ବିଶୋଇ, ୮ା୪ (ଡି.ଏନ.ଏ) ମୟୂରଭଞ୍ଜ ଜିଲା ଶିମିଳିପାଳ ପାଦଦେଶରେ ଥିବା ଆଦିବାସୀ ଅଧ୍ୟୁଷିତ ବିଶୋଇ ଅଞ୍ଚଳରେ ଦୀର୍ଘ ଦିନ ଧରି ମୋବାଇଲ ନେଟୱର୍କ ସମସ୍ୟା ଲାଗିରହିଥିଲା। ସାରସକଣା ବିଧାୟକ ଡାକ୍ତର ବୁଢାନ ମୁର୍ମୁଙ୍କ ପ୍ରଚେଷ୍ଟାରେ ଖୁବଶୀଘ୍ର ଏହି ସମସ୍ୟାର ସମାଧାନ ହେବାକୁ ଯାଉଛି। ଭାରତ ସରକାରଙ୍କ ଦୂରସଞ୍ଚାର ବିଭାଗର ସଞ୍ଚାର ମନ୍ତ୍ରାଳୟ ସହିତ ବିଧାୟକ ଡାକ୍ତର ମୁର୍ମୁଙ୍କ ହସ୍ତକ୍ଷେପ ପରେ ବିଶୋଇ ବ୍ଲକର ଖଡ଼ମବେଡା ପଞ୍ଚାୟତ ସ୍ଥିତ ବାଢୁଣିଆ ଓ ଏନ. ବି ପୋଖରିଆ ପଞ୍ଚାୟତର ରଙ୍ଗାମାଟିଆ ଅଞ୍ଚଳରେ ମୋବାଇଲ ଟାୱାର ବସିବାକୁ ଯାଉଛି।
ବିଶୋଇ ବ୍ଲକର ୧୩ ଗୋଟି ପଞ୍ଚାୟତର ୧୫୦ରୁ ଉଦ୍ଧର୍ବ ଗ୍ରାମ ରହିଥିବା ବେଳେ ବ୍ଲକର ଏନ. ବି ପୋଖରିଆ, ଜୁଡ଼ିଆ ଓ ବାଉତିବେଡା ପ୍ରମୁଖ ପଞ୍ଚାୟତର ୫୦ରୁ ଉଦ୍ଧର୍ବ ଗ୍ରାମରେ ମୋବାଇଲ ନେଟୱର୍କ ସମସ୍ୟା ଲାଗି ରହିଛି। ଫଳରେ ଏହି ଅଞ୍ଚଳର ଜନସାଧାରଣ ସମାଜର ମୁଖ୍ୟସ୍ରୋତରେ ସାମିଲ ହେବାରୁ ବଞ୍ଚିତ ହୋଇ ଆସୁଛନ୍ତି। ତେବେ, କରୋନା ମହାମାରୀ ସମୟରେ ଏହି ଅଞ୍ଚଳରେ ଥିବା ମେଧାବୀ ଛାତ୍ରୀଛାତ୍ର ମଧ୍ୟ ଅନଲାଇନ ଶିକ୍ଷା ଗ୍ରହଣରୁ ବଞ୍ଚିତ ହେବା ଗଣମାଧ୍ୟମରେ ଚର୍ଚ୍ଚାର ବିଷୟ ପାଲଟିଥିଲା। ଉକ୍ତ ମୁଖ୍ୟ ସମସ୍ୟା ପ୍ରସଙ୍ଗକୁ ନେଇ ବିଧାୟକ ଡାକ୍ତର ବୁଢାନ ମୁର୍ମୁ ବିଭାଗୀୟ କେନ୍ଦ୍ର ମନ୍ତ୍ରୀ ଅଶ୍ୱନୀ ବୈଷ୍ଣବଙ୍କୁ ଚିଠି କରିବା ସହିତ ବାଢୁଣିଆ ଓ ରଙ୍ଗାମାଟିଆରେ ମୋବାଇଲ ଟାୱାର ସ୍ଥାପନ ନେଇ ଅବଗତ କରାଇଥିଲେ। ପରେ କେନ୍ଦ୍ରମନ୍ତ୍ରୀ ଏହି ପ୍ରସଙ୍ଗକୁ ଗୁରୁତ୍ୱ ନେଇ ଦୂରସଞ୍ଚାର ବିଭାଗର ମହା ନିର୍ଦ୍ଦେଶକଙ୍କୁ ତର୍ଜମା କରିବା ପାଇଁ ନିର୍ଦ୍ଦେଶ ଦେଇଥିଲେ। ମହାନିର୍ଦ୍ଦେଶକ ନିଜାମୁଲ ହକଙ୍କ ନେତୃତ୍ୱରେ ବିଭାଗୀୟ ଅଧିକାରୀଙ୍କ ତର୍ଜମା ପରେ ଏନ.ବି ପୋଖରିଆ ପଞ୍ଚାୟତର ରଙ୍ଗାମିଆଟିଆ ଗ୍ରାମରେ ମୋବାଇଲ ଟାୱାର ସ୍ଥାପନ ହେବାକୁ ଯାଉଛି ବୋଲି ବିଭାଗୀୟ ଅଧିକାରୀଙ୍କ ପାଖରୁ ସୂଚନା ଜାରି କରାଯାଇଛି। ସେହିପରି ବାଢୁଣିଆ ଅଞ୍ଚଳରେ ପୂର୍ବରୁ ବିଏସଏନଏଲ ଟାୱାର ସ୍ଥାପନ ହୋଇ ସାରିଛି। ଖୁବଶୀଘ୍ର ବାଢୁଣିଆରେ ମୋବାଇଲ ନେଟୱର୍କ ସ୍ଥାପନ କରାଯିବ ବୋଲି ବିଭାଗୀୟ ଅଧିକାରୀ ବିଧାୟକଙ୍କୁ ରିପୋର୍ଟ ଦେଇଛନ୍ତି।