ନୂଆଦିଲ୍ଲୀ, ୧୨।୧ : ପଞ୍ଜାବ ଗସ୍ତ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସୁରକ୍ଷା କ୍ଷେତ୍ରରେ ଅବହେଳା ହୋଇଥିବା ଘଟଣାର ଯାଞ୍ଚ୍ ପାଇଁ ୫ ଜଣିଆ କମିଟି ଗଠନ କରାଯାଇଛି। ଏହାର ନେତୃତ୍ୱ ଅବସରପ୍ରାପ୍ତ ବିଚାରପତି ଇନ୍ଦୁ ମାଲହୋତ୍ରା ନେବେ।
ଏହି ମାମଲାର ଶୁଣାଣି ସମୟରେ ଭାରତର ପ୍ରଧାନ ବିଚାରପତି ଏନ.ଭି ରମନା କହିଛନ୍ତି ଯେ ଆମେ ଅନୁମାନ କରୁଛୁ ଯେ ଏଭଳି ମାମଲାର ଏକତରଫା ଯାଞ୍ଚ ହୋଇପାରିବ ନାହିଁ। ତେଣୁ ଅବସରପ୍ରାପ୍ତ ବିଚାରପତି ଇନ୍ଦୁ ମାଲହୋତ୍ରାଙ୍କ ଅଧ୍ୟକ୍ଷତାରେ ଗଠିତ କମିଟି ଏହାର ଦାୟିତ୍ୱ ନେବେ।
କମିଟି ପକ୍ଷରୁ ସୁରକ୍ଷାରେ କାହିଁକି ଭୁଲ ହେଲା ?,କିଏ ଦାୟୀ ?,ଭବିଷ୍ୟତରେ କଣ କରାଯିବ ? ଏନେଇ ଏକ ରିପୋର୍ଟ ଶୀଘ୍ର ଶୀର୍ଷକୋର୍ଟରେ ଦାଖଲ କରିବାକୁ ଚେଷ୍ଟା କରିବେ।
କମିଟି ସଦସ୍ୟଙ୍କ ମଧ୍ୟରେ ଅବସରପ୍ରାପ୍ତ ବିଚାରପତି ଇନ୍ଦୁ ମାଲହୋତ୍ରାଙ୍କ ସହିତ ଏନ୍ଆଇଏର ଡିଜି କିମ୍ବା ତାଙ୍କ ଦ୍ୱାରା ନିଯୁକ୍ତ ଅଧିକାରୀ ଯିଏକି ଆଇଜି ପଦବୀରୁ କମ ହୋଇ ନଥିବେ, ଚଣ୍ଡିଗଡ଼ ଡିଜିପି ପଞ୍ଜାବର ସୁରକ୍ଷା ଏଡିଜିପି ଏବଂ ପଞ୍ଜାବ-ହରିୟାଣା ହାଇକୋର୍ଟର ରେଜିଷ୍ଟ୍ରାର୍ ଜେନେରାଲ ପ୍ରମୁଖ ରହିଛନ୍ତି।
ଲୟର୍ସ ଭଏସ ନାମକ ଏକ ସଂସ୍ଥା ଦ୍ୱାରା ଏହି ପିଟିସନ ଦାଖଲ କରାଯାଇଛି। ସଂସ୍ଥା ପକ୍ଷରୁ ଶୀର୍ଷକୋର୍ଟରେ ଏହି ମାମଲାର ନିରପେକ୍ଷ ତଦନ୍ତ ଦାବି କରିଯାଇଛିି।
ସୂଚନାଯୋଗ୍ୟ, ଗତ ଶୁକ୍ରବାର ଶୁଣାଣି ସମୟରେ ଏହା ଶୀର୍ଷକୋର୍ଟଙ୍କ ନଜରକୁ ଆସିଥିଲା ଯେ ଉଭୟ ପଞ୍ଜାବ ଏବଂ କେନ୍ଦ୍ର ସରକାର ସେମାନଙ୍କ ପକ୍ଷରୁ ଯାଞ୍ଚ୍ କରିବା ପାଇଁ କମିଟି ଗଠନ କରିଛନ୍ତି। ଶୁଣାଣି ସମୟରେ ଉଭୟ ସରକାର ପରସ୍ପରର କମିଟି ସଦସ୍ୟଙ୍କୁ ପ୍ରଶ୍ନ କରି ସେମାନଙ୍କ ନିରପେକ୍ଷତା ଉପରେ ସନ୍ଦେହ ସୃଷ୍ଟି କରିଥିଲେ। ଏହାର ତଦନ୍ତ ପାଇଁ ଏକ କମିଟି ଗଠନ ହୋଇପାରେ ବୋଲି ସର୍ବୋଚ୍ଚ କୋର୍ଟ ସୂଚିତ କରିଥିଲେ।