ନୂଆଦିଲ୍ଲୀ,୭ ।୧: ମୋବାଇଲ ଫୋନରେ ବଲିଉଡ୍ ମହାନାୟକ ଅମିତାଭ ବଚ୍ଚନଙ୍କ କଣ୍ଠରେ କରୋନା ଭାଇରସ ସଚେତନତା ବାର୍ତ୍ତ ଥିବା ହ୍ୟାଲୋ ଟ୍ୟୁନକୁ ହଟାଇବା ପାଇଁ ଦାବି କରି ଦିଲ୍ଲୀ ହାଇକୋର୍ଟରେ ଆବେଦନ କରାଯାଇଛି । ଏଥିପାଇଁ ଆବେଦନକାରୀ ବିଭିନ୍ନ ପ୍ରକାର ଯୁକ୍ତି ବାଢିଛନ୍ତି । ସେ କହିଛନ୍ତି କରୋନା ମହାମାରୀ ସମୟରେ କରୋନା ଯୋଦ୍ଧାଙ୍କ କଣ୍ଠରେ ମୋବାଇଲ ଫୋନରେ କରୋନା ସଚେତନା ହ୍ୟାଲୋ ଟ୍ୟୁନ ରଖାଯିବା କଥା । ଅମିତାଭ ଏଥିପାଇଁ କେନ୍ଦ୍ର ସରକାରଙ୍କଠାରୁ ଅର୍ଥ ବି ନେଉଛନ୍ତି । ତେଣୁ ଏହି ସମୟରେ ଯେଉଁମାନେ ସମାଜର ସେବା କରୁଛନ୍ତି ସେମାନଙ୍କୁ ଆଗକୁ ଆଣିବା କଥା । ଏହି ମାମଲାର ଶୁଣାଣି ୧୮ ଜାନୁୟାରୀରେ କରାଯିବ ବୋଲି ଜଣାପଡିଛି । ଆବେଦନକାରୀ ଆହୁରି ମଧ୍ୟ କହିଛନ୍ତି ଅମିତାଭ ବଚ୍ଚନ ନିଜେ କରୋନା ଭାଇରସକୁ ନେଇ ସଚେତନତା ସୃଷ୍ଟି କରୁଛନ୍ତି । ଯେଉଁଥିପାଇଁ ସରକାର ତାଙ୍କୁ କିଛି ଅର୍ଥ ମଧ୍ୟ ଦେଉଛନ୍ତି । ହେଲେ ସେ ନିଜେ ଓ ତାଙ୍କ ପରିବାର ଏଥିପ୍ରତି ସଚେତନ ନୁହଁନ୍ତି । ତେଣୁ ଯେଉଁ କରୋନା ଯୋଦ୍ଧା ଭାବେ ନିଃଶ୍ୱାର୍ଥପର ଭାବେ ସମାଜର ସେବା କରୁଛନ୍ତି ଏହି ସୁଯୋଗ ସେମାନଙ୍କୁ ଦେବା ଉଚିତ । ସୂଚନାଯୋଗ୍ୟ, କରୋନା ମହାମାରୀ ସଂକ୍ରମଣ ହେବା ସମୟରେ ଅମିତାଭ ବଚ୍ଚନ ଓ ତାଙ୍କ ପରିବାରର ୪ ସଦସ୍ୟ କରୋନାରେ ସଂକ୍ରମିତ ହୋଇଥିଲେ । ଏହାପରେ ଅବଶ୍ୟ ସେମାନେ ସୁସ୍ଥ ହୋଇ ଫେରି ଆସିଛନ୍ତି ।