ନୂଆଦିଲ୍ଲୀ, ୧୦।୧ : ପଞ୍ଜାବ ଗସ୍ତ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସୁରକ୍ଷା ବ୍ୟବସ୍ଥାରେ ହୋଇଥିବା ଅବହେଳା ମାମଲାର ବିଚାର କରି ସୁପ୍ରିମ୍କୋର୍ଟ ଏକ ଯାଞ୍ଚ କମିଟି ଗଠନ କରିବାକୁ ନିଷ୍ପତ୍ତି ଗ୍ରହଣ କରିଛନ୍ତି। ଅବସରପ୍ରାପ୍ତ ବିଚାରପତିଙ୍କ ନେତୃତ୍ୱରେ ଏହି କମିଟି ଗଠିତ ହେବ।
ମାମଲାର ଶୁଣାଣି ସମୟରେ ସୋଲିସିଟର ଜେନେରାଲ ତୁଷାର ମେହେଟ୍ଟା କହିଥିଲେ ଯେ, ଶୀର୍ଷକୋର୍ଟ ଏବଂ ପ୍ରଧାନ ବିଚାରପତି ଏନ୍ ଭି. ରମନାଙ୍କ ପକ୍ଷରୁ ପଞ୍ଜାବ ସରକାରଙ୍କ ମୁଖ୍ୟ ସଚିବ ଏବଂ ଡିଜିଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଥିଲା।
ବର୍ତ୍ତମାନ ପର୍ଯ୍ୟନ୍ତ କେନ୍ଦ୍ର ସରକାର ସ୍ଥିର କରିଥିବା କମିଟି ଦ୍ୱାରା କୌଣସି ଶୁଣାଣି ହୋଇନାହିଁ। ଏହି ମାମଲାର ଶୁଣାଣି ବେଳେ ସୁପ୍ରିମକୋର୍ଟ କହିଛନ୍ତି ଯେ ଏହା ସତ୍ୟ ଯେ ସୁରକ୍ଷା ଅଭାବରୁ ଏହା ଘଟିଛି। ପଞ୍ଜାବ ସରକାର ନିଜେ ଏହି ତଥ୍ୟକୁ ଗ୍ରହଣ କରିଛନ୍ତି। କିନ୍ତୁ ପ୍ରଶ୍ନ ହେଉଛି ଯଦି ଯାଞ୍ଚ୍ କମିଟି ଗଠନ ହୁଏ ତେବେ ଏହା କ’ଣ କରିବ?
ପ୍ରଧାନ ବିଚାରପତି ଏନ.ଭି ରମନାଙ୍କ ବେଞ୍ଚ କହିଛନ୍ତି ଯେ ଯଦି ଆପଣ ଏହି ପ୍ରସଙ୍ଗରେ ଦାୟିତ୍ୱଥିବା ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଚାହୁଁଛନ୍ତି, ତେବେ କୋର୍ଟ ଏଥିରେ କଣ କରିପାରିବେ? ଏହା ସହିତ ସୁପ୍ରିମକୋର୍ଟ କହିଛନ୍ତି ଯେ ଘଟଣାର ଅନୁସନ୍ଧାନ ପାଇଁ ପଞ୍ଜାବ ଏବଂ କେନ୍ଦ୍ର ସରକାର ଗଠନ କରିଥିବା କମିଟିଗୁଡ଼ିକରେ ରୋକ ଜାରି ରହିବେ।
କୋର୍ଟ କହିଛନ୍ତି ଯେ ପୂର୍ବତନ ବିଚାରପତିଙ୍କ ନେତୃତ୍ୱରେ ହେବାକୁ ଥିବା କମିଟିରେ ଚଣ୍ଡିଗଡ଼ର ପୋଲିସ ମୁଖ୍ୟ, ଏନଆଇଏର ଆଇଜି, ପଞ୍ଜାବ ଏବଂ ହରିୟାଣା ହାଇକୋର୍ଟର ରେଜିଷ୍ଟ୍ରାର ଜେନେରାଲ ମଧ୍ୟ କମିଟି ସଦସ୍ୟ ଭାବେ ଅନ୍ତର୍ଭୁକ୍ତ ହୋଇପାରନ୍ତି। ସୁପ୍ରିମକୋର୍ଟ ଦ୍ୱିତୀୟ ଥର ପାଇଁ ଏହି ମାମଲାର ଶୁଣାଣି କରୁଛନ୍ତି। ଏହାପୂର୍ବରୁ ପଞ୍ଜାବ ଏବଂ କେନ୍ଦ୍ର ସରକାର ଗଠନ କରିଥିବା ତଦନ୍ତ କମିଟି ଉପରେ ରୋକ ଲାଗି କୋର୍ଟ ନିଷ୍ପତ୍ତି ନେଇଥିଲେ।