ଭୁବନେଶ୍ୱର,୧୯। ୯(ବ୍ୟୁରୋ): ସେଣ୍ଟ୍ରାଲ ଇଲେକ୍ଟ୍ରିସିଟି ସପ୍ଲାଏ ୟୁଟିଲିଟି (ସେସୁ)କୁ ହାତେଇବା ପରେ ଟାଟା ପାଓ୍ବାର କର୍ପୋରେଶନ ଲିମିଟେଡ ଅନ୍ୟ ୩ଟି ବିଦ୍ୟୁତ୍ ବଣ୍ଟନ କମ୍ପାନୀ ଓ୍ବେଷ୍ଟର୍ନ ଇଲେକ୍ଟ୍ରିସିଟି ସପ୍ଲାଏ କମ୍ପାନୀ(ଓ୍ବେସ୍କୋ), ସାଉଥ୍ ଇଲେକ୍ଟ୍ରିସିଟି ସପ୍ଲାଏ କମ୍ପାନୀ(ସାଉଥ୍କୋ) ଏବଂ ନର୍ଥ ଇଲେକ୍ଟ୍ରିସିଟି ସପ୍ଲାଏ କମ୍ପାନୀ(ନେସ୍କୋ)କୁ ନିଜ ଅଧୀନକୁ ନେବା ଲାଗି ବିଡ୍ ଦାଖଲ କରିଛି। ମିଳିଥିବା ସୂଚନା ଅନୁଯାୟୀ ଟାଟା ପାଓ୍ବାର ୩ଟି ବଣ୍ଟନ କମ୍ପାନୀକୁ ହାତେଇବାକୁ ଟେଣ୍ଡର ପକାଇଥିବା ବେଳେ ଇଣ୍ଡିଆ ପାଓ୍ବାର ସାଉଥ୍କୋ ଏବଂ ଓ୍ବେସ୍କୋ ପାଇଁ ଆବେଦନ କରିଛି । ତେବେ ନେସ୍କୋ ପାଇଁ ଟାଟା ପାଓ୍ବାର ଏକମାତ୍ର ଘରୋଇ ସଂସ୍ଥା ଭାବେ ଟେଣ୍ଡର ପକାଇଛି।
ଏଠାରେ ଉଲ୍ଲେଖ ଯୋଗ୍ୟ ଯେ ସେସୁକୁ ହାତେଇବା ପାଇଁ ଟାଟା ପାଓ୍ବାର ଏବଂ ଇଣ୍ଡିଆ ପାଓ୍ବାର ଟେଣ୍ଡର ପକାଇଥିଲେ। ତେବେ ଇଣ୍ଡିଆ ପାଓ୍ବାର ଓହରିଯିବା ପରେ ଟାଟା ପାଓ୍ବାର ଏକମାତ୍ର ବିଡର ଭାବେ ସେସୁକୁ ହାତେଇ ନେଇଥିଲା। ଏବେ ପୁଣି ସେହି ପୁରୁଣା ଫର୍ମୁଲା ପକାଇ ଟାଟା ପାଓ୍ବାର ବଣ୍ଟନ କମ୍ପାନୀଗୁଡିକୁ ନେବାକୁ ମସୁଧା ଚଳାଇଛି।
ଟାଟା ପାଓ୍ବାର ୨୦୨୦ ଜୁନ୍ ପହିଲାରୁ ଏକ ମାତ୍ର ବିଡର ଭାବେ ସେସୁକୁ ହାତେଇ ନେଇଛି। ସେସୁର ଦାୟିତ୍ୱ ନେବା ପରଠାରୁ ଘନ ଘନ ବିଦ୍ୟୁତ୍ କାଟ ସହିତ ଗ୍ରାହକମାନେ ବିଦ୍ୟୁତ୍ ବିଲ୍ ଆଦାୟରେ ବିଭିନ୍ନ ଅନିୟମିତତା ନେଇ ଆପତ୍ତି ଉଠାଉଛନ୍ତି। ସେସୁ ଗ୍ରାହକମାନେ ବିଦ୍ୟୁତ୍ ଯନ୍ତ୍ରଣାରେ ଘାଣ୍ଟି ହେଉଥିବା ବେଳେ ଓଡ଼ିଶା ବିଦ୍ୟୁତ୍ ନିୟାମକ ଆୟୋଗ (ଓଇଆର୍ସି )ପୁଣି ୩ଟି ବଣ୍ଟନ କମ୍ପାନୀକୁ ଉକ୍ତ ଘରୋଇ ସଂସ୍ଥା ହାତରେ ଟେକି ଦେବା ନିଷ୍ପତ୍ତିକୁ ବିଭିନ୍ନ ମହଲରେ ବିରୋଧ କରାଯାଇଛି।
ଓଇଆର୍ସିର ଏଭଳି ପଦକ୍ଷେପକୁ ନିଖିଳ ଓଡ଼ିଶା ବିଦ୍ୟୁତ୍ ଶ୍ରମିକ ମହାସଂଘ କଡା ବିରୋଧ କରିଛି। ମହାସଂଘର ସାଧାରଣ ସମ୍ପାଦକ ଅକ୍ଷୟ କୁମାର ତ୍ରିପାଠୀ କହିଛନ୍ତି ଯେ, ରିଲାଏନ୍ସ କମ୍ପାନୀ ଦୀର୍ଘ ୧୫ ବର୍ଷ ୩ ବଣ୍ଟନ କମ୍ପାନୀକୁ ନେଇ ଲୁଟ କରି ଚାଲିଗଲା। କମ୍ପାନୀଗୁଡିକ ଋଣ ଭାରରେ ବୁଡି ରହିଛନ୍ତି। ନିକଟରେ ଟାଟାକୁ ସେସୁକୁ ହସ୍ତାନ୍ତର କରାଯାଇଛି। ସେସୁ ଗ୍ରାହକମାନେ ଠିକ୍ ସେବା ପାଉ ନ ଥିବା ବେଳେ କର୍ମଚାରୀଙ୍କ ଭବିଷ୍ୟତ ଅନିଶ୍ଚିତତା ଭିତରେ ରହିଛି। ଏପରି ସ୍ଥଳେ ୩ଟି ବଣ୍ଟନ କମ୍ପାନୀଙ୍କୁ କେଉଁ ଉଦ୍ଦେଶ୍ୟରେ ଦିଆଯାଉଛି ବୋଲି ସେ ପ୍ରଶ୍ନ କରିଛନ୍ତି।
ରାଜ୍ୟବାସୀଙ୍କୁ ଉନ୍ନତମାନର ବିଦ୍ୟୁତ୍ ସେବା ଯୋଗାଇ ଦେବାକୁ ରାଜ୍ୟ ସରକାର ବିଦ୍ୟୁତ୍ ବ୍ୟବସ୍ଥାକୁ ଘରୋଇକରଣ କରିଛନ୍ତି। ଗତ ଶତାବ୍ଦୀର ୮୦ ଦଶନ୍ଧିରୁ ଆରମ୍ଭ ହୋଇଥିବା ଏହି ପ୍ରୟାସ ବାରମ୍ବାର ଓଲଟା ଫଳ ଦର୍ଶାଉଛି। ଟିକସଦାତାଙ୍କ ଅର୍ଥରେ ଗଢି ଉଠିଥିବା ବିରାଟକାୟ ବିଦ୍ୟୁତ୍ ଭିତ୍ତିଭୂମିକୁ ବ୍ୟବହାର କରି ଘରୋଇ କମ୍ପାନୀଗୁଡ଼ିକ ଲୁଟ କରି ରାଜ୍ୟ ଛାଡି ପଳାଉଛନ୍ତି। ୧୯୯୯ର ଉକ୍ତ ୩ଟି ବିଦ୍ୟୁତ୍ ବଣ୍ଟନ କମ୍ପାନୀର ପରିଚାଳନା ଦାୟିତ୍ୱ ରିଲାଏନ୍ସ ଏନର୍ଜି( ବିଏସ୍ଇଏସ୍)କୁ ହସ୍ତାନ୍ତର କରାଯାଇଥିଲା। ଦୀର୍ଘ ୧୫ ବର୍ଷ ପରେ ବହୁ ବାଦ ବିବାଦ ଓ ଆଇନଗତ ଲଢ଼େଇ ପରେ ୨୦୧୫ ରିଲାଏନ୍ସ ଏନର୍ଜି ଲାଇସେନ୍ସକୁ ରଦ୍ଦ କରାଯାଇଥିଲା।