ଜେରୁଜେଲମ୍,୨୯ା୭ : ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଏକାଧିକ ଦୁର୍ନୀତି ମାମଲାରେ ଛନ୍ଦି ହୋଇ କୋର୍ଟକୁ ଧାଉଁଥିବାବେଳେ ତାଙ୍କ ବିରୋଧରେ ଦେଶବ୍ୟାପୀ ଆନ୍ଦୋଳନ ମୁଣ୍ଡ ଟେକିଛି। ତାଙ୍କ ଇସ୍ତଫା ଦାବିରେ ଇସ୍ରାଏଲ ଜନସାଧାରଣ ରାସ୍ତାକୁ ଓହ୍ଲାଇ ବିକ୍ଷୋଭ ପ୍ରଦର୍ଶନ କରୁଛନ୍ତି। ଏଭଳି ସମୟରେ ବେଞ୍ଜାମିନଙ୍କ ବଡ଼ପୁଅ ୟାଇର୍ ନେତାନ୍ୟାହୁ ଗୋଟିଏ ପରେ ଗୋଟିଏ ଆପତ୍ତିଜନକ ଟୁଇଟ୍ କରି ବାପାଙ୍କ ସମସ୍ୟାକୁ ବଢ଼ାଇବାରେ ଲାଗିଛନ୍ତି। ନିକଟରେ ୟାଇର୍ ଦେବୀ ଦୁର୍ଗାଙ୍କୁ ଅପମାନିତ କରିଛନ୍ତି।
ସୋସିଆଲ ମିଡିଆରେ ସକ୍ରିୟ ରହି ବାପାଙ୍କ ରାଜନୀତି ସପକ୍ଷରେ ମତାମତ ଦେଉଥିବା ୨୯ ବର୍ଷୀୟ ୟାଇର ରବିବାର ଏକ ଟୁଇଟ୍ କରିଥିଲେ। ଏଥିରେ ସେ ହିନ୍ଦୁଧର୍ମର ଦେବୀ ଦୁର୍ଗାଙ୍କ ଫଟୋ ପୋଷ୍ଟ କରିଥିଲେ। ଉକ୍ତ ଫଟୋରେ ଲିଆଟ ବେନ୍ ଆରିଙ୍କ ମୁହଁ ରହିଥିଲା। ଲିଆଟ୍ ବେନ୍ ଆରି ହେଉଛନ୍ତି ନେତାନ୍ୟାହୁଙ୍କ ବିରୋଧରେ ଦୁର୍ନୀତି ମାମଲା ଲଢ଼ୁଥିବା ଆଇନଜୀବୀ। ଫଟୋରେ ଦୁର୍ଗାଙ୍କ ୮ଟି ହାତ ରହିଛି ଓ ସେଥିରୁ ମଧ୍ୟମା ଅଙ୍ଗୁଳିଗୁଡ଼ିକ ଉପରକୁ ଉଠିଥିବା ଦେଖିବାକୁ ମିଳିଛି। ଦୁର୍ଗାଙ୍କ ବାହନ ବାଘର ମୁହଁ ବଦଳରେ ଆଟର୍ନି ଜେନେରାଲ ଅଭିଚାଇ ମେନଡେଲବିଟ୍ଙ୍କ ମୁହଁ ଉକ୍ତ ଫଟୋରେ ରହିଛି। ସେଥିରେ କ୍ୟାପ୍ଶନ ଲେଖାଯାଇଛି, ‘ଘୃଣ୍ୟ ବ୍ୟକ୍ତିମାନେ, ତୁମ ସ୍ଥାନ କେଉଁଠି ଜାଣ।’ ଭାରତୀୟମାନେ ଉକ୍ତ ଟୁଇଟ୍ ଦେଖିବା ପରେ ‘ଅତ୍ୟନ୍ତ ଅପମାନଜନକ’ ବୋଲି ଆପତ୍ତି ଉଠାଇଛନ୍ତି। ତୀବ୍ର ପ୍ରତିକ୍ରିୟା ପ୍ରକାଶ ପାଇବାରୁ ୟାଇର୍ ନିଜ କାର୍ଯ୍ୟ ପାଇଁ କ୍ଷମା ମାଗିଛନ୍ତି। ଅନ୍ୟ ଏକ ଟୁଇଟ୍ରେ ସେ କହିଛନ୍ତି, ଇସ୍ରାଏଲ୍ର ସାମ୍ପ୍ରତିକ ରାଜନୀତିକୁ ସମାଲୋଚନା କରିବାକୁ ଯାଇ ସେ ଏପରି ବ୍ୟଙ୍ଗ କରିଥିଲେ। ହିନ୍ଦୁଧର୍ମ ସହିତ ଉକ୍ତ ଫଟୋର ସମ୍ପର୍କ ଥିବା ନେଇ ତାଙ୍କୁ ଜଣା ନ ଥିଲା। ଭାରତୀୟ ବନ୍ଧୁମାନଙ୍କ ପ୍ରତିକ୍ରିୟା ଆସିବା ପରେ ସେ ତାକୁ ହଟାଇ ଦେଇଥିବା ୟାଇର୍ ଏଥିରେ ଉଲ୍ଲେଖ କରିଛନ୍ତି। କୋଭିଡ୍-୧୯ ମୁକାବିଲା କ୍ଷେତ୍ରରେ ଇସ୍ରାଏଲ ସରକାର ବିଫଳ ହୋଇଛନ୍ତି। ମେ’ରୁ ଆରମ୍ଭ ହୋଇଥିବା ଲକ୍ଡାଉନ୍ ଫଳରେ ଦେଶରେ ୨୧% ବେରୋଜଗାର ସମସ୍ୟା ବୃଦ୍ଧି ପାଇଛି। ଏଥିଯୋଗୁ ଦେଶର ଅର୍ଥନୀତି ମଧ୍ୟ ବହୁଳ ଭାବେ ପ୍ରଭାବିତ ହୋଇଥିବା ଦର୍ଶାଇ ଦେଶବାସୀ ବିକ୍ଷୋଭ କରୁଛନ୍ତି। ବିଗତ କିଛି ସପ୍ତାହ ଧରି ଇସ୍ରାଏଲ୍ ଜନସାଧାରଣ ରାଜରାସ୍ତାକୁ ଓହ୍ଲାଇବା ସହ ପ୍ରଧାନମନ୍ତ୍ରଙ୍କ ଜେରୁଜେଲମ ବାସଭବନ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରୁଛନ୍ତି। ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କ ବିରୋଧରେ ଜେରୁଜେଲମ୍ର ଏକ କୋର୍ଟରେ ଚଳିତ ମାସରୁ ଦୁର୍ନୀତି ମାମଲା ଚାଲି ଥିବାବେଳେ ଏହି ବିକ୍ଷୋଭ ଆହୁରି ଉଗ୍ର ହୋଇଛି। ୨୦୨୧ ଜାନୁୟାରୀରୁ ଶୁଣାଣି ହେବାକୁ ଥିବା ମାମଲାଗୁଡ଼ିକରେ ଯେଉଁ ଅଭିଯୋଗ ଅଣାଯାଇଛି ତାହା ସମ୍ପୂର୍ଣ୍ଣ ଭିତ୍ତିହୀନ ବୋଲି ବେଞ୍ଜାମିନ ନେତାନ୍ୟାହୁ ଖଣ୍ଡନ କରିବା ସହ ନିଜେ ଏକ ବିରାଟ ଷଡ଼ଯନ୍ତ୍ରର ଶିକାର ହୋଇଥିବା ଦର୍ଶାଇଛନ୍ତି। ନେତାନ୍ୟାହୁଙ୍କ ପରିବାର ଜନସାଧାରଣଙ୍କ ବିକ୍ଷୋଭକୁ ଖୋଲାଖୋଲି ଭାବେ ସମାଲୋଚନା କରୁଛନ୍ତି। ନେତାନ୍ୟାହୁଙ୍କ ପୁଅ ୟାଇର୍ ସରକାରର କୌଣସି ପଦ ପଦବୀରେ ନ ଥାଇ ସୁଦ୍ଧା ବିକ୍ଷୋଭ ବିରୋଧରେ ନେତୃତ୍ୱ ନେଉଛନ୍ତି।