ନୂଆଦିଲ୍ଲୀ, ୧୧।୯ : ସାଧାରଣ ନିର୍ବାଚନ ପୂର୍ବରୁ ବିରୋଧୀଙ୍କୁ ଏକଜୁଟ କରିବାକୁ ଉଦ୍ୟମ ମଧ୍ୟରେ ଏନସିପି ମୁଖ୍ୟ ଶରଦ ପାୱାର ଲୋକଙ୍କୁ କେନ୍ଦ୍ର ସରକାର ବିରୋଧରେ ଏକଜୁଟ ହେବାକୁ ଆହ୍ବାନ ଦେଇଛନ୍ତି। ତାଙ୍କ ଦଳର ଦୁଇ ଦିନିଆ ଜାତୀୟ ସମ୍ମିଳନୀକୁ ସମ୍ବୋଧିତ କରି ପାୱାର ଦିଲ୍ଲୀର ତାଲକଟୋରା ଷ୍ଟାଡିୟମରେ କହିଛନ୍ତି ଯେ ଆମେ କେନ୍ଦ୍ରର ବର୍ତ୍ତମାନର ସରକାରଙ୍କ ଆଗରେ ମୁଣ୍ଡ ନୁଆଁଇବୁନି।
ମରାଠା ରାଜା ଛତ୍ରପତି ଶିବାଜୀଙ୍କ ନାମ ନେଇ ପାୱାର କହିଛନ୍ତି, ଶିବାଜୀ କହିଥିଲେ ଯେ ଆମେ ଦିଲ୍ଲୀର ସିଂହାସନ ସମ୍ମୁଖରେ ନୋଇବୁ ନାହିଁ। ଆଜି ଆମେ ମଧ୍ୟ ସେଭଳି ପରିବେଶରେ ଏକାଠି ହୋଇଛୁ। ସେ କହିଛନ୍ତି ଯେ ଅତୀତରେ ମରାଠା ଲୋକମାନେ ଦିଲ୍ଲୀକୁ ମଧ୍ୟ ଚ୍ୟାଲେଞ୍ଜ ଦେଇଛନ୍ତି। ଏବେ ମଧ୍ୟ ସମାନ ସ୍ଥିତି ସୃଷ୍ଟି ହୋଇଛି।
ପାୱାର କହିଛନ୍ତି, ଶ୍ରୀଲଙ୍କା ଏବଂ ପାକିସ୍ତାନ ଏକଛତ୍ରବାଦୀ ଶାସନ ଦେଖିଥିଲେ। ସେଠାରେ ଗଣତନ୍ତ୍ର ଅଳ୍ପ ଲୋକଙ୍କ ହାତରେ ଆସିଥିଲା। ଆମ ଦେଶରେ ୫୬ ପ୍ରତିଶତ କୃଷି ଉପରେ ଆଧାରିତ। ଆମେ କୃଷକମାନଙ୍କ ପାଇଁ ଗର୍ବିତ। କେନ୍ଦ୍ର ଦ୍ୱାରା ଲାଗୁ ହୋଇଥିବା ତିନୋଟି କୃଷି ଆଇନ ୧୫ ମିନିଟରେ ପାରିତ ହୋଇଥିଲା। କିନ୍ତୁ ବିରୋଧୀ କୃଷକମାନେ ଏକ ବର୍ଷ ପାଇଁ ଦିଲ୍ଲୀ ସୀମାରେ ବସିଥିଲେ। ପ୍ରଥମେ ସରକାର ଏଥିପ୍ରତି ଧ୍ୟାନ ଦେଇ ନଥିଲେ। ଚାଷୀଙ୍କୁ ହେୟଜ୍ଞାନ କରାଯାଇଥିଲା କିନ୍ତୁ ଶେଷରେ ନତମସ୍ତକ ହେବାକୁ ପଡିଲା।
ଆମ ଦଳ କୃଷକଙ୍କ ସ୍ବାର୍ଥ ଉପରେ କାର୍ଯ୍ୟ ଜାରି ରଖିଛି। ସବୁବେଳେ ସେମାନଙ୍କର ଅଧିକାର ରକ୍ଷା କରୁଛି। ତେବେ କିଛି ସାମ୍ପ୍ରଦାୟିକ ଉପାଦାନ ପରିସ୍ଥିତିକୁ ଆହୁରି ଖରାପ କରୁଛନ୍ତି। ସଂଖ୍ୟାଲଘୁ ସମ୍ପ୍ରଦାୟଙ୍କ ମଧ୍ୟରେ ଭୟ ସୃଷ୍ଟି କରୁଛନ୍ତି। ସେଥିପାଇଁ ଆମେ ସଦଭାବ ସୃଷ୍ଟି କରିବାକୁ ସଂକଳ୍ପ ନେବା ଉଚିତ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟାର୍ଗେଟ କରି ଏନସିପି ସୁପ୍ରିମୋ କହିଛନ୍ତି ଯେ ଅଗଷ୍ଟ ୧୫ ରେ ଲାଲକିଲ୍ଳାରୁ ମହିଳାଙ୍କ ଅଧିକାର ଉପରେ ଏକ ଭାଷଣ ଦିଆଯାଇଥିଲା। ମାତ୍ର ଏହାର ବିପରୀତ କାର୍ଯ୍ୟ କରି ଗୁଜୁରାଟର ବିଜେପି ସରକାର ବିଲକିସ ବାନୋ ମାମଲାର ଅପରାଧୀଙ୍କୁ ମୁକ୍ତ କରି ଫୁଲମାଳ ପିନ୍ଧାଇ ସମ୍ମାନୀତ ମଧ୍ୟ କରିଥିଲେ।
ଦେଶରେ ମୁଦ୍ରାସ୍ଫୀତି ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ। ଦରଦାମ ସ୍ଥିତି ବହୁତ ଖରାପ ଅଛି। ଆଜି ସାଧାରଣ ଲୋକମାନେ ଏହା ଦ୍ୱାରା ଅସୁବିଧାରେ ପଡ଼ିଛନ୍ତି। ସେହିପରି ଆମ ଦେଶର ସୁରକ୍ଷା ମଧ୍ୟ ଏକ ଗୁରୁତର ପ୍ରସଙ୍ଗରେ ପରିଣତ ହୋଇଛି। ଚାଇନା ସୀମାରେ ଅବସ୍ଥା ଖରାପ ହେବାରେ ଲାଗିଛି। ୨୦୧୯ ରେ ବିବାଦୀୟ ଅଞ୍ଚଳରେ ଚାଇନା ନିର୍ମାଣ କରିଛି। ଡେପସଙ୍ଗ ଏବଂ ଡେମୋକୋକ ଚାଇନାର ନିୟନ୍ତ୍ରଣରେ ଅଛି। ଚାଇନା ସହିତ ସେନା ସୂତ୍ର କହିଛି ଯେ ଆମେ ପୁରୁଣା ସ୍ଥାନକୁ ଯାଇ ପାରିବୁ ନାହିଁ। ପ୍ରଧାନମନ୍ତ୍ରୀ ଚାଇନା ଉପରେ ଦେଶକୁ ବିଭ୍ରାନ୍ତ କରିଛନ୍ତି।
ଚାଇନା ତୁଳନାରେ ଆମର ଭିତ୍ତିଭୂମି ଦୁର୍ବଳ। ଚାଇନାର ଗୁପ୍ତଚର ଜାହାଜ ଶ୍ରୀଲଙ୍କାରେ ପହଞ୍ଚିଛି। ସରକାରଙ୍କ ନିଷ୍କ୍ରିୟତା ବିରୋଧରେ ସାମୂହିକ ସ୍ବର ଉତ୍ତୋଳନ କରିବାର ଆବଶ୍ୟକତା ରହିଛି ବୋଲି ସେ କହିଛନ୍ତି।