ପୁଣେ,୭।୪: ୧୫ ବଲରେ ପାଟ କୁମିନ୍ସଙ୍କ ୫୬ ରନ୍ର ବିସ୍ଫୋରକ ପାଳି ପ୍ରତିପକ୍ଷ ମୁମ୍ବାଇ ଇଣ୍ଡିଆନ୍ସ ଅଧିନାୟକ ରୋହିତ ଶର୍ମାଙ୍କୁ ଚକିତ କରି ଦେଇଛି। କୁମିନ୍ସଙ୍କ ଯୋଗୁ କୋଲକାତା ନାଇଟ୍ ରାଇଡର୍ସ ୫ ଉଇକେଟରେ ମୁମ୍ବାଇକୁ ହରାଇ ଦେଇଥିଲା।
“ସେ ଏଭଳି ଖେଳିବେ ମୁଁ କଦାପି ଚିନ୍ତା କରି ନ ଥିଲି। ସେ ଯେଉଁ ଭଳି ଖେଳିଲେ, ସେଥି ପାଇଁ ତାଙ୍କୁ ଶ୍ରେୟ ଦେବା ଉଚିତ। ୧୫ ଓଭର ପର୍ଯ୍ୟନ୍ତ ମ୍ୟାଚ୍ ଆମ ହାତରେ ଥିଲା। କିନ୍ତୁ କୁମିନ୍ସ ଅନ୍ତିମ ଓଭରରେ ମାଡ଼ ଦେଇ ଯେଉଁ ଭଳି ମ୍ୟାଚ୍ ବଦଳାଇଥିଲେ, ତାହାକୁ ହଜମ କରିବା ସହଜ ନୁହେଁ” ବୋଲି ମ୍ୟାଚ୍ ପରେ ରୋହିତ କହିଥିଲେ।
ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ମୁମ୍ବାଇ ପାଓ୍ବରପ୍ଲେରେ ରୋହିତଙ୍କ ଉଇକେଟ ହରାଇ ମାତ୍ର ୩୫ ରନ୍ କରିଥିଲା। ୫ ଥର ଚାମ୍ପିୟନ ୧୬ ଓଭର ଶେଷ ସୁଦ୍ଧା ୩ ଉଇକେଟ ହରାଇ ୯୮ ରନ୍ କରିଥିଲା। ପରବର୍ତ୍ତୀ ୪ ଓଭରରେ ସୂର୍ଯ୍ୟ କୁମାର ଯାଦବ ଓ କିରନ ପୋଲାର୍ଡ ୬୩ ରନ୍ କରିବାରୁ ଦଳୀୟ ସ୍କୋର ପହଞ୍ଚି ପାରିଥିଲା ୧୬୧ରେ। ଜବାବରେ ୧୫ ଓଭର ଶେଷ ହେବା ପରେ କେକେଆରକୁ ଜିତିବା ପାଇଁ ୩୫ ରନ୍ ଦରାକର ଥିଲା। କିନ୍ତୁ କୁମିନ୍ସ ଡାନିଏଲ ସାମ୍ସଙ୍କ ଓଭରରେ ୩୫ ରନ୍ ଆଦାୟ କରି ମ୍ୟାଚ୍ ଜିତି ନେଇଥିଲେ।