କେନ୍ଦୁଝର, ୩।୮(ଡି.ଏନ.ଏ.)- ପୃଥିବୀରେ ବାସ କରିବାର ଅଧିକାର କେବଳ ମଣିଷର ନୁହେଁ ସମସ୍ତ ଜୀବଙ୍କର ରହିଛି। ନିଜକୁ ସବୁବେଳେ ଶ୍ରେଷ୍ଠ ଭାବେ ଘୋଷଣା କରୁଥିବା ମଣିଷର ନିଜ ଜାଣତରେ ହେଉ ବା ଅଜାଣତରେ ଅନେକ ସରଳ ଜୀବଙ୍କୁ ଶେଷ କରୁଛି ପ୍ରତି କ୍ଷଣରେ। ତେବେ ସଭ୍ୟତାର କ୍ରମବିକାଶ ହେଉ ବା ବିଲୁପ୍ତିର ଧାରାରେ ଏବେ ବହୁ ପକ୍ଷୀଙ୍କ ବସା ଆଉ ଦେଖିବାକୁ ମିଳୁ ନାହିଁ। ତେବେ ଏଭଳି ସମୟରେ କୃତ୍ରିମ ଉପାୟରେ ପକ୍ଷୀଙ୍କ ପାଇଁ ବସା ତିଆରି ଉଦ୍ୟମ ଚାଲିଛି।
ଏଭଳି ଦେଖିବାକୁ ମିଳିଛି କେନ୍ଦୁଝର ଜିଲାର ପାଟଣା ବ୍ଲକରେ। ‘ପିକକ’ ଅନୁଷ୍ଠାନ ସହଯୋଗରେ ଏହି ପକ୍ଷୀବସା ତିଆରି କରାଯାଉଥିବାବେଳ ପକ୍ଷୀମାନେ ଏହାକୁ ଆଦରି ନେଉଥିବା ମଧ୍ୟ ଦେଖିବାକୁ ମିଳୁଛି। ବ୍ଲକର ଜଡିଚାତର ଗ୍ରାମର କେତେଜଣ ଯୁବକଙ୍କୁ ନେଇ ବିର୍ସା ମୁଣ୍ଡା ଇକୋ ସେଭର ଗ୍ରୁପ୍ ଗଠିତ ହୋଇଛି। ଏହି ଗ୍ରୁପ୍ର ସଦସ୍ୟମାନେ ଆଖପାଖ ଅଞ୍ଚଳରେ ପକ୍ଷୀବସା ନିର୍ମାଣ କରୁଛନ୍ତି। ବିଭିନ୍ନ ସ୍ଥାନରୁ କାଠିକୁଟା ସଂଗ୍ରହ କରି ବସା ତିଆରି ହେଉଥିବାବେଳ ସୁରକ୍ଷିତ ସ୍ଥାନରେ ଏହା ଲଗାଯାଉଛି। ପକ୍ଷୀମାନେ ବି ଏଠାକୁ ଆସି ରହୁଥିବା ଦେଖିବାକୁ ମିଳୁଛି। ଗାଁରେ ପକ୍ଷୀମାନେ ଆଉ ଦେଖାଯାଉ ନ ଥିବାବେଳେ ଏବେ ଧୀରେ ଧୀରେ ଏହି ବସା ନିକଟରେ ପକ୍ଷୀଙ୍କ କଳରବ ଶୁଣିବାକୁ ମିଳୁଛି ବୋଲି କୁହନ୍ତି ସତ୍ୟନାରାୟଣ ମହାନ୍ତ। ୨୫ଟି ଗ୍ରାମରେ ଏହି ପକ୍ଷୀବସା ନିର୍ମାଣ ଚାଲିଥିବାବେଳେ ୨୩୫ଟି ବସା ତିଆରି ସରିଛି। ଏହି ଯୁବଗୋଷ୍ଠୀ ପକ୍ଷରୁ ବନୀକରଣ କରାଯାଉଥିବା ମଧ୍ୟ ସେ ପ୍ରକାଶ କରିଛନ୍ତି।