ନିମାପଡ଼ା,୩ା୩ (ଡି.ଏନ୍.ଏ.): ପୁରୀ ଜିଲା ନିମାପଡ଼ା ଏନ୍ଏସି ପକ୍ଷରୁ ୨କୋଟି ୫୦ଲକ୍ଷ ୩୨ହଜାର ଟଙ୍କା ବ୍ୟୟରେ ନିମାପଡ଼ାରେ ଅତ୍ୟାଧୁନିକ ବସ୍ଷ୍ଟାଣ୍ଡ ନିର୍ମିତ ହୋଇଛି। ୨୮ସେପ୍ଟେମ୍ବର ୨୦୧୮ରେ ଉଦ୍ଘାଟନ ହୋଇ ଲୋକାର୍ପିତ ହୋଇଥିଲା। ଉଦ୍ଘାଟନର ଅଢ଼େଇ ବର୍ଷ ପରେ ବି ବସ୍ଷ୍ଟାଣ୍ଡ ଯାତ୍ରୀଙ୍କ ହିତରେ ଆସୁ ନ ଥିବା ଜଣାପଡ଼ିଛି। ନିମାପଡ଼ା ରୁଟ୍ରେ ପୁରୀ, ଭୁବନେଶ୍ୱର, କାକଟପୁର, ଅସ୍ତରଙ୍ଗ, ନୟାହାଟ, ଚାରିଛକ, ଗୋପ, କୋଣାର୍କ ଆଦି ଅଞ୍ଚଳକୁ ପ୍ରାୟ ୪୫ ଯାତ୍ରୀବାହୀ ବସ୍ ଯାତାୟାତ କରୁଥିବା ବେଳେ ନୂତନ ବସ୍ଷ୍ଟାଣ୍ଡରେ ଏଥିରୁ ୯୦ ପ୍ରତିଶତ ବସ୍ ରହୁନାହିଁ। ଅନ୍ୟ କେତୋଟି ବସ୍ ଗୋଟିଏ ଗେଟରେ ପଶି ଅନ୍ୟ ଗେଟରେ ବାହାରି ଯାଉଛନ୍ତି। ବସ୍ଗୁଡ଼ିକ ପୂର୍ବଭଳି ପୁରୁଣା ବସଷ୍ଟାଣ୍ଡଠାରେ ମୁଖ୍ୟ ରାସ୍ତା ଅବରୋଧ କରି ଦୀର୍ଘ ସମୟ ଧରି ପାର୍କିଂ ହେଉଛି। ଫଳରେ ଟ୍ରାଫିକ ସମସ୍ୟା ଦେଖାଦେବା ସହ ଯାତାୟାତରେ ଲୋକେ ହଇରାଣ ହେଉଛନ୍ତି।
ନୂତନ ବସଷ୍ଟାଣ୍ଡରେ ବର୍ଷା, ଖରା ଦିନେ ଗାଡ଼ିଗୁଡ଼ିକ ରହଣି ପାଇଁ ଟର୍ମିନାଲ ବ୍ୟବସ୍ଥା ନ ଥିବା, ପାନୀୟ ଜଳ, ପରିଶ୍ରାଗାରର ସୁବ୍ୟବସ୍ଥା ନ ଥିବାରୁ ଏହି ବସଷ୍ଟାଣ୍ଡ ଯାତ୍ରୀଙ୍କ ହିତରେ ଆସିପାରି ନାହିଁ ବୋଲି ଯାତ୍ରୀ ଶ୍ରୀକାନ୍ତ ବାରିକ, ତ୍ରିଲୋଚନ ବିଶ୍ୱାଳ, ରାମଚନ୍ଦ୍ର ଜେନା, ପ୍ରମିଳା ସାହୁ, ପଦ୍ମାବତୀ ବେହେରା ପ୍ରମୁଖ କହିଛନ୍ତି। ବସ୍ଷ୍ଟାଣ୍ଡରେ ଟିକେଟ କାଉଣ୍ଟର ଓ ଯାତ୍ରୀ ପ୍ରତିକ୍ଷାଳୟ ଗୃହ ରହିଥିବା ବେଳେ ଉକ୍ତ ଗୃହରେ ସର୍ବଦା ତାଲା ଝୁଲୁଥିବା ଜଣାପଡ଼ିଛି। ବସଷ୍ଟାଣ୍ଡ ପରିସର ଅସାମାଜିକ ଯୁବକଙ୍କ ଆଡ୍ଡାସ୍ଥଳି ପାଲଟିଛି। ସନ୍ଧ୍ୟା ପରେ ଯାତ୍ରୀ, ଗାଡ଼ି ଚାଳକ ଏଠାକୁ ଆସିବାକୁ ନିରାପଦ ମଣୁ ନାହାନ୍ତି ବୋଲି ସ୍ଥାନୀୟ ବାସିନ୍ଦା କହିଛନ୍ତି। ଏନ୍ଏନସି କର୍ତ୍ତୃପକ୍ଷ ଓ ପୋଲିସ ପ୍ରଶାସନ ପକ୍ଷରୁ ତୁରନ୍ତ ପଦକ୍ଷେପ ନେବାକୁ ସାଧାରଣରେ ଦାବି ହୋଇଛି। ଏ ସମ୍ପର୍କରେ ନିମାପଡ଼ା ଘରୋଇ ବସ୍ ମାଲିକ ସଂଘ ସଭାପତି ବିଚିତ୍ରା ନନ୍ଦ ଖଟୋଇ, ଷ୍ଟାଣ୍ଡ ସମ୍ପାଦକ ସରୋଜ ସାହୁ, ବସ ମାଲିକ ସନ୍ତୋଷ ସେନାପତି, ସନ୍ଦୀପ ସ୍ବାଇଁ, ସୁନିଲ ପରିଜା କହିଛନ୍ତି, ନୂତନ ବସଷ୍ଟାଣ୍ଡରେ ଟର୍ମିନାଲ ବ୍ୟବସ୍ଥା ଏବଂ ଆଲୋକ ବ୍ୟବସ୍ଥା ନ ଥିବାରୁ ବସ୍ ରହଣିରେ ପ୍ରତିବନ୍ଧକ ସୃଷ୍ଟି ହେଉଥିବା କହିଛନ୍ତି। ଅନ୍ୟପଟେ ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ଶଶିଭୂଷଣ ମିଶ୍ର କହିଛନ୍ତି, ନୂତନ ବସଷ୍ଟାଣ୍ଡରେ ବସଗୁଡ଼ିକ ରହଣି ପାଇଁ ଖୁବଶୀଘ୍ର ଏନ୍ଏସି ପକ୍ଷରୁ ଆନୁସଙ୍ଗିକ ବ୍ୟବସ୍ଥା କରାଯିବା ସହ ଦୃଢ଼ ପକ୍ଷେପ ନିଆଯିବ ବୋଲି କହିଛନ୍ତି।