ନୂଆଦିଲ୍ଲୀ/କାଠମାଣ୍ଡୁ,୨୩।୭: ନେପାଳରେ ଚାଇନା ସମର୍ଥକ ଓଲି ସରକାର ଗଠନ ହେବା ସହିତ ଭାରତ-ନେପାଳ ସୀମା ବିବାଦ ପ୍ରସଙ୍ଗ ପୁଣି ଥରେ ତୀବ୍ର ହେବାରେ ଲାଗିଛି। ନେପାଳର ନୂତନ ପ୍ରଧାନମନ୍ତ୍ରୀ କେ.ପି ଶର୍ମା ଓଲି ଲିମ୍ପିଆଡୁରା, ଲିପୁଲେଖ, କାଲାପାନି ସମେତ ମହାକାଲି ନଦୀର ପୂର୍ବ ଅଞ୍ଚଳକୁ ନିଜର ବୋଲି ଦାବି କରିଛନ୍ତି। କୂଟନୈତିକ ପ୍ରଣାଳୀ ମାଧ୍ୟମରେ ଭାରତ-ନେପାଳ ସୀମା ବିବାଦର ସମାଧାନ ହେବ ବୋଲି ସେ କହିଛନ୍ତି। କାଠମାଣ୍ଡୁ ଏହାର ଅନ୍ତର୍ଜାତୀୟ ସୀମା ବିଷୟରେ ସ୍ପଷ୍ଟ ଏବଂ ଦୃଢ ଅଟେ ବୋଲି ଓଲି ସ୍ପଷ୍ଟ କରିଛନ୍ତି।
ପ୍ରତିନିଧି ସଭାରେ ଟ୍ରଷ୍ଟ ଭୋଟ ଜିତିବାର ଗୋଟିଏ ଦିନ ପରେ କେପି ଶର୍ମା ଓଲି ସାଂସଦଙ୍କ ପ୍ରଶ୍ନର ଉତ୍ତର ଦେଉଥିଲେ। ଏହି ସମୟ ମଧ୍ୟରେ ସେ କହିଛନ୍ତି, ସରକାର ଦୃଢ ଏବଂ ସ୍ପଷ୍ଟ ଯେ, ୧୮୧୬ର ସୁଗୁଲି ଚୁକ୍ତି ଅନୁଯାୟୀ, ଲିମ୍ପିଆଡୁରା, କାଲାପାନି, ଲିପୁଲେଖ ଏବଂ ମହାକାଲି ନଦୀର ପୂର୍ବ ଅଞ୍ଚଳ ନେପାଳର ଅଟେ।
ଓଲି କହିଛନ୍ତି, ଦୁଇ ଦେଶର ପ୍ରଧାନମନ୍ତ୍ରୀଙ୍କ ବୈଠକରେ କୂଟନୈତିକ ଉପାୟ ମାଧ୍ୟମରେ ସୀମା ବିବାଦର ସମାଧାନ ପାଇଁ ସହମତି ପ୍ରକାଶ ପାଇଛି। ନେପାଳ-ଭାରତ ବୈଦେଶିକ ମନ୍ତ୍ରୀ ସ୍ତରୀୟ ମିଳିତ ଆୟୋଗର ସପ୍ତମ ବୈଠକ ଜାନୁୟାରୀ ୪ରେ ଅନୁଷ୍ଠିତ ହୋଇଥିଲା। ଏହି ସମୟରେ ନେପାଳ-ଭାରତ ସୀମା ସହ ଜଡିତ ପ୍ରସଙ୍ଗ ଉପରେ ଆଲୋଚନା କରାଯାଇଥିଲା ଏବଂ ନେପାଳ-ଭାରତ ସୀମାର ଅବଶିଷ୍ଟ ଅଂଶରେ ବିଚାରାଧୀନ କାର୍ଯ୍ୟ ଶୀଘ୍ର ଶେଷ ହେବା ଉଚିତ ବୋଲି କୁହାଯାଇଥିଲା।
