କଟକ ଅଫିସ,୨୦ା୧: କଟକ ଓଡ଼ିଆ ବଜାରସ୍ଥିତ ନେତାଜୀ ଜନ୍ମସ୍ଥାନ ସଂଗ୍ରହାଳୟ ନିକଟରେ ଥିବା ନେତାଜୀ ବ୍ୟାଖ୍ୟାନ କେନ୍ଦ୍ର କାର୍ଯ୍ୟକ୍ଷମ ହୋଇପାରୁନାହିଁ। ଦୀର୍ଘଦିନ ଧରି ବନ୍ଦ ରହିବା ଯୋଗୁ ଏହାର ଅଟ୍ଟାଳିକା ନଷ୍ଟ ହେବାକୁ ବସିଥିବାବେଳେ ଉପକରଣଗୁଡିକ ଖତ ଖାଉଛି। ତୁରନ୍ତ ଏହାର ପୁନରୁଦ୍ଧାର କରି କାର୍ଯ୍ୟକ୍ଷମ କରାଗଲେ ପର୍ଯ୍ୟଟକଙ୍କ ସହ ରାଜ୍ୟବାସୀ ନେତାଜୀ ସୁଭାଷ ଚନ୍ଦ୍ର ବୋଷଙ୍କ ବିଷୟରେ ଅନେକ ତଥ୍ୟ ଜାଣିପାରିବେ ବୋଲି ବୁଦ୍ଧିଜୀବୀ ମହଲରେ ଆଲୋଚନା ହେଉଛି।
ରାଜ୍ୟ ତଥା ଦେଶବିଦେଶର ପର୍ଯ୍ୟଟକମାନେ ନେତାଜୀଙ୍କ ଜୀବନୀ ବିଷୟରେ ଜାଣିବା ଉଦ୍ଦେଶ୍ୟରେ ସଂଗ୍ରହାଳୟ ନିକଟରେ ୨୦୧୬ରେ ନେତାଜୀ ବ୍ୟାଖ୍ୟାନ କେନ୍ଦ୍ର ନିର୍ମାଣ କରାଯାଇଥିଲା। ଓଡ଼ିଶା ପର୍ଯ୍ୟଟନ ଉନ୍ନୟନ ନିଗମ(ଓଟିଡିସି) ପକ୍ଷରୁ ଏଥିପାଇଁ ୧ କୋଟି ୪୦ ଲକ୍ଷ ଟଙ୍କା ବ୍ୟୟ କରାଯାଇଥିଲା। ଏହା ଭିତରେ ଅଡିଟୋରିୟମ ହଲ୍ ବ୍ୟବସ୍ଥା ହୋଇଥିଲା। ଏହି ହଲ୍ରେ ୫୦ ସିଟ୍, ଲାଇଟ୍ ଆଣ୍ଡ୍ ସାଉଣ୍ଡ୍ ବକ୍ସ ଓ ପ୍ରୋଜେକ୍ଟର ଲଗାଯାଇଥିଲା। ଫଳରେ ସଂଗ୍ରହାଳୟ ବୁଲିବାକୁ ଆସୁଥିବା ପର୍ଯ୍ୟଟକମାନେ ଉକ୍ତ ହଲ୍ରେ ବସି ଅଡିଓ ଭିଜୁଆଲ ମାଧ୍ୟମରେ ନେତାଜୀଙ୍କ ଜୀବନୀ ବିଷୟରେ ଜାଣିପାରିବେ। ଏଥିସହ ଗବେଷକମାନେ ନେତାଜୀଙ୍କ ଜୀବନୀ ସମ୍ପର୍କିତ ତଥ୍ୟ ହାସଲ କରିପାରିବେ। ଏଥିପାଇଁ ସବୁ ବ୍ୟବସ୍ଥା ସରିଥିଲେ ମଧ୍ୟ କୌଣସି କାରଣବଶତଃ ତାହାକୁ ଉଦ୍ଘାଟନ କରାଯାଇପାରି ନାହିଁ। ଦୀର୍ଘଦିନ ଧରି ଏହି ସାମଗ୍ରୀ ବ୍ୟବହାର ନ ହେବାରୁ ତାହା ନଷ୍ଟ ହୋଇଯାଇଥିଲା। ୨୦୧୮ରେ ଓଟିଡିସି ପକ୍ଷରୁ ଏହାର ନବୀକରଣ କରାଯାଇ ନେତାଜୀ ଜନ୍ମସ୍ଥାନ ସଂଗ୍ରହାଳୟ ଟ୍ରଷ୍ଟକୁ ହସ୍ତାନ୍ତର କରାଯାଇଥିଲା। ହେଲେ ଟ୍ରଷ୍ଟ ପକ୍ଷରୁ ମଧ୍ୟ ଏହାକୁ ଖୋଲିବା ପାଇଁ ବ୍ୟବସ୍ଥା କରାଯାଇ ନ ଥିଲା। ମୋଟାମୋଟି ଭାବେ ଉକ୍ତ କେନ୍ଦ୍ର ନିର୍ମାଣ ଓ ମରାମତି ବାବଦକୁ ପ୍ରାୟ ଅଢେଇ କୋଟି ଟଙ୍କା ଖର୍ଚ୍ଚ ହୋଇଥିବା ନେତାଜୀ ଜନ୍ମସ୍ଥାନ ସଂଗ୍ରହାଳୟ ଦାୟିତ୍ୱରେ ଥିବା ଜଣେ କର୍ମଚାରୀ ପରିଚୟ ଗୋପନ ରଖି କହିଛନ୍ତି। ୨୦୧୯ରେ ଫନୀ ପ୍ରଭାବରେ ଏହାର ଫାଇବର୍ ଆଜବେଷ୍ଟସ ଭାଙ୍ଗିଯିବା ସହ ଭିତର ପ୍ଲାଏବୋର୍ଡ ସିଲିଂ ନଷ୍ଟ ହୋଇଯାଇଥିଲା। ଏଥିସହ ଲାଇଟ୍ ଆଣ୍ଡ୍ ସାଉଣ୍ଡ ବ୍ୟବସ୍ଥା ମଧ୍ୟ ଖରାପ ହୋଇଯାଇଛି। ଏ ସମ୍ପର୍କରେ ନେତାଜୀ ଜନ୍ମସ୍ଥାନ ସଂଗ୍ରହାଳୟ ଦାୟିତ୍ୱରେ ଥିବା ଅଧିକାରୀ ଜଳେନ୍ଦ୍ର ପ୍ରସାଦ ରାୟ କହିଛନ୍ତି, ବ୍ୟାଖ୍ୟାନ କେନ୍ଦ୍ରର ପୁନରୁଦ୍ଧାର ପାଇଁ ଯୋଜନା ପ୍ରସ୍ତୁତ ହେଉଛି। ନୂତନ ଯୋଜନାରେ ଏହାକୁ କାର୍ଯ୍ୟକ୍ଷମ କରାଯିବ।