ଜି.ଉଦୟଗିରି,୩୦।୮(ଡି.ଏନ.ଏ.): କନ୍ଧମାଳ ଜିଲା ଜି.ଉଦୟଗିରି ଥାନା ଏସ୍ଆଇ ସ୍ବାଗତିକା ବେହେରା ଆତ୍ମହତ୍ୟା ଘଟଣାରେ ଛନ୍ଦି ହୋଇଥିବା ଆଇଆଇସି ରେବତୀ ଶବରଙ୍କୁ ରବିବାର ଜିଲା ପୋଲିସ ମୁଖ୍ୟାଳୟକୁ ବଦଳି କରାଯାଇଛି। ଏସ୍ପି ଭିନୀତ ଅଗ୍ରଓ୍ବାଲ ଟିକାବାଲି ଆଇଆଇସି ଅଜୟ କୁମାର ସ୍ବାଇଁଙ୍କୁ ଜି. ଉଦୟଗିରି ଥାନାକୁ ବଦଳି କରିଛନ୍ତି। ସୋମବାର ସେ ଦାୟିତ୍ୱ ନେବା ପରେ ସହରର ଆଇନ ଶୃଙ୍ଖଳା ଓ ଟ୍ରାଫିକ ନିୟନ୍ତ୍ରଣକୁ ଗୁରୁତ୍ୱ ଦେବେ ବୋଲି କହିଛନ୍ତି।
ଗତ ଶନିବାର ଏସ୍ଆଇ ସ୍ବାଗତିକାଙ୍କ ଆତ୍ମହତ୍ୟା ପାଇଁ ପରିବାର ଲୋକେ ଆଇଆଇସି ଶବରଙ୍କୁ ଦାୟୀ କରିଥିଲେ। ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି ନେଇ ରବିବାର ଦିନତମାମ ଥାନା ସମ୍ମୁଖରେ ଧାରଣା ଦେଇଥିଲେ। ତେଣୁ ଘଟଣାର ଗୁରୁତ୍ୱକୁ ଦେଖି ରାତିରେ ଏସ୍ପି ଅଗ୍ରଓ୍ବାଲ ଆଇଆଇସି ଶବରଙ୍କୁ ଫୁଲବାଣୀସ୍ଥିତ ହେଡ୍କ୍ୱାର୍ଟରକୁ ବଦଳି କରିବା ସହ ଘଟଣାର ନିରପେକ୍ଷ ତଦନ୍ତ କରାଯିବ ବୋଲି କହିଥିଲେ। ଏହାପରେ ସେହି ରାତିରେ ଜି.ଉଦୟଗିରି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଥିବା ସ୍ବାଗତିକାଙ୍କ ମୃତଦେହ ବ୍ୟବଚ୍ଛେଦ କରାଯାଇ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିଲା। ଅନ୍ୟପକ୍ଷରେ ଏସ୍ପିଙ୍କ ନିର୍ଦ୍ଦେଶକ୍ରମେ ଡିଏସ୍ପି ବିଶ୍ୱାମିତ୍ର ହରପାଲ୍ ସ୍ବାଗତିକା ଆତ୍ମହତ୍ୟା ଘଟଣାର ତଦନ୍ତ ଆରମ୍ଭ କରିଛନ୍ତି।