ଜେରୁଜେଲମ୍ , ୧।୬: ଇସ୍ରାଏଲ୍ ପ୍ରଧାନମନ୍ତ୍ରୀ ପଦ ହରାଇପାରନ୍ତି ବେଞ୍ଜାମିନ ନେତାନ୍ୟାହୁ। ବିରୋଧୀ ଦଳଗୁଡ଼ିକ ସହଯୋଗରେ ସରକାର ଗଢ଼ିବା ପାଇଁ ଦାବି ଉପସ୍ଥାପନ କରିବେ ବୋଲି ନେତାନ୍ୟାହୁଙ୍କ ପୂର୍ବତନ ସହଯୋଗୀ ନାଫଟାଲି ବେନ୍ନେଟ୍ କହିଛନ୍ତି। ଫଳରେ ଦୀର୍ଘବର୍ଷ ଧରି ଦେଶକୁ ଶାସନ କରିଆସୁଥିବା ନେତାନ୍ୟାହୁ କ୍ଷମତାରୁ ଯାଇପାରନ୍ତି ବୋଲି ଚର୍ଚ୍ଚା ହେଉଛି। ତାଙ୍କ ଦଳ ଲିକୁଡ୍ ପାର୍ଟି ଆଗାମୀ ସପ୍ତାହରେ ବିରୋଧୀ ଦଳ ଭୂମିକା ନେଇପାରେ। ବେନ୍ନେଟ ଓ ତାଙ୍କ ନୂଆ ସହଯୋଗୀମାନେ ବିରୋଧୀ ଦଳ ନେତା ୟାଇର ଲାପିଡ୍ଙ୍କ ନେତୃତ୍ୱରେ ଏକାଠି ହୋଇଛନ୍ତି। ଗତ ଦୁଇବର୍ଷରେ ଇସ୍ରାଏଲ୍ରେ ୪ ଥର ନିର୍ବାଚନ ହେଲାଣି, କିନ୍ତୁ କୌଣସି ଦଳକୁ ପୂର୍ଣ୍ଣ ସଂଖ୍ୟାଗରିଷ୍ଠତା ମିଳୁନାହିଁ। ତେଣୁ ୟାଇର ଲାପିଡ୍ଙ୍କ ସହ ମିଶି ଜାତୀୟ ଏକତା ସରକାର ଗଠନ ପାଇଁ ଉଦ୍ୟମ ହେଉଛି। ଭଗବାନ ଏହା ଚାହାନ୍ତି। ସମସ୍ତେ ମିଶି ଆମେ ଦେଶକୁ ସଙ୍କଟରୁ ରକ୍ଷା କରିପାରିବା ଓ ପୂର୍ବ ଅବସ୍ଥାକୁ ଫେରାଇ ପାରିବା ବୋଲି ବେନ୍ନେଟ କହିଛନ୍ତି।