ଭଞ୍ଜନଗର, ୬ା୧୨(ଡି.ଏନ୍.ଏ): ଭଞ୍ଜନଗର ବ୍ଲକରେ ଚାଲିଥିବା ବିଭିନ୍ନ ଉନ୍ନୟନମୂଳକ କାର୍ଯ୍ୟର ଅଗ୍ରଗତି ନେଇ ସୋମବାର ବାଚସ୍ପତି ବିକ୍ରମ କେଶରୀ ଆରୁଖ ଜଳସମ୍ପଦ ବିଭାଗ ଡାକ ବଙ୍ଗଳାଠାରେ ସମୀକ୍ଷା କରିଛନ୍ତି। ଏହି ସମୟରେ ବିଡିଓ ଶଶିଭୂଷଣ ମହାପାତ୍ର, ସହକାରୀ ନିର୍ବାହୀ ଯନ୍ତ୍ରୀ ଶ୍ୟାମଘନ ପ୍ରଧାନ ପ୍ରମୁଖ ଉପସ୍ଥିତ ଥିଲେ। ଜିଲାରେ ପୂର୍ତ୍ତ ବିଭାଗ ପକ୍ଷରୁ ଚାଲିଥିବା ବିଭିନ୍ନ ଉନ୍ନୟନମୂଳକ କାର୍ଯ୍ୟର ସମୀକ୍ଷା ମଧ୍ୟ ବାଚସ୍ପତି କରିଥିଲେ। ଏହାପରେ ବାଚସ୍ପତି ଜିଲୁଣ୍ଡି ପଞ୍ଚାୟତରେ ଚାଲିଥିବା ମିନି ଷ୍ଟାଡିୟମ ସମେତ ଅନ୍ୟାନ୍ୟ ଉନ୍ନୟନମୂଳକ କାର୍ଯ୍ୟ ବୁଲି ଦେଖିଥିଲେ। ମିନି ଷ୍ଟାଡିୟମକୁ ଜିଲାର ଶ୍ରେଷ୍ଠ ମିନି ଷ୍ଟାଡିୟମ ଭାବେ କରିବା ଲକ୍ଷ୍ୟ ନେଇ କାମ ହେଉଛି। ବାଚସ୍ପତିଙ୍କ ଗସ୍ତ ସମୟରେ ଜିଲୁଣ୍ଡି ସରପଞ୍ଚ ରଞ୍ଜିତ ଆରୁଖ, ସମିତିସଭ୍ୟ ରଣବୀଜ ପ୍ରଧାନ ପ୍ରମୁଖ ଉପସ୍ଥିତ ଥିଲେ। ବ୍ଲକରେ ଉନ୍ନୟନ କାର୍ଯ୍ୟ ମନ୍ଥର ଗତିରେ ଚାଲିଥିବାରୁ ବିଭିନ୍ନ ମହଲରେ ଅସନ୍ତୋଷ ପ୍ରକାଶ ପାଇଛି, ଯାହାକୁ ନେଇ ବିଡିଓ କଡ଼ା ଆଭିମୁଖ୍ୟ ଆପଣାଇଛନ୍ତି। ବ୍ଲକର ୭ ଜଣ କର୍ମଚାରୀଙ୍କ ନଭେମ୍ବର ଦରମାକୁ ବିଡିଓ ବନ୍ଦ ରଖିଛନ୍ତି। ଦରମା ବନ୍ଦ ଥିବା କର୍ମଚାରୀମାନେ ପୂର୍ବାପେକ୍ଷା ଅଧିକ ତତ୍ପରତା ଦେଖାଇ ଦିନରାତି ଏକାକାର କରି କାମ କରୁଥିବା ଜଣାପଡ଼ିଛି। କର୍ମଚାରୀମାନଙ୍କ ଅବହେଳା ଯୋଗୁ ଉନ୍ନୟନ କାର୍ଯ୍ୟ ଧିମେଇ ଯାଇଥିଲା, ଯାହାକୁ ନେଇ ଅନେକ ସମସ୍ୟା ଆସୁଥିଲା। ବିଗତ କିଛି ଦିନ ହେବ ଉନ୍ନୟନ କାର୍ଯ୍ୟରେ ପରିବର୍ତ୍ତନ ଆସିଥିବା ଜଣାପଡ଼ିଛି। ଅପରପକ୍ଷେ ବିଡିଓ, ସହକାରୀ ନିର୍ବାହୀ ଯନ୍ତ୍ରୀ ଏବଂ ବିଇଓଙ୍କୁ ନେଇ ସ୍ମାର୍ଟ ସ୍କୁଲ କାର୍ଯ୍ୟ ଅଗ୍ରଗତି ଉପରେ ଆଜି ଏକ ସମୀକ୍ଷା ହୋଇଥିଲା। ବିଦ୍ୟାଳୟର ଛୋଟଛୋଟ କାମକୁ ବିଦ୍ୟାଳୟ ସ୍ତରରେ କରିବା ବ୍ୟବସ୍ଥା କରାଯାଉ। କାର୍ଯ୍ୟରେ ଯଦି କୌଣସି ପ୍ରଧାନଶିକ୍ଷକ ଅବହେଳା କରନ୍ତି, ତେବେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ବିଇଓ କହିଥିଲେ। ପ୍ରତ୍ୟେକ କ୍ଷେତ୍ରରେ କାର୍ଯ୍ୟାନୁଷ୍ଠାନ ସମାଧାନର ପନ୍ଥା ନୁହେଁ। ତେଣୁ ଆମମାନଙ୍କ ମଧ୍ୟରେ ସେବା ମନୋବୃତ୍ତି ରହିବା ଆବଶ୍ୟକ ବୋଲି ସେ କହିଥିଲେ। ବିଡିଓ ମହାପାତ୍ର କହିଥିଲେ, ଗୁଣାତ୍ମକ ଶିକ୍ଷାର ବିକାଶରେ ଶିକ୍ଷକମାନଙ୍କ ଭୂମିକା ଗୁରୁତ୍ୱପୂର୍ଣ୍ଣ। ସରକାର ଅଧିକରୁ ଅଧିକ ବିଦ୍ୟାଳୟକୁ ସ୍ମାର୍ଟ ସ୍କୁଲ ଯୋଜନାରେ ସାମିଲ କରୁଛନ୍ତି। ସମସ୍ତଙ୍କ ସହଯୋଗ ରହିଲେ ଯୋଜନା ସଫଳ ହେବ।