ଭୁବନେଶ୍ୱର, ୨୮।୮(ବ୍ୟୁରୋ): ସମ୍ଭାବ୍ୟ ତୃତୀୟ ଲହରକୁ ନେଇ ଭୟ ଓ ଆଶଙ୍କା ଲାଗି ରହିଥିବାବେଳେ ଆଗକୁ ଆସୁଛି ପାର୍ବଣ। ରାଜ୍ୟରେ ପାର୍ବଣ ଭିଡ଼ ଅଧିକ ରହୁଥିବାରୁ ସଂକ୍ରମଣ ବୃଦ୍ଧିର ସମ୍ଭାବନା ରହିଛି। ଇତିମଧ୍ୟରେ ଦେଶର କେତେକ ରାଜ୍ୟରେ ସଂକ୍ରମଣ ହଠାତ୍ ବଢ଼ିଯାଇଥିବାରୁ ତାହା ତୃତୀୟ ଲହର ବୋଲି କୁହାଯାଉଛି। ତେବେ ଓଡ଼ିଶାରେ ସେ ପରିସ୍ଥିତି ସୃଷ୍ଟି ହୋଇ ନ ଥିବାବେଳେ ଶିଶୁ ଓ କିଶୋର ଆକ୍ରାନ୍ତ ହେବା ଏବଂ ଦୁଇଦିନରେ ୩ ଆକ୍ରାନ୍ତ ଶିଶୁଙ୍କ ମୃତ୍ୟୁ ଘଟିବା ଚିନ୍ତା ବଢ଼ାଇ ଦେଇଛି। ଏପରିସ୍ଥିତିରେ ତୃତୀୟ ଲହରରେ ସଂକ୍ରମଣ ପିକ୍ ବଢ଼ିପାରେ ବୋଲି ରାଜ୍ୟ ସ୍ବାସ୍ଥ୍ୟ ନିର୍ଦ୍ଦେଶକ ଡା. ବିଜୟ ମହାପାତ୍ର ସୂଚନା ଦେଇଛନ୍ତି। ତେବେ ପାର୍ବଣରେ ସଂକ୍ରମଣ ବୃଦ୍ଧି ଆଶଙ୍କା ରହିଥିବାରୁ ଏ ସମ୍ପର୍କରେ ସେ କହିଛନ୍ତି, ଭାରତ ସରକାରଙ୍କ ପକ୍ଷରୁ ପାର୍ବଣରେ କଟକଣା ଜାରି ରଖିବା ପାଇଁ କୁହାଯାଇଛି। ରାଜ୍ୟ ସରକାର ଏହା ଉପରେ ନଜର ରଖିଛନ୍ତି। ଠିକ୍ ସମୟରେ ପାର୍ବଣ ପାଇଁ ନୂଆ ଗାଇଡ୍ଲାଇନ ଆସିବ। ଏହାଛଡ଼ା ଆମେ ସର୍ଭିଲାନ୍ସ ଓ କଣ୍ଟାକ୍ଟ ଟ୍ରେସିଂ ଜାରି ରଖିଛୁ। ଦ୍ୱିତୀୟ ଲହରରେ ପିକ୍ରେ ଆନୁମାନିକ ୧୦ ହଜାର ପର୍ଯ୍ୟନ୍ତ ଯାଇଛୁ। ଏବେ ସ୍ଥିତି ଭଲ ଅଛି। ଆକଳନ ଅନୁସାରେ ତୃତୀୟ ଲହର ଲାଗି ଆମେ ପ୍ରସ୍ତୁତ ରହିଛୁ ବୋଲି ସ୍ବାସ୍ଥ୍ୟ ନିର୍ଦ୍ଦେଶକ କହିଛନ୍ତ।
