କାଠମାଣ୍ଡୁ,୧୭।୮ : ଆଗାମୀ ପାର୍ବଣ ଋତୁରେ ଖାଦ୍ୟ ସାମଗ୍ରୀର ଅଭାବର ମୁକାବିଲା ପାଇଁ ସତର୍କତାମୂଳକ ପଦକ୍ଷେପ ଭାବରେ ନେପାଳ ସରକାର ଧାନ, ଚାଉଳ ଏବଂ ଚିନି ଯୋଗାଣକୁ ସହଜ କରିବାକୁ ଭାରତକୁ ଅନୁରୋଧ କରିଛନ୍ତି। ବାଣିଜ୍ୟ ଓ ଯୋଗାଣ ମନ୍ତ୍ରଣାଳୟର ଯୁଗ୍ମ ସଚିବ ରାମ ଚନ୍ଦ୍ର ତିୱାରୀ କହିଛନ୍ତି ଗତ ସପ୍ତାହରେ ବୈଦେଶିକ ବ୍ୟାପାର ମନ୍ତ୍ରଣାଳୟ ମାଧ୍ୟମରେ ଭାରତୀୟ କର୍ତ୍ତୃପକ୍ଷଙ୍କୁ ଅନୁରୋଧ କରାଯାଇଥିଲା। ସେ କହିଛନ୍ତି ନେପାଳ ଭାରତକୁ ଏକ ୧୦ ଲକ୍ଷ ଟନ ଧାନ, ଏକ ଲକ୍ଷ ଟନ ଚାଉଳ ଏବଂ ୫୦ ହଜାର ଟନ ଚିନି ଯୋଗାଇବାକୁ ଅନୁରୋଧ କରିଛି।
ବଜାରରେ ବର୍ତ୍ତମାନ ଚାଉଳ ଏବଂ ଚିନିର ଅଭାବ ନ ଥିବାବେଳେ ଅନ୍ତର୍ଜାତୀୟ ବଜାରରେ ଅଣ-ବାସୁମତୀ ଧଳା ଚାଉଳ ରପ୍ତାନି ଉପରେ ପ୍ରତିବନ୍ଧକ ଲଗାଇବାକୁ ଭାରତ ନିଷ୍ପତ୍ତି ନେବା ପରେ ସମ୍ଭାବ୍ୟ ଅଭାବ ସମ୍ପର୍କରେ ଚର୍ଚ୍ଚା ହେଉଛି। ତିୱାରୀ କହିଛନ୍ତି ତେଣୁ ସତର୍କତା ଅବଲମ୍ବନ କରି ନେପାଳ ସରକାର ଭାରତକୁ ଏହି ଖାଦ୍ୟ ସାମଗ୍ରୀ ଯୋଗାଇବାକୁ କହିଛନ୍ତି।
ମାର୍କେଟ ବିଶ୍ଳେଷକମାନେ କହିଛନ୍ତି ପାର୍ବଣ ଋତୁରେ ନେପାଳୀ ବ୍ୟବସାୟୀମାନେ ଏହି ସାମଗ୍ରୀଗୁଡିକ ମହଜୁଦ କରି ରଖି ଏହାର ମିଥ୍ୟା ସଙ୍କଟ ସୃଷ୍ଟି କରିବାର ଆଶଙ୍କା ରହିଛି। ଫଳରେ ଏସବୁର ମୂଲ୍ୟ ବୃଦ୍ଧି ହୋଇପାରେ। ତେଣୁ ଆଗାମୀ ସ୍ଥିତିକୁ ଦୃଷ୍ଟିରେ ରଖି ନେପାଳ ସରକାର ଭାରତରୁ ଆମଦାନି ଯୋଜନା କରିଛନ୍ତି।