ତ୍ରୀ ଫସଲବୀମା ପ୍ରିମିୟମ ଦେଇଥିଲେ। ପ୍ରାକୃତିକ ବିତ୍ପାତରେ ଚାଷୀଙ୍କ ଫସଲ ନଷ୍ଟ ହୋଇଥିଲା। ସରକାରୀ କର୍ମଚାରୀ ଓ କମ୍ପାନୀ ମିଳିତ ଭାବେ କ୍ରପ କଟିଂ କରି କ୍ଷୟକ୍ଷତି ଆକଳନ କରିଥିଲେ। ଇତିମଧ୍ୟରେ ଏହାକୁ ବର୍ଷେ ବିତିଯାଇଛି। ହେଲେ ଚାଷଙ୍କୁ କ୍ଷତିପୂରଣ ମିଳିନାହିଁ।
ଏନେଇ ତୁରନ୍ତ ସମସ୍ୟାର ସମାଧାନ କରି ଚାଷୀଙ୍କୁ କ୍ଷତିପୂରଣ ରାଶି ପ୍ରଦାନ ଦିଗରେ ପଦକ୍ଷେପ ନେବାକୁ ଜୟ ବଜରଙ୍ଗୀ କୃଷକ ସଂଗଠନ ବୀମା କମ୍ପାନୀ, ରାଜ୍ୟ ସରକାରଙ୍କ କୃଷି ବିଭାଗ ଆଞ୍ଚଳିକ ଅଧିକାରୀ, ପୁରୀ ଜିଲାପାଳ, ଏସ୍ପି ଏବଂ ଜିଲା କୃଷି ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିଲେ। କିଛି ସୁଫଳ ନ ମିଳିବାରୁ ଚାଷୀ ଅନୁଷ୍ଠିତ ପ୍ରତିବାଦ ସଭାରେ ଆଗକୁ ଆନ୍ଦୋଳନ କରିବାକୁ କଡ଼ା ଚେତାବନୀ ଦେଇଛନ୍ତି। ସଭାରେ ସଂଗଠନର ଆବାହକ କୁଞ୍ଜିବିହାରୀ ସାହୁ, ଶ୍ରୀଧର ବିଶ୍ୱାଳ, କାର୍ତ୍ତିକ ସ୍ବାଇଁ ପ୍ରମୁଖ କୃଷକ ନେତାଙ୍କ ସହ ସରପଞ୍ଚ ଲଳିତ ମୋହନ ସେନାପତି, ସୁରେଶ ଚନ୍ଦ୍ର ସେଠୀ ପ୍ରମୁଖ ଉଦ୍ବୋଧନ ଦେଇ ୧୦ ଦିନ ମଧ୍ୟରେ ଦାବି ପୂରଣ ନ ହେଲେ କ୍ଷତିଗ୍ରସ୍ତ ଚାଷୀ ରାସ୍ତାରୋକ ଆନ୍ଦୋଳନ କରିବେ ବୋଲି କହିଛନ୍ତି।