ବେଜିଂ, ୧୯।୯: କରୋନା ମହାମାରୀ ସଂକ୍ରମଣର ଏନ୍ତୁଡ଼ିଶାଳ ପାଲଟିଥିବା ଚାଇନାରେ ଏବେ ଏକ ନୂଆ ମହାମାରୀ ଦେଖାଦେଇଛି। ଏହି ନୂଆ ମହାମାରୀରେ ଚାଇନାର ୩ ହଜାର ୨୪୫ ଲୋକ ସଂକ୍ରମିତ ହୋଇଛନ୍ତି। ଇତିମଧ୍ୟରେ ୨୧ ହଜାର ୮୪୭ ଜଣ ଲୋକଙ୍କ ନମୁନା ପରୀକ୍ଷା କରାଯାଇଥିବା ଜଣାପଡ଼ିଛି। ଏହି ନୂଆ ମହାମାରୀକୁ ବ୍ରୁସେଲୋସିସ୍ ବୋଲି ଡାକ୍ତର ସୂଚନା ଦେଇଛନ୍ତି। ଏହି ମହାମାରୀକୁ ମେଡ଼ିଟେରିଆନ୍ ଫିଭର ମଧ୍ୟ କୁହାଯାଉଛି। ୪ ହଜାର ୬୪୬ ଜଣଙ୍କଠାରେ ଏହାର ସାଧାରଣ ଲକ୍ଷଣ ପ୍ରକାଶ ପାଇଛି। ଏହି ରୋଗ ସାଧାରଣତଃ ମଇଁଷିଠାରେ ଦେଖାଦେଇଥାଏ। ରୋଗଯୋଗୁ ମୁଣ୍ଡ ବୁଲାଇବା, ଦେଶରେ ଜ୍ୱର ରହିବା ଆଦି କେତେକ ଲକ୍ଷଣ ଦେଖାଦେଇଥାଏ। ଏହାଦ୍ୱାରା ଆକ୍ରାନ୍ତ ହୋଇଥିବା ପୁରୁଷ ଏବଂ ମହିଳା ପ୍ରଜନନ କ୍ଷମତା ହରାଇ ଥାନ୍ତି ବୋଲି ଡାକ୍ତର କହିଛନ୍ତି। ଉତ୍ତର-ପଶ୍ଚିମ ଚାଇନାର ଗାସୁଂ ପ୍ରଦେଶରେ ଏହି ମହାମାରୀ ବ୍ୟାପିବାରେ ଲାଗିଛି। ବର୍ତ୍ତମାନ ସୁଦ୍ଧା ୨୩ ହଜାର ୪୭୯ ଲୋକଙ୍କୁ ବ୍ୟକ୍ତିଗତ ଭାବେ ତଥା ଅନ୍ ଲାଇନ୍ରେ ଏହି ରୋଗ ସମ୍ପର୍କରେ ପରାମର୍ଶ ଦିଆଯାଇଛି। ୧୧ଟି ସ୍ବାସ୍ଥ୍ୟ ସେବା କେନ୍ଦ୍ର ଏନେଇ କାର୍ଯ୍ୟ ଜାରି ରଖିଥିବା ଚାଇନା ସରକାରୀ ଗଣମାଧ୍ୟମ ସଂସ୍ଥା ଗ୍ଲୋବାଲ ଟାଇମ୍ସ୍ ପକ୍ଷରୁ କୁହାଯାଇଛି। ଲୋକଙ୍କୁ ସଚେତନ କରାଇବା ଲାଗି ୧୫ ହଜାର ପ୍ରଚାର ପତ୍ର ବଣ୍ଟା ଯାଇଛି। ୨୦୧୯ ଜୁଲାଇ ୨୪ରୁ ଅଗଷ୍ଟ ୨୦ ମଧ୍ୟରେ ଝୋଗ୍ନମୁ ଲୋଝ୍ନଉ ବାୟୋଲୋଜିକାଲ ଫାର୍ମାସ୍ୟୁଟିକାଲ ଫ୍ୟାକ୍ଟ୍ରିରେ ବ୍ରୁସେଲା ପ୍ରତିଷେଧକ ଟିକା ପାଇଁ ବ୍ୟବହାର ସମୟ ଶେଷ ହୋଇ ସାରିଥିବା କୀଟାଣୁନାଶକର ଉପଯୋଗ କରାଯାଇଥିଲା। ଯେଉଁ ବିଘଟନ ଟ୍ୟାଙ୍କରେ କୀଟାଣୁନାଶକ ରଖାଯାଇଥିଲା ସେଥିରୁ ଗ୍ୟାସ୍ ନିର୍ଗତ ହେଉଥିଲା। ଟ୍ୟାଙ୍କକୁ ଖାଲି କରାଯିବା ସମୟରେ ଏଥିରେ ଥିବା ବ୍ରୁସେଲୋସିସ୍ ବ୍ୟାକ୍ଟେରିଆ ବାହାରକୁ ଆସିଥିଲା। ପରେ ଏହା ବାୟୁମଣ୍ଡଳରେ ଭାସିବୁଲି ଲୋକଙ୍କୁ ଆକ୍ରାନ୍ତ କରିଥିବା ଅନୁମାନ କରାଯାଉଛି ବୋଲି ଗ୍ଲୋବାଲ ଟାଇମ୍ସ୍ କହିଛି। ୨୦୨୦ ଜାନୁୟାରୀ ୧୩ରେ ଏହି ଫ୍ୟାକ୍ଟ୍ରିର ପ୍ରତିଷେଧକ ଟିକା ପ୍ରସ୍ତୁତି କରିବା ଲାଇସେନ୍ସ୍କୁ ରଦ୍ଦ କରାଯାଇଥିଲା।
